Read bahnar Bl 12 Bible Online

Bl 12 - bahnar bible

Bl 12

¹Âu, Kră Yang đei khan kơ Abram thoi âu: “Ih athei lĕch đơ̆ng dêh char âu, tơklah đơ̆ng hnam dơnŏ păng 'nhŏng oh mĕ 'bă ih, na năm tơ dêh char mă Inh gô tơ'bôh kơ ih.

²Inh gô ăn kơ ih jing minh adrĕch adrung tih, Inh gô ăn kơ ih pŭn hiôk, đe kư̆m gô ư-ang kơ ih, păng ih gô jing tơm kơ tơdrong pŭn hiôk,

³Inh gô ăn pŭn hiôk kơ bu mă sơkat kơ ih pŭn hiôk. Inh gô hiap pơtê̆ bơngai bu mă hiap pơtê̆ ih; păng đĭ-đăng adrĕch adrung kon bơngai kơpal teh âu gô đei pŭn hiôk đơ̆ng ih.”

⁴Đơ̆ng noh Abram năm, kiơ̆ thoi nơ̆r Kră Yang khan tơ'bôh, Lot kư̆m kiơ̆ hơdai sư. Kơplah Abram lĕch đơ̆ng Charan, sư đei tơpơh-jĭt pơđăm sơnăm boih.

⁵Abram chông ba Sarai, akăn sư, Lot mon sư păng đĭ-đăng lu mŭk tơmam sư đei hơmet ba păng lu đĭch đam sư mă đei đơ̆ng Charan, lĕch đơ̆ng noh, lu sư năm truh tơ dêh Kanaan.

⁶Abram yak găn dêh char âu, truh tơ tơnơm 'long kôih tơ Mamrê, jê̆ pơlei Sichem. Kơplah noh lu kon pơlei Kanaan oei oei tơ lăm dêh char noh.

⁷Kră Yang pơdah kơ Abram păng pơkă khan: Inh gô ăn adrĕch adrung ih teh đak âu! Đơ̆ng noh, Abram pơm minh pôm chơnang soi kơ Kră Yang, Tơ'ngla mă đei pơdah akâu sư kơ Abram.

⁸Đơ̆ng noh, sư yak găn kông groi gah hơlĕch kơ pơlei Bethel, na pơm bơsŭn; bơmơ̆t kơ noh Bethel, tơ gah hơlĕch đei Ahi. Na sư pơm minh pôm chơnang soi tơ noh kơ Kră Yang wă krao apinh Sư.

⁹Đơ̆ng rŏng, Abram yak rah pơm rah bơsŭn 'net 'net dĭng truh tơ gah gơal, anăn Nêgeo.

¹⁰Kơplah ei sơ̆, tơ dêh sư đei pơngot rơwĕt. Tơdrong pơngot rơwĕt âu tih dêh, na Abram jur tơ char Êyiptơ oei gô tơ noh.

¹¹Kơplah sư wă oei lăm dêh Êyiptơ, Abram đei khan hăm Sarai, akăn sư thoi âu: “Âu, inh băt kơ ih jing minh 'nu bơngai drŏ-kăn 'lơ̆ng hơbŏ.

¹²Mưh ba tơ'bơ̆p kon pơlei Êyiptơ, sư 'bôh ih, lu sư gô khan, ‘noh jơ̆ akăn sư’; kơnh hli kơ lu sư pơlôch inh, na gô lê̆ ih arih.

¹³Na inh apinh khan ih jơ̆ oh drŏ-kăn inh, wă kơ đơ̆ng ih na đe gô sơng iŏk inh hiôk-hian păng huay kơ pơlôch.”

¹⁴Abram truh tơ dêh Êyiptơ kon pơlei Êyiptơ 'bôh Sarai bơngai drŏ-kăn 'lơ̆ng hơbŏ tơpă.

¹⁵Lu bơngai jang kơ pơtao Pharaôn kư̆m năm tơkan roi 'bơ̆t anăp pơtao lu sư 'bôh bơngai drŏ-kăn 'lơ̆ng noh, na chông ba bơngai drŏ-kăn 'lơ̆ng noh mơ̆t tơ hnam Pharaôn.

¹⁶Yua kơ drŏ-kăn noh, na Pharaôn sơng iŏk Abram hiôk 'lơ̆ng păng ăn kơ Abram đei lơ triu, rơmo aseh tơno, aseh akăn, lăk-đa, đĭch drŏ-nglo, đam drŏ-kăn.

¹⁷Na yua kơ Sarai, akăn Abram, na Kră Yang phak Pharaôn hăm hnam dơnŏ sư đei tơdrong jĭ krưp dêh.

¹⁸Pharaôn năm krao Abram na apinh Abram thoi âu: “Ih pơm kiơ kơ inh thoi noh? Liơ ih ưh kơ roi kơ inh bơngai drŏ-kăn noh akăn ih?

¹⁹Mă-lei khan noh oh drŏ-kăn ih? Na jing inh iŏk hĭ sư pơm akăn. Dang ei âu akăn ih; iŏk sư bĕ păng weh tơ nai.”

²⁰Na Pharaôn khan pơkă kơ lu linh sư, ba klo kăn Abram hăm đĭ-đăng mŭk tơmam sư năm tơ nai.