Read anuak 1 Camiel 8 Bible Online

1 Camiel 8 - anuak bible

1 Camiel 8

¹'Ba kanya nø tïm Camielli na jaal, wääte acuume nee bëëtge na dïŋut luup mo jø Icriel.

²'Ba nyeŋ wääde mana näk kanynye beeye Jööl, ni nyeŋ wääde mana näk julle beeye Abaaja; 'ba geni, ge bëëdö ni gena dïŋut luup Bëërcïïba.

³'Ba wäät Camiel jöör wääge kärge caadhø; gena gaa wøk ni tïm cwïnyge ni päl ki jammi, ni kätge ki jammi mo wø cïp ki piny, ni daaŋge luup jiy.

⁴Køøre jø døøŋŋø bëët mo jø Icriel rege acooŋge ni cige Reema baŋ Camiel;

⁵ni köge jïgø, ni «Neenï, ïïna nø døøŋŋø ni tïmï ni ïïna jaal; 'ba wäätï ge ba caath øtjöö mana caathï. 'Ba ennø, röönyï jïwa ki nyeya mo bëëdö na dïŋut luup jïwa kaawat man wø tïïc wïth juurre bëët.»

⁶'Ba luubö mana caan jøøgø jï Camiel, na köge, ni «Röönyï ki nyeya mo bëëdö na dïŋut luup jïwa,» Camiel yie atïmö ni raac døc ki gø. Ni ö Camielli ni läme jï Wuuö Jwøk.

⁷'Ba Wuuö Jwøk aköö jï Camiel, ni «Cek ïthï ki luup bëët moø ni car jiyi jïrï yøø, kiper geni ge ba kwier ïïni, 'ba ge kwiera aani naa ba bëëda ni aana nyeya marge.

⁸Ki mana täge ki dïcäŋa käla ge wøk ki Ijep këël dïcäŋi en, ge bëëdö ni ge tïïya teeŋ tïïc manøgø. A wø wecge wiiø, ni tïnyge juu møøk mo path. 'Ba teeŋ gïna tïïcge dëëra beeye ni tïïcge dëërï thuwø enø.

⁹Ennø møn, cek ïthï ki marge; 'ba ge diï köömmö døc ni caanï jöör tïïc mar nyeya jïge, ni beeye nyeya manøgø ni manyge nee bëëtge tiere enø.»

¹⁰Kanyøgønø, Camiel luup bëët mo Wuuö Jwøk acaane jï jøøa öö na pëëny eni ni röönyö ki nyeya.

¹¹Ni kööe, ni «Man beeye jöör tïïc mar nyeya na manynyu nou bëëdu tiere; ŋato røønynyu na nyeya wäätu käle kälö, ni kïth møøk bäät jïëthe moe mo wø tut okwëënyi, ni tïïc møøk nee rïïŋge ki bäät okwëënyi moe, ni tïïc møga nee rïïŋge ki tietge nyïm jïëthe moe mo wø tut okwëënyi.

¹²Eno röönyö ki kwääc lwaae mo ŋati man nø jïre da lwaa jiy ma pïërabïïc, këël mano këët røk kwääc lwaae mo ŋati man nø jïre da lwaa jiy ma kuma. 'Ba wäätu møøk otïïe na jø puur yïth pwöth moe këël mano kacge caammi moo ciek, ni tïïc møøk na jø wø tïïc jap leny ki jap jïëthe moe mo wø tut okwëënyi.

¹³Nyeya manøgø thuwø nyïïu käle kälö ni tïïc ge na jø wø tïïc mädhi mo wø ŋwääi ni met, ni tïïc møøk na jø thaal, ni tïïc møøk na jø wø budö ki dääpe.[9]

¹⁴Ni ö eni ni käl pwöth moa beyø mou, ni beege pwöth beel ki pwöth omøki ki pwöth jer wø nyïïge wel na mädhi, ni cïp ge jï jø tïïc moe.

¹⁵Ni ö paac wïth caammi mou, ki paac wïth nyïïomøki mou, ni käl geni, ni cïp ge jï jiye moa näk ee cuumö ki jø tïïc moe.

¹⁶Eni thuwø, jø tïïc mou moa näk cwøw ki moa näk mään, ki cwøw mou moa teek, ka arëëni mou, käle kälö kiper tïïe moe.

¹⁷Paac wïth dïëk mou käle kälö; këël uuni ki dëëtu kiree u tïmö ni uuna jø tïïc moe.

¹⁸'Ba kar kaaca nø, u jwöŋö kiper gïno tïïc nyeya mana manynyu kiper dëëtu; 'ba kar kaagø thuwø, Wuuö Jwøk ïthe ba ciie ki maru.»

¹⁹'Ba jø Icriel akweer ki man leŋge dwør Camiel ni köge, ni «Ba løny; doo da nyeya mo käära waani cøøn,

²⁰nee wa tïmwa ni wa caala wïth juurre møga thuwø. Ni ö nyeya marwa ni bëëde ni ŋøla luup mowa, ni bwöth maal nyïmwa ni këëde kiperwa.»

²¹'Ba kanya nø ö Camielli na wïny luup bëët moa car jø Icrielli, luup moøgø acaane jï Wuuö Jwøk.

²²Køøre Wuuö Jwøk aköö jï Camiel, ni «Leŋ döötge, ni röönyï jïge ki nyeya.» Kanyøgønø, Camiel aköö jï jø Icriel, ni «Ŋati man nø døø yi pääny mana käl yie.»