Read anuak 1 Camiel 6 Bible Online

1 Camiel 6 - anuak bible

1 Camiel 6

¹'Ba acanduk man wø nyooth luumma tuut Wuuö Jwøki ki jiy, abëëdö po jø Pilitin ki dwäde abïriiø.

²Køøre jø Pilitin dïlämme mo juu moge ka ajuuk moge acwølge, ni köge, na «?Agïnaŋø noo tïïcwa ka acanduk mar Wuuö Jwøk? Caannu jöö jïwa mano dwøkwa gø kare na käl yie.»

³'Ba dïlämme ka ajuuk aköö, «Ni näk ma acanduk mar Jwø Icriel dwøgu dwøgø, kär dwøgu ni yie ŋaam jaak; 'ba ka adïëri møn, u doo cïpö ki muuy jïre man wø nyooth bääyö. Køøre nø, täwe oaay bäätu, ni ö gïna käre cere paanyø dëëtu kipere ni ŋäyu gø.»

⁴Køøre jø Pilitin aköö, «?Agïnaŋø noo cïpwa na muuy man wø nyooth bääyö jï Wuuö Jwøk?» 'Ba dïlämme ka ajuuk aköö, ni «Beege gïï mo otïïö ni caala børi ma abïïc mo tïïc ka warkey, ki gïï mo caala jïëy ma abïïc mo tïïc ka warkey thuwø, no opäärö ki kwään kwääri mo jø Pilitin, kiper gïna leth na tägö, täga dëëtu bëët ki kwääri mou.

⁵'Ba gïïögø ni caal børi yøø, ki gïïögø ni caal jïëy yøø, ni beege gïïa raany ŋöömö maru, wär tïïyu na karge, nou jiema Jwø Icriel; kanymør eni cere paanye paanyø bäätu, ki juu mou, këël ŋöömö maru.

⁶?Aperŋø na tïïyu cwïnynyu ni teek kaawat mana tïïc jø Ijepi ki nyenyge ma Peerø na døøcge cwïnyge mo teek? ?A kanya ö Jwøki na nyooth teek mare bäätge, jø Icriel kärge wiiø nee aacge, ni ö jiyi ni putge tïŋŋö?

⁷«'Ba ennø, tïïu ki jääy mo nyään man wø tut dhäki, ni lwötu ki dhäk ariiø mo yïthge da caak mo poot bäŋ jääy mo ege tuudö; ni ö jääyi manøgø ni twöy ri dhäk moøgø, ni ö nyïïge ni kïthi paac, ni tïm karge ni bäär ki mëëkge.

⁸Køøre, acanduk mar Wuuö Jwøk wär kïth yi jääy manøgø; ni ö gïïo tïïc ki warkey noo kïth baŋ Jwøk na muuy man wø nyooth bääyö, ni kïthi ya acanduk mør kur keerge, ni cïbi buut acanduk mar Jwøk. Køøre nø, acanduk wär tïïc nee aae.

⁹'Ba wär neetu; ni näk ma acanduk aay ki jöö ni tiir jaak ni coonya keew mar ŋöömö mana käl yie ni dïët ki Bëëth-Camic, putø ka ŋäc møn ni beeye Wuuö Jwøk na tïïc gïn ni leth en dëëtø. 'Ba ni näk mo gïnögø kär tägö, putø ka ŋäc thuwø ni manøgø paa cer Wuuö Jwøk ni raany øøni en; 'ba beeye gïn mo täga eni keere jaak.»

¹⁰Køøre jøøgø gïnögø aputge tïïc, ni lwötge ki dhäk ariiø mo yïthge da caak ni twöge jääy manøgø ri dhäk moøgø, ni ö nyïïge ni dëëdi yi øtø paac.

¹¹'Ba jøøgø acanduk mar Wuuö Jwøk aputge kïth yi jääy, këël acanduk mana näk yie da gïïa näk caala jïëy ki gïïa näk caala børi na no otïïö ki warkey.

¹²Køøre dhäk moøgø aput aay ni tiir jaak ni ge coonya Bëëth-Camic, ni putge wääth ki øtjöö keere ni ge cäädhi ni ge jwöŋö; 'ba ge kär gaa wøk bäät cwïcge wala bäät cämge ki øtjöö mana caathge. Ni ö kwääri mo jø Pilitin ni putge wääth køør dhäk moøgø ni rege ege jädhö këël mana pïïcge waŋ keew kanya dïët ki Bëëth-Camic.

¹³'Ba kar kaagø jø Bëëth-Camic ge kääö ki beel yïth pwöth moge; 'ba kanya lwïthge, acanduk man wø nyooth luumma tuut Jwøki ki jiy aputge joot, ni tïm yïthge ni met døc ki mana jootge gø.

¹⁴Kanyøgønø, jääy aput pïï yi pwöth Jøcua nyï Bëëth-Camic ni put cuŋŋö kanya näk yie da kïdi. Ni ö jø Bëëth-Camici ni putge jääy kaaŋŋø, ni cïpge dhäk moøgø jï Wuuö Jwøk no olämi man wø waaŋ bäre.

¹⁵'Ba gïna tïïc jø tuuŋ Libay kiree, acanduk mar Wuuö Jwøk ka acanduk mana en buute, na näk gïïa no otïïö ki warkey ena yie, akälge wøk ni cïpge ge piny bäät kïdi manøgø. 'Ba dïcäŋögø, jø Bëëth-Camic aput cïpö jï Wuuö Jwøk ko olämme mo wø waaŋ bäre ko olämme møga.

¹⁶'Ba kanya ö kwääri mo jø Pilitin moøgø na abïïc yøø na nø jootge gïïa tägö, gena put døø Akarön dïcäŋögø.

¹⁷'Ba gïïa näk caala børi na no otïïö ki warkey, na cïp jø Pilitinni jï Wuuö Jwøk na muuy man wø nyooth bääyö, aciel beeye kiper Acdöt, aciel beeye kiper Geedha, aciel beeye kiper Ackelön, aciel beeye kiper Gëth, aciel beeye kiper Akarön;

¹⁸'ba gïïa no otïïö ki warkey ni caala jïëy, opäärö ki kwään päänye bëët mo jø Pilitin moa en ceŋ kwääri moa näk abïïc, ni beege päänye moa no ogeerø ni teek, ki mïëri moge bëët moa thenh thenh. 'Ba kïdi mana ö jø Bëëth-Camici na cïpge acanduk mar Wuuö Jwøk bääte, poot nut yi pwöth Jøcua nyï Bëëth-Camic këël dïcäŋi en.

¹⁹'Ba Wuuö Jwøk anääö ki jiy røk jø Bëëth-Camic kiper na neenge ya acanduk mar Wuuö Jwøk. Ni jiy moa nääe bëët beege cwøw ma pïërabïriiø, ni ö jø Bëëth-Camici ni kïmge døc kiper mana ö Wuuö Jwøki na 'näk jiy ki thøø mo dwøŋ.

²⁰Køøre jø Bëëth-Camic aköö, «?Aŋø, aŋa ni løny jïre ki man cuŋŋe nyïm Wuuö Jwøk, Jwøi ni en kur keere en? ?A acanduk mar Wuuö Jwøk kïthø gø baŋ jøøe nee aae buutø?»

²¹Kanyøgønø, jø Bëëth-Camic ajääk baŋ jøøa bëëdö Kiriat-Jeerim ni köge, ni «Jø Pilitin acanduk mar Wuuö Jwøk aduuge; beerra man ööu baŋe ni källu gø.»