Read anuak 1 Camiel 7 Bible Online

1 Camiel 7 - anuak bible

1 Camiel 7

¹Køøre jø Icriel moa bëëdö Kiriat-Jeerim aöö ni lwørge acanduk man wø nyooth luumma tuut Wuuö Jwøki ki jiy, ni kïthge gø yi øt Abinadap na en bäät thuur, ni cïpge wääde ma Eliedhar kur keere kiper na acanduk man wø nyooth luumma tuut Wuuö Jwøki ki jiy nee koore.

²'Ba acanduk mar Wuuö Jwøk abëëdö Kiriat-Jeerim ki kany mo bäär, mo jïtö ki cwiiri ma pïërariiø; ni ö jø Icrielli bëët ni jwöŋge dëër Wuuö Jwøk kiper køny.

³Køøre Camiel acäänö ki jø Icriel bëët, ni kööe, ni «Ni näk mo u duua baŋ Wuuö Jwøk ki cwïnynyu bäre, wetu juuga path ki juuga cøøri na Actaröth na en dïïu, ni cïpu cwïnynyu jï Wuuö Jwøk na bäre, ni tïnynyu eni keere; køøre uuno pieme ceŋ jø Pilitin.»

⁴Køøre jø Icriel juuga cøøri ni Baal ka Actaröth awetge ni tïnyge Wuuö Jwøk keere.

⁵Køøre Camiel aköö, ni «U jø Icriel bëët, cooŋu dëëtu Micpa, køøre aano lämö jï Wuuö Jwøk kiperu.»

⁶Kanyøgønø, jiy rege acooŋge Micpa. Ni ö pïïyi ni øømmi ni kønynyi piny nyïm Wuuö Jwøk ni nyootha bääyö marge. Ni ö jiyi ni kweerge ki cam dïcäŋeca, ni putge marge caan kaace, ni köge, ni «Waana bääyö dëër Wuuö Jwøk.» 'Ba Camiel luup jø Icriel aŋøle Micpa.

⁷'Ba kanya ö jø Pilitinni na wïnyge gø ni jø Icriel rege ege nø cooŋ Micpa, kwääri mo jø Pilitin aöö nee këëtge ki jø Icriel. 'Ba kanya ö jø Icrielli na wïnyge gø, gena lwäyö døc ki jø Pilitin.

⁸Køøre jø Icriel aköö jï Camiel, ni «Put bëëtö niï lämö kiperwa jï Wuuö Jwøk, Jwøk marwa, kiper nee wa kønye ceŋ jø Pilitin.»

⁹'Ba Camiel nyirøømmø mo poot dhøøth alwøre ni cïp gø no olämi man wø waaŋ bäre jï Wuuö Jwøk; ni ö Camielli ni jwöŋe dëër Wuuö Jwøk kiper nee jø Icriel køny. Køøre Wuuö Jwøk dwør Camiel awïnynye.

¹⁰'Ba kanya bëëde ni Camiel cïpö olämi man wø waaŋ bäre jï Wuuö Jwøk, jø Pilitin oløny ni karge cään ki man tukge jø Icriel. 'Ba dïcäŋeca Wuuö Jwøk køth aput tïïc nee pööde bäät jø Pilitin, ni kier wïthge; ni ö jø Pilitinni ni putge bwøk nyïm jø Icriel.

¹¹Køøre jø Icriel gena ö wøk ki Micpa ni ŋwiecge køør jø Pilitin, ni 'näkge geni këël mana këët kany mo cään ki Bëëth-Kar.

¹²Køøre Camiel alwötö ki kïdi ni cwöth gø piny yïthakic Micpa ki kanya cwøl ni Cën; ni cak nyeŋ gø ni Ëbënëdhër, ni tiere beeye kïn køny, ni kööe, ni «Wuuö Jwøk øøna kønye këël mana pïïø kany en.»

¹³Kanyøgønø, jø Pilitin wïthge aput døø piny, ni kärge duu waŋ keew mar jø Icriel. Ni put cer Wuuö Jwøki bëëtö ni ena dëët jø Pilitin ki yïth nïra beet Camielli bëët.

¹⁴'Ba päänye mo jø Icriel moa näk onø käl jø Pilitinni acäŋ duu baŋge, ni beege päänye moa en yïthakic Akarön ki Gëth. Ni ö jø Icrielli ni putge ŋöömö marge lwør ceŋ jø Pilitin. Kar kaagø thuwø, aput tïmö ni da bëët-mëër yïthakic jø Icriel ki jø Amör.

¹⁵'Ba Camiel abëëdö ni luup ŋøla eni mo jø Icriel ki yïth nïr kwøw moe bëët.

¹⁶'Ba ki yi cwiir cooth eni wø cøøa Bëthël ki Gëlgela ki Micpa, ni ŋøl luup mo jø Icriel yïth päänye moøgø bëët.

¹⁷Køøre eni wø duua Reema, kiper paare ena kaace; ni eni bëëdö ni ŋøla luup jø Icriel kaace. 'Ba ena tïïö ki gïn wø cïp olämme bääte jï Wuuö Jwøk Reema kaace.