Read anuak 1 Camiel 28 Bible Online

1 Camiel 28 - anuak bible

1 Camiel 28

¹'Ba ki yïth nïreka jø Pilitin jø leny moge acäŋge cooŋŋø kiper leny, nee këëtge ki jø Icriel. Køøre Akïc aköö jï Deebit, ni «Wär ŋäyï ni ïïni ki jø leny moï, u cøøa baŋ leny ki jø leny 'moa na aciel.»

²Køøre Deebit aköö jï Akïc, ni «Wøp døc, gïno tïïa, a na dhaanhnhï, jootï joodø.» Kanyøgønø, Akïc aköö jï Deebit, ni «Wøp døc, aani, ï tïïa tïïö na wïth jø wø koor aani na bäre bäre.»

³'Ba kar kaagø, Camiel onø thøø, ni jø Icriel bëët onø jwøk kiper thøø mare, ni koonyge eni Reema na näk pääny poge. Ni kar kaagø thuwø, Cøøl jøøa näk rege da juu mo cøøra jwïëc jøøa no othøw, ki jøøa nyeŋge reegø ki jap ajuuk, ee nø riem wøk dï Icriel.

⁴'Ba kar kaagø, jø leny mo jø Pilitin rege acooŋge, ni öge ni tïïcge twïër marge buut pääny mana cwøl ni Cunem; ni ö Cøølli ni cooŋ jø leny mo jø Icriel bëët ni tïïcge twïër marge deŋ Kïn Gilböa.

⁵'Ba kanya ö Cøølli na joot twïër mar jø Pilitin, ena lwäyö ni bwøk cwïnye døc.

⁶Ni ö Cøølli ni pëëny Wuuö Jwøk; 'ba Wuuö Jwøk bäŋ gïn mo ee løø jï Cøøl ki ri lääk, wala ki ri Urim,[18] wala ki dhøk nyïïkuk Jwøk.

⁷Køøre Cøøl aköö jï jø tïïc moe, ni «Cou määnynyu jïra ki dhaagø mo ree da juu mo cøøra jwïëc jiy moa no othøw, kiper naa cøøa baŋe nee eni pëënynya.» 'Ba jø tïïc moe aköö jïre, ni «Ka adïëri møn, da dhaagø mo bëëdö Endör mo ree da juu mo cøøra jwïëc jiy moa no othøw.»

⁸Kanyøgønø, Cøøl dëëre arunynye ka abïïe møøk kiper nee ba ŋec, ni aae ni cäädhi ki jiy ariiø, ni pïïcge baŋ dhaaŋŋøgø ki dïwäär; køøre ena köö jï dhaaŋŋøgø, na «A kwaya ïïni, beerra man tïïyï teeŋ gïn wø tïïyï obëëde, ni ö jwïëc ŋato nyeŋŋe caana jïrï ennø, ni cwölï gø wøk.»

⁹'Ba dhaagø manøgø aköö jïre, ni «?Neenï, gïna tïïc Cøølli dëët jøøa näk rege da juu mo cøøra jwïëc jiy moa no othøw, ki jøøa nyeŋge reegø ki jap ajuuk, na 'näk geni dï Icriel, kuyï? ?Aŋø ni bïthï aani en nee jwïëya raanynyï?»

¹⁰'Ba Cøøl akööŋ jï dhaagø manøgø ki nyeŋ Wuuö Jwøk, ni kööe, ni «Ŋëët Wuuö Jwøk na kwøw, bäŋ gïn mo pïï bäätï kiper luummi.»

¹¹Køøre dhaagø manøgø aköö, na «?Aŋa ni manynyï nee jwïëye cwöla wøk jïrï?» Ni kö Cøølli, ni «Cwöl jwïëc Camiel wøk jïra.»

¹²'Ba kanya ö dhaagø manøgø na joot Camiel, ena put köö døc ni dwøre ee tïŋ maal; ni cääne ki Cøøl, ni kööe, na «?Aŋø, a cøøgï gø aperŋø? Kee ïïna nyeya ma Cøøl ki dëërï kiree.»

¹³'Ba nyeya aköö jï dhaagø manøgø, ni «Aana Cøøl møn; kärï lwäyö. ?'Ba ennø, agïne na jootï?» 'Ba aløk dhaagø manøgø jï Cøøl, na «A joota jwïëc dhaanhø mo ö wøk ka tiet ŋøøm.»

¹⁴Køøre Cøøl aköö jï dhaagø manøgø, ni «?Ŋata jwïëye jootï enø, kïte nyïëdi?» Ni kö dhaagø manøgø, ni «Beeye dhaanhø ma jaal mo oruyö ka abïï man wø käär nyikuŋ Jwøki, ni jwïëye ö wøk ki tiet ŋøøm.» Ni puti ya Cøølli ŋäc ni beeye Camiel, ni put cøŋŋe këël piny ni kuul wïïe piny ni wøøra Camiel.

¹⁵'Ba Camiel aköö jï Cøøl, «?Aŋø ni tïï ko okiera dëëra en, ni cwölï aani wøk jaak en?» 'Ba aløk Cøølli jïre, ni «Aani, bëëtö mara atïmö ni teek døc kiree, kiper jø Pilitin ge manynya leny ki aani, ni Wuuö Jwøk ree ee nø daak buuta, ni bäŋ gïn løøe jïra këët ki dhøk nyïïkuk Jwøk wala ki ri lääk; 'ba ennø, ïïna cwøla kiper nee gïno tïïa nee nyoothï jïra.»

¹⁶Køøre Camiel aköö, na «?Aŋø, a pëënynyï gø këët nidïï, ni ŋäyï ni Wuuö Jwøk ree ee nø daak buutï ni nø tïme na nyimännï?

¹⁷'Ba Wuuö Jwøk gïnögø atïïe dëërï kaawat mana caan gø ki dhaa; kiper Wuuö Jwøk nyec acööt wøk cerï ni cïp gø jï Deebit ŋat pou.

¹⁸'Ba Wuuö Jwøk gïnögø atïïe dëërï dïcäŋi kiper mana kärï dwør Wuuö Jwøk leŋø, ni ö gïna caan Wuuö Jwøki nee tïïyï dëët jø Amalëk ki køør wëër mare, ni kärï gø tïïö na kare.

¹⁹'Ba Wuuö Jwøk ïïni këël jø Icriel, u cïbe ceŋ jø Pilitin. 'Ba diøø ïïni ki wäätï u thøw ni ööu baŋa. 'Ba ka adïëri møn, Wuuö Jwøk lwaa leny mo jø Icriel cïbe ceŋ jø Pilitin.»

²⁰Køøre Cøøl aput lwäyö døc ki luup moa car Camielli, ni put pädhö; 'ba eni thuwø dëëre ba teek, kiper bäŋ gïn mo ee camø ki dïcäŋ ki wäär bäre.

²¹'Ba dhaagø manøgø aö baŋ Cøøl ni joot gø ni Cøøl obwøk døc, ni kööe jï Cøøl, ni «Neenï, a na dhaanhnhï, dwørï aleŋa, ni ööa ni weta jwïëya, ni nø wïnynya luupï moa carï jïra.

²²'Ba ennø, beerra man wïnynyï dwøra thuwø, a na dhaanhnhï, nee cam mo thiinh jiiŋŋa jïrï niï cämï, kiper nee dëërï neethïk, niï cäädhi ni dëërï teek waŋjöö.»

²³'Ba Cøøl akweer ni kööe, na «A ba cämö.» Kanyøgønø, jø tïïc moe ki dhaagø manøgø gena pïëmö ki eni; køøre döötge aleŋe. Ni put Cøølli ö maal ki kanya näk eno pädhö yie, ni put pï piny bäät køøm.

²⁴'Ba kar kaagø, dhaagø manøgø jïre da nyirøøa mo olør. Køøre eni nyirøøa manøgø alwøre ni laar gø ŋaal; ni lwöte ki møø ni coot gø, ni käre gø coodø ki thømmø, ni bul gø na dääpe.

²⁵Ni käl cam manøgø nyïm Cøøl, ni ö Cøølli ki jø tïïc moe ni cämge. Køøre Cøøl ki jiye gena ö maal ni putge aay dïwäänögø.