Read bahnar Bl 13 Bible Online

Bl 13 - bahnar bible

Bl 13

¹Abram weh đơ̆ng Êyiptơ năm tơ tơring Nêgeo, chông ba akăn sư, mŭk măk lu sem dơrong păng mon sư Lot hai.

²Abram mơdrŏng dêh, đei lơ sem dơrong, đei hu, maih.

³Sư năm dĭng 'bơ̆t yơ, sư pơm bơsŭn tơ noh, đơ̆ng gah Gơal ei yak năm truh tơ Bethel, dĭng truh tơ anih mă sư đei pơm bơsŭn blŭng-a sơ̆, tơ alam bre Bethel hăm Ahi.

⁴Noh mă anih sư đei pơm chơnang soi adrol ki. Tơ noh Abram krao khan anăn Kră Yang.

⁵Na Lot kư̆m năm hơdai Abram, kư̆m đei triu rơmo lơ păng tơmam pơm bơsŭn.

⁶Tơ anih noh ưh kơmah kơ bre sư oei hơdai yua kơ sem dơrong păng mŭk tơmam sư lơ tơpă dĭng mah pă đei gơh oei hơdai.

⁷Na đei tơdrong tơgar băl lăm lu bơngai wei sem dơrong Abram păng lu bơngai wei sem dơrong Lot. Kơplah noh kon pơlei Kanaan păng kon pơlei Phêrêsit kư̆m oei lăm char ei, thoi noh anih wei sem dơrong ưh kơmah.

⁸Abram khan kơ Lot thoi âu: “Oei pôm hơtô hơrao hơnao, kăt apinh ba 'nĕ pă pơjah băl; lu bơngai wei triu ba hai kư̆m 'nĕ pă tơgar băl.

⁹Đĭ kơ char âu ưh kơ sĭ e ngăl dăm hă? Thoi noh, na weh bĕ đơ̆ng inh; dah e iŏk tơring gah 'ngiĕo inh iŏk gah 'ma, dah e iŏk gah 'ma, inh iŏk gah 'ngiĕo.”

¹⁰Lot sư tơmang lăng 'bôh tơ thŭng gah Krong Jôrđăn noh, anih mă đei đak ro hngôm truh tơ pơlei Suar; bri chŭn noh kư̆m thoi lĕ pơgar Kră Yang pơm, thoi char Êyiptơ mơ̆n. Năr noh adrol kơ Kră Yang tam mă pơrăm pơlei Sôđôm păng pơlei Gômôrơ.

¹¹Lot sư rơih tơ gah thŭng jê̆ đak Krong Jôrđăn păng truh tơ gah hơlĕch. Thoi noh, bre sư jing tơklah băl.

¹²Abram oei lăm char Kanaan, gah Lot sư oei tơ pơlei gah thŭng na hiŏng bơsŭn sư truh tơ jê̆ pơlei Sôđôm.

¹³Kon pơlei Sôđôm kơnê̆ păng lu mơ'nah pơm yoch tih dêh hăm Kră Yang.

¹⁴Đơ̆ng rŏng kơ Lot tơklah đơ̆ng Abram boih, Kră Yang khan kơ Abram thoi âu: “Ih ngơk lăng bĕ, lăng iŏk đơ̆ng anih ih oei âu dĭng truh tơ gah yă-nơ̆m, gah gơal, gah hơlĕch, gah bơmơ̆t:

¹⁵Yua kơ đĭ dêh ayơ mă ih 'bôh, Inh gô ăn kơ ih păng adrĕch adrung ih ling-lang hloi.

¹⁶Inh gô pơm ăn kơ adrĕch adrung ih lơ thoi 'mui teh; kơna dah bu kĕ jô̆ 'mui teh, lei sư kư̆m kĕ jô̆ adrĕch adrung ih.

¹⁷Iung bĕ, chă nơnăm jơ̆p kơ lăm dêh char, wơ̆l, tor; yua kơ Inh wă ăn kơ ih dêh char âu.”

¹⁸Na Abram yuih bơsŭn sư năm oei ala tơm 'long kôih tơ Mamrê, gah Hêbrôn păng sư kư̆m đei pơm tơ noh minh pôm chơnang soi kơ Kră Yang.