Read bahnar Bl 21 Bible Online

Bl 21 - bahnar bible

Bl 21

¹Kră Yang năm tơgŭm yă Sara, kiơ̆ thoi nơ̆r sư đei pơma pơkă, pơm 'blep thoi Sư đei khan kơ Sara.

²Sara anăp, tơpŭ ăn minh 'nu kon drŏ-nglo kơ Abraham lăm năr sư đĭ kră boih, trŏ 'blep kơ năr đêl Kră Yang 'Bok Kei-Dei pơkă.

³Abraham anăn kon sư mă Sara tơpŭ ăn kơ sư noh Isăk.

⁴Trŏ tơhngam năr, Abraham kăt tơdra akar kơ Isăk kiơ̆ thoi tơdrong juăt mă Kră Yang 'Bok Kei-Dei đei pơkă.

⁵Âu, kơplah Sara tơpŭ kơ Isăk, Abraham đei minh-hrĕng sơnăm boih.

⁶Sara khan thoi âu: “Kră Yang 'Bok Kei-Dei đei pơm kơ inh minh tơdrong hiôk, đĭ-đăng bu bu kơtơ̆ng kư̆m hiôk chhôk hơdai hăm inh.”

⁷Na khan dơ̆ng thoi âu: “Hăm đei bu pơ̆n khan kơ Abraham khan Sara wă tơmŏm kon sư hah? Mă-lei inh tơpŭ boih kơ kon drŏ-nglo kơplah inh đĭ kră pă kĕ.”

⁸Kon hơ'lơ̆p wơ̆ 'lŏ, na pă mŏm boih; trŏ lăm năr Isăk lê̆ mŏm noh, Abraham đei hơmet sŏng sa tih wă kơ chơt hiôk.

⁹Sara 'bôh kon drŏ-nglo mă Hagar, bơngai Êyiptơ, đei tơpŭ ăn kơ Abraham kon drŏ-nglo noh hiĕk che bơle kơ Isăk.

¹⁰Sara khan kơ Abraham thoi âu: “Pơpuh tơweh lê̆ đam noh hăm kon sư bĕ, yua kơ kon drŏ-nglo đam noh ưh kơ gơh iŏk mŭk tơmam đơ̆ng kon drŏ-nglo inh Isăk.”

¹¹Nơ̆r âu pơm kơ Abraham sơ'ngon dêh, yua kơ Ismael kon drŏ-nglo sư.

¹²Mă-lei Kră Yang 'Bok Kei-Dei khan kơ Abraham thoi âu: “Ih 'nĕ sơ'ngon kơ kon drŏ-nglo ih hăm đĭch ih noh. Sara sư pơma thoi ih athei mơ̆ng sư pơma yua kơ Isăk âu gô pơjing adrĕch adrung ih.

¹³Inh kư̆m pơm ăn kơ kon drŏ-nglo ih mă đơ̆ng đĭch ih noh jing minh pôm adrĕch, yua kơ sư kư̆m kon ih pơjing.”

¹⁴Abraham iung đơ̆ng hrôih, iŏk 'bĕng păng minh pôm get đak ăn kơ Hagar; tơ'băk lu tơmam noh 'bơ̆t hơngiĕng sư păng jao ăn kơ sư kon drŏ-nglo sư noh, na puh tơweh. Hơgar sư weh, yak trong ataih wih rok thŭng Bêrsêba.

¹⁵Kơplah đak lăm get đĭ, sư ming lê̆ kon sư 'bơ̆t minh tơnơm 'long iĕ ei,

¹⁶Năm hơ-oei ataih 'biơ̆ dang tôch 'brơ̆m hră jruh; na sư khan lăm to khan: “Ôi rŏ inh huay kơ 'bôh kon inh lôch!” Sư hơ-oei nhơ̆m ơh.

¹⁷Kră Yang 'Bok Kei-Dei kơtơ̆ng kon hơ'lơ̆p noh nhơ̆m, na linh jang 'lơ̆ng đơ̆ng plĕnh krao Hagar thoi âu: “Ơ Hagar! Ih đei tơdrong kiơ? 'Nĕ kơ hli, yua kơ Kră Yang 'Bok Kei-Dei kơtơ̆ng boih nơ̆r hơ'lơ̆p ih nhơ̆m tơ anih sư noh.

¹⁸Iung bĕ păng tơiung kon ih đơ̆ng noh, rôp ti chông sư, yua kơ inh gô ăn kơ sư jing minh adrĕch tih kơdrâ̆m.”

¹⁹Đơ̆ng noh Kră Yang 'Bok Kei-Dei tơ'bôh hloi kơ sư tơ noh đei đak sơlŭng. Sư năm sŏ 'bĕnh kơ get akar na ăn kơ kon sư nhă.

²⁰Kră Yang 'Bok Kei-Dei kư̆m tơgŭm ăn kơ kon sư wơ̆; sư oei tơ lăm thŭng glă, gơh prah hră đam.

²¹Kơplah sư oei tơ thŭng Pharan, mĕ sư rôp ăn kơ sư akăn đơ̆ng char Êyiptơ.

²²Lăm char noh, pơtao Abimêlek hăm Pikôl, kră pơgơ̆r linh sư, khan kơ Abraham thoi âu: “Kră Yang 'Bok Kei-Dei kư̆m tơgŭm ih lăm dôm tơdrong ih jang.

²³Thoi noh, dang ei, pơkă bĕ 'bơ̆t anăp Kră Yang 'Bok Kei-Dei ih ưh pă hơlĕnh kơ inh, kơ kon inh hăm kơ adrĕch inh dơ̆ng. Mă-lei ih athei arih sa mă 'lơ̆ng hăm inh păng char mă ih oei dang ei kư̆m thoi inh oei arih sa hăm ih sơ̆.”

²⁴Abraham tơl thoi âu: “Inh pơkă.”

²⁵Abraham ưh kơ hiôk hăm pơtao Abimêlek gah đak sơlŭng mă lu đĭch đam pơtao tơgar iŏk.

²⁶Pơtao Abimêlek pơma thoi âu: “Inh kư̆m ưh kơ băt bu mă pơm kơ ih ưh kơ hiôk thoi noh; ih kư̆m ưh kơ roi kơ inh adrol; na inh kư̆m 'nao băt năr âu đĕch.”

²⁷Đơ̆ng noh Abraham rôp triu hăm rơmo pơyơ̆r ăn kơ pơtao Abimêlek, đơ̆ng noh măr sư pơgơ̆p pơkăm băl.

²⁸Abraham rơih iŏk tơpơh tŏ kon triu dăm.

²⁹Pơtao Abimêlek apinh Abraham: “Pơm kiơ mă rơih lê̆ tơpơh tŏ kon triu dăm noh?”

³⁰Sư tơl: “Apinh pơtao iŏk bĕ tơpơh tŏ kon triu dăm âu, đơ̆ng tơpang ti inh kơdih ăn, wă kơ ih pơsĭt kơ inh đei sir boih đak sơlŭng âu.”

³¹Yua đơ̆ng noh, na đe krao anăn anih âu Bêrsêbaa yua kơ tơ anih noh đei bre sư pơkă pơkăm băl.

³²Thoi noh bre sư đei pơkă pơgơ̆p băl tơ Bêrsêba. Đơ̆ng noh pơtao Abimêlek păng yŏng pơgơ̆r linh Pikôl iung, brŏk tơ tơring Philistin.

³³Abraham đei pơtăm minh tơnơm 'long plei me tơ Bêrsêba păng tơ anih noh sư krao khan kơ Kră Yang, Kră Yang 'Bok Kei-Dei mă arih ling-lang.

³⁴Abraham oei đunh lăm char Philistin.