Read anuak 1 Camiel 29 Bible Online

1 Camiel 29 - anuak bible

1 Camiel 29

¹'Ba jø leny mo jø Pilitin bëët rege acooŋge buut päänya cwøl na Apëk, ni ö jø lenynyi mo jø Icriel ni tïïcge twïër marge bäät jøøro mana en buut päänya cwøl ni Jedhriel.

²'Ba kar kaagø, kwääc lwaae mo leny mo jø Pilitin cäädhi ni jø møøk jïge da lwaa jiy ma dïpe, ki lwaa jiy ma kume. 'Ba Deebit ki jø leny moe ge cäädhi ka Akïc na aciel, ni ge cäädha køør jøøgø.

³Køøre kwääc lwaae mo leny mo jø Pilitin aköö, na «?Aŋø, jø Ibaru moi ge öömge ŋø kany?» 'Ba Akïc aköö jï jø poge moøgø, na «?Aŋø, man paa Deebit dhaanh Cøøl, ni beeye Cøøl nyeny Icriel? ?Aŋø, eni kär bëëdö buuta ki nïne mo kaala cwiir, ni bäŋ gïn mo raac mo yaa joodø bääte ki mana päny wøk na bëëde buuta ki yïth nïne moøgø bëët?»

⁴'Ba kwääc lwaae mo leny mo jø Pilitin aput wëër ki Akïc ni köge jïgø, ni «Caanï jï nyenøgø nee døø paac kanya näk iï nø cïp jïre. Eni ba ci baŋ leny ki waani. Kanymør eni duua dëëtwa ni cwaga tuuŋge kanyo tïme na ri leny. ?Aŋø, gïno tïïc nyenøgø kiper nee jïte ki jöö man døøge kanya aciel ki nyenynye ma Cøøl, paa beeye ki man ŋøør wïth jø leny mo jø Pilitin moi ii?

⁵?Aŋø, man paa Deebit? ?A duut mana wär jiyi ni jøw miel na køp, «ni ‹Cøøl anääö ki jø Pilitin ma kume, 'ba kume moa 'näk Deebiti thöötha geni døc,› ba wär kapere?»

⁶Køøre Akïc, Deebit acwøle ni kööe jïgø, ni «Ŋëët Wuuö Jwøk, Jwøk marï na kwøw, ïïni, ïïna dhaanhø mo bëëtï beer. Aani, yia met ki man cäädhï ki aani nee leny man këëlø na aciel. Kiper ki mana pänynyï wøk na ööï buuta këël kar kany ennø, bäŋ gïn mo raac mo yaa joodø bäätï na bäre. 'Ba kwääc lwaae mo leny mo jø Pilitin yïthge ba met ki ïïni.

⁷'Ba ennø møn, døø paac jaak, ni cäädhï ni yiï met. Kärï kweer; kiper ni näk miï kweer, kwääc lwaae mo leny mo jø Pilitin yïthge tïmö ni reyø.»

⁸'Ba Deebit aköö jï Akïc, «?Aŋø, agïnaŋø na tïïa? ?Agïnaŋø na raac na jootï bääta, a na dhaanhnhï, ki mana rïŋŋa baŋï këël kar kany ennø? ?Aŋø, a mäni kiperŋø ki man cøøa baŋ leny naa këëda ki nyïïmän mo nyeya mara?»

⁹'Ba Akïc mare aløøe ni kööe jï Deebit, ni «Aani, ŋääa ni ïïna dhaanhø mo beer døc, niï neeta kaamar nyïïatwiel maal mar Jwøk; 'ba beege kwääc lwaae mo leny mo jø Pilitin na köö, ni ‹Deebit ba ci baŋ leny ki waani.›

¹⁰'Ba ennø møn, kanyo tïme na amöölla diøø, wärï päny maal ni tïŋŋï ki jiyï ni beege jic kwääyï na ööï ki geni; wääth wär tïŋŋu kanyo tïm pinynyi na bäc øw.»

¹¹Kanyøgønø, Deebit apäny maal ki jiye ka amöölla cøøn, ni tïŋŋe ni døø kanya bëëde yie yi ŋööm jø Pilitin. Ni ö jø lenynyi mo jø Pilitin ni tïŋge ni cige baŋ leny ki jø Icriel moa en Jedhriel.