Read anuak 1 Camiel 4 Bible Online

1 Camiel 4 - anuak bible

1 Camiel 4

¹'Ba jø Icriel aci baŋ jø Pilitin nee këëtge ki ge, ni tïïcge twïër marge buut kanya cwøl ni Ëbënëdhër, ni ö jø Pilitinni thuwø ni tïïcge twïër marge buut päänya cwøl na Apëk.

²Køøre jø Pilitin rege acïïmge na dhøgi ni täkge ki leny ki jø Icriel. 'Ba kanya këël leny, jø Icriel abööt jø Pilitinni. Ni ö jø Pilitinni ni nääge ki jiy røk jø Icriel mo jïtö ki kume aŋween pwöl leny.

³'Ba kanya ö jø lenynyi mo Icriel na duuge twïër, jø døøŋŋø moge aköö, na «?Aŋø ni ö Wuuö Jwøki ni wëëk ø böötö dïcäŋi en nyïm jø Pilitin? Beerra man øømmø acanduk Cëëlö, ni beeye acanduk man wø nyooth luumma tuut Wuuö Jwøki ki jiy, nee bëëde dïïø nee ø kønye ceŋ nyïïmän moø.»

⁴Køøre jø leny ajääk Cëëlö ki jiy, ni ö jøøa jääŋŋi ni kälge acanduk man wø nyooth luumma tuut Wuuö Jwøki ki jiy, ni beeye Wuuö Jwøk, eni na wïth jammi bëët, ni wø nyooth ajiem nyec mare ki yïthakic gïïa no otïïö ni caala nyïïatwiet maal ni wø cwøl ni kirubëlli [6] na en bäät acanduk; 'ba wäät Ëli karge riet, ni beege Apni ki Piniac, ge bëëdö buut acanduk man wø nyooth luumma tuut Wuuö Jwøki ki jiy.

⁵'Ba kanya ö acanduki man wø nyooth luumma tuut Wuuö Jwøki ki jiy na pïïe twïër, jø Icriel bëët aput kwöŋŋö døc ni döötge ena maal, ni ö pinynyi ni jøl döötge.

⁶'Ba kanya ö jø Pilitinni na wïnyge dwør kwöŋŋö, gena köö, na «?Aŋø, kwöŋŋö man ni ba thiinh en ni en yi twïër mar jø Ibaru[7] tiere aŋøøni?» 'Ba awïnyge na acanduk man wø nyooth luumma tuut Wuuö Jwøki ki jiy apïï twïër.

⁷Køøre jø Pilitin alwäyö ni köge, ni «Beeye Jwøk na ö twïër mar jø Ibaru.» Ni cäŋge köö, ni «Ø puta ränynyö nø, kiper bäŋ gïn mo caala man mo okwøŋ tägö cøøn.

⁸Øøna ränynyö møn. ?Aŋa noo køny øøni ceŋ juu moøgø[8] ni teek yøø? Moøgø beege juuga raany jø Ijep ki teeŋ gïï mo leth døc dï paap.

⁹Wui, jø Pilitin, maaø røø ni bëëdø ni øøna cwøw, kiper nøø ba tïmø na laaŋe mo jø Ibaru kaawat man bëëtge ni gena laaŋe 'moø en; 'ba bëëdø ni øøna cwøw ni këëdø ki geni.»

¹⁰Kanyøgønø, jø Pilitin akëëdö ki jø Icriel, ni ö jø Icrielli ni cäŋi böötö, ni ö ŋati man nø røk jø leny mo jø Icriel ni reŋ poge. 'Ba jø leny mo jø Icriel moa thøw thööth døc; ni beege jø leny mo wø cäädhi ki tietge ma kume ma pïëradäk.

¹¹Ni ö acanduki man wø nyooth luumma tuut Wuuö Jwøki ki jiy ni käli; ni ö wäät Ëli karge riet, ni beege Apni ki Piniac, ni putge thøø ri leny manøgø.

¹²'Ba ni poot na dïcäŋögø, ŋat ma nyï tuuŋ jø Benjamen arïŋŋö ki pwöl leny ni pïïe Cëëlö na abïïe moe ee jeeyø ni wïïe ee jööpö ki tør, ni nyootha pänh cwïny mare.

¹³'Ba kanya pïïe, ka adïëri møn, Ëli bëëdö no opï piny bäät køøme dhi jöö ni kurö, kiper cwïnye päänhnhö døc kiper acanduk man wø nyooth luumma tuut Wuuö Jwøki ki jiy. 'Ba ŋatøgø aöö ni caan gïna tägö ri leny jï jø pääny, ni ö jø päänynyi bëët ni gööge ko oduuru.

¹⁴'Ba kanya ö Ëli na wïny dööt jiy ni göö ko oduuru, ena köö, no «?Oduuru man ni gøøc en tiere aŋøøni?» 'Ba ŋatøgø aput ö baŋ Ëli ni rwäänhnhö ni caan gø jïgø.

¹⁵'Ba kar kaagø cwiic Ëli oløny na pïërabïŋween ka abära, ni eno nø cøørø ni ba rääŋö këët.

¹⁶Køøre ŋatøgø aköö jï Ëli, ni «Aana ŋata käl pwöl leny. Ka adïëri møn, a päny wøk ka pwöl leny dïcäŋi en.» Køøre Ëli aköö, «?Nyie wääda, agïnaŋø na tägö nø?»

¹⁷'Ba aløk nyena ö kuna wäänynye ni kööe, ni «Jø Icriel gena bwøk nyïm jø Pilitin; ni ö jø Icrielli mo thööth ni thøwge; ni ö wäätï karge riet thuwø, ni beege Apni ki Piniac, ni thøwge; 'ba acanduk man wø nyooth luumma tuut Wuuö Jwøki ki jiy aput käl.»

¹⁸'Ba kanya ö nyenøgø na caan luum acanduk man wø nyooth luumma tuut Wuuö Jwøki ki jiy, Ëli aput pädhö ki bäät køøma bëëde bäät gø dhi kiir, ni pädhe ki ŋääe, ni toor ŋute ni put thøø, kiper eno løny na jaal ni eno lør. 'Ba beeye cwiiri ma pïëraŋween na beede ni luup ŋøla eni mo jø Icriel.

¹⁹'Ba kar kaagø, cï nyaare, ni beeye cï Piniac, ŋëëte ena maal ni kare cään ki man lwaare; 'ba kanya wïny luup moøgø na acanduk man wø nyooth luumma tuut Wuuö Jwøki ki jiy onø käl, ni kwari wää cwøre ki cwøre othøw, mäc lwaar aput tägö ree ni put lwaar.

²⁰'Ba kanya tïme ni eni manynya thøø, apoole moa nut buute kaagø aköö jïgø, ni «Kärï lwäyö, kiper ïïna nø lwaar ki dhaanhø ma dïcwøø.» 'Ba eni bäŋ gïn mo ee løø, ni käre ïthe ciiø ki luumge.

²¹'Ba nyeŋ nyilaal acaae ni Ikaböt, na näk tiere beeye na ajiem bäŋgø këët, ni kööe, na «Ajiem Wuuö Jwøk ree apaanye bäät jø Icriel.» 'Ba gïnögø acaane kiper mana käl acanduk man wø nyooth luumma tuut Wuuö Jwøki ki jiy, kiper mana thøw kwari ki cwøre thuwø.

²²'Ba nyijøøgø gïnögø acaane møn ni kööe, na «Ajiem Wuuö Jwøk ree apaanye bäät jø Icriel, kiper acanduk man wø nyooth luumma tuut Wuuö Jwøki ki jiy akäl.»