Read bahnar Bl 14 Bible Online

Bl 14 - bahnar bible

Bl 14

¹Lăm chăl Amraphel, pơtao Sinar; Ariok pơtao Êlasar; Kêtrôlaôme, pơtao Êlam; păng Tidal, pơtao Gôim,a

²puăn 'nu pơtao âu iung blah Bêra pơtao Sôđôm; Birsa, pơtao Gômôrơ; Sinap pơtao Atma; Sêmebêr, pơtao Jeboim păng pơtao Bêla, wă khan Soa.

³Lu pơtao âu lu sư pơđâu akŭm băl lăm thŭng Sidim, dang ei krao đak dơsĭ 'boh.

⁴Lăm mơjĭt-'bar sơnăm lu pơtao 'nâu chu jang kơ pơtao Kêtrôlaôme mă-lei truh sơnăm mă mơjĭt-pêng, lu sư hil plơ̆ iung blah dơ̆ng.

⁵Lăm sơnăm mă mơjĭt-puăn, pơtao Kêtrôlaôme hăm lu pơtao khŭl sư năm blah iŏk bơngai Rêphaim lăm teh đak Astarôt Kanaim, bơngai Susin tơ teh đak Ham, bơngai Êmim oei tơ lăm Thŭng Kiriathim.

⁶Păng bơngai Hôrit oei tơ kông Sirơ, dĭng truh tơ anih Êl Paran, tơ jê̆ tơmăn glă.

⁷Đơ̆ng noh lu pơtao krao akŭm lu linh sư brŏk truh tơ Ênmispatb mă krao Kêdêh, wang blah jơ̆p kơ tơring Amalek păng kon pơlei Amôrit oei tơ Hasasôn Tamar.

⁸Đơ̆ng noh lu pơtao Sôđôm, Gômôrơ, Atma, Jeboim păng pơtao Bêla, đe krao Soa, sư lĕch năm tơblah sư pơrĕng klah asong linh sư lăm thŭng Sidim,

⁹wă tơblah hăm lu Kêtrôlaôme, pơtao Êlam; Tidal, Pơtao Gôim; Amraphel, pơtao Sinar păng Ariok, pơtao Êlasar, puăn 'nu pơtao tơblah păng pơđăm 'nu pơtao.

¹⁰Lăm thŭng Sidim đei lơ hơlŭng chai jăr; pơtao Sôđôm păng pơtao Gômôrơ thuơ kơdâu puh lăm sơlŭng; gah lu sư huay kơ huŏng kơdâu tŏk tơ kông.

¹¹Lu bơngai jei noh tơgar iŏk pơđĭ mŭk măk păng phe 'ba đơ̆ng lu Sôđôm păng Gômôrơ, đơ̆ng noh weh tơ nai.

¹²Lu ayăt kư̆m rôp Lot, mon Abram, mă sư oei tơ Sôđôm păng iŏk đĭ-đăng mŭk tơmam sư, chĕp ba hloi.

¹³Minh 'nu bơngai klaih năm kơdâu roi kơ Abram bơngai Hêbrơ, oei tơ hla hơmŭl 'long kôih Mamrê, bơngai Amôrit, 'nhŏng kơ Êskôl păng Ane, pêng 'nu âu pơgơ̆p hăm Abram boih.

¹⁴Lăp Abram kơtơ̆ng khan mon sư linh ayăt rôp boih, na sư pơtơm akŭm pêng-hrĕng mơjĭt-tơhngam 'nu bơngai mă pơhrăm lê̆ tơdrong tơblah boih, lu bơngai đĭch đam tơpŭ lăm hnam sư, na druh 'moi lu pơtao noh truh tơ teh đak Đan.

¹⁵Thoi noh Abram klah asong lu đam sư, wơh năm wang lu linh ayăt kơmăng blah puh truh tơ teh đak Hôba gah yă-nơ̆m kơ pơlei Đamas.

¹⁶Sư pơdrâu iŏk đĭ-đăng mŭk tơmam sư mă đơ̆ng lu đe blah iŏk păng kư̆m chông brŏk mon sư, Lot hăm dôm lu mŭk măk sư, lu drŏ-kăn păng lu kon pơlei kư̆m brŏk.

¹⁷Đơ̆ng rŏng kơ Abram blah Kêtrôlaôme păng khŭl pơtao gah sư jei boih, na pơtao Sôđôm năm đih sơng sư tơ lăm thŭng Sawê, wă khan thŭng pơtao.

¹⁸Mêlkisêdek pơtao Salem, athei ba 'bĕng păng tơdrô, kơplah noh pơtao âu jơ̆ 'Bok soi kơ Kră Yang 'Bok Kei-Dei mă tih hloh.

¹⁹Sư sơkat ăn kơ Abram đei pŭn hiôk thoi âu: “Apinh Kră Yang 'Bok Kei-Dei mă tih hloh, Kră Yang Tơ'ngla pơjing plĕnh teh, ăn tơdrong pŭn hiôk kơ Abram!

²⁰Trŏ kơ bơnê kơkuh tơpă kơ Kră Yang 'Bok Kei-Dei tih hloh đei jao boih lu ayăt tơ lăm ti ih. Đơ̆ng noh Abram iŏk minh lăm mơjĭt đơ̆ng dôm tơmam mă sư iŏk đơ̆ng lu ayăt na pơyơ̆r ăn kơ pơtao noh.c”

²¹Pơtao Sôđôm khan kơ Abram thoi âu: “Athei jao đĭ kơ inh dôm lu bơngai noh, gah lu mŭk tơmam noh ih iŏk đĭ.”

²²Abram tơl sư thoi âu: “Inh yơ̆r ti 'bơ̆t anăp Kră Yang 'Bok Kei-Dei tih hloh, Kră Yang pơgơ̆r plĕnh teh, na pơkă thoi âu:

²³Mă tơmam kiơ gah ih, mă khan lăp minh ioi brai, dah minh dăng tơlei chơkhŏ, inh kư̆m ưh kơ đei iŏk; hli kơ pơtao gơh khan thoi âu: ‘Yua kơ đơ̆ng inh na mă pơm kơ Abram mơdrŏng.’

²⁴Mă-lei dôm lu tơmam sa lu bơngai kiơ̆ inh đĭ sa boih. Gah lu bơngai mă đei năm hơdai inh, Ane, Êskôl păng Mamrê, gah lu sư, lu sư athei iŏk kơdih bĕ.”