Read bahnar Bl 22 Bible Online

Bl 22 - bahnar bible

Bl 22

¹Đang kơ dôm tơdrong noh keh boih, na Kră Yang 'Bok Kei-Dei pơlong lăng Abraham. Sư khan thoi âu: “Ơ Abraham!” Abraham tơl: “Inh tơ âu.”

²Kră Yang 'Bok Kei-Dei khan thoi âu: “Rôp bĕ Isăk kon pôm ih mă 'mêm kơeng păng năm tơ tơring Môria, tơ anih noh ih pơyơ̆r kon ih pơm tơmam soi 'buh tơ minh anih kơpal kông to mă Inh gô tơ'bôh kơ ih.”

³Abraham iung đơ̆ng hrôih, hrơ̆t aseh. Sư chông ba 'bar 'nu đĭch đam sư păng kon sư Isăk kư̆m năm hơdai. Sư chăl 'long ŭnh chĕp ba wă 'buh tơmam soi na năm tơ anih mă Kră Yang 'Bok Kei-Dei đei tơ'bôh ăn.

⁴Truh năr mă pêng, Abraham ngơk muh măt, tơmang 'bôh anih noh oei ataih.

⁵Sư khan kơ bre đĭch đam sư: Măr iĕm ngôi tơ âu lăng aseh; nhi hơ'lơ̆p inh âu gô năm tơ to wă soi sơmah đơ̆ng noh nhi brŏk tơ măr iĕm dơ̆ng.

⁶Abraham chĕp 'long ŭnh wă 'buh tơmam soi, pơpôi ăn kơ Isăk kon sư, gah sư chĕp ŭnh păng săng, na bre sư yak năm.

⁷Isăk pơma hăm Abraham, 'bă sư, thoi âu: “Ơ 'bă!” 'Bă sư tơl: “Kiơ kon! ‘'Bă tơ âu.’ ” Isăk khan: “'Long ŭnh đei boih, ŭnh đei boih, mă-lei tơ yơ kon triu wă 'buh soi?”

⁸Abraham tơl: “Ơ dăm, tơ'ngla Kră Yang 'Bok Kei-Dei gô ăn kon triu mă wă 'buh soi noh.” Na bre sư kư̆ kơ yak năm.

⁹Bre sư năm truh tơ anih mă Kră Yang 'Bok Kei-Dei tơ'bôh ăn; tơ noh Abraham hơmet chơnang soi, dan 'long ŭnh, chô̆ Isăk mă kon sư, dan sư tơ kơpal 'long ŭnh tơ kơpal chơnang soi.

¹⁰Abraham chĕp săng yơ̆r ti sư hơ-ô wă 'bet kon sư.

¹¹Linh jang Kră Yang đơ̆ng kơpal plĕnh krao. “Ơ Abraham, Abraham!” Sư tơl, “đei inh âu.”

¹²Linh jang 'lơ̆ng khan thoi âu: “Lê̆ kơ hơ-ô ti ih tơ akâu kon hơ'lơ̆p âu păng kư̆m 'nĕ kơ pơrăm sư yua kơ dang ei Inh băt boih ih hli yom kơ Inh, na huay mah kơeng kơ kon ih wă pơyơ̆r kơ Inh.”

¹³Abraham ngơk hue 'bôh đei minh pôm kon triu tơno tơ rŏng sư oei đom kơ hơmŭl 'long, na sư rôp iŏk triu 'noh 'buh pơm tơmam pơyơ̆r tơplih kơ kon sư.

¹⁴Abraham krao anih noh Kră Yang Jirêa đơ̆ng noh, na dang ei đei nơ̆r khan: “Tơ kơpal kông Kră Yang gô đei hơmet ăn.”

¹⁵Linh jang Kră Yang đơ̆ng plĕnh Krao Abraham wơ̆t mă 'bar.

¹⁶Na Kră Yang khan thoi âu: “Yua kơ ih đei pơm boih tơdrong, noh huay kơeng kơ kon ih, mă khan kon pôm ră, na kơdih akâu Inh pơkă pơkăm:

¹⁷Gô tuh ăn pŭn hiôk kơ ih, thim ăn kơ ih đei adrĕch adrung lơ thoi sơnglŏng tơ plĕnh ti, kư̆m thoi chuơh đak dơsĭ păng adrĕch adrung noh blah iŏk kơđông lu ayăt.

¹⁸Yua kơ ih chu yom kơ nơ̆r Inh athei, na kon pơlei pơla lăm teh âu yua kơ đơ̆ng ih gô đei pŭn hiôk.”

¹⁹Đang kơ noh Abraham hăm Isăk wih brŏk tơ bre 'bar 'nu đam sư; lu sư iung brŏk hơdai tơ gah Bêrsêba, Abraham kư̆m oei hloi tơ Bêrsêba.

²⁰Đơ̆ng rŏng kơ dôm lu tơdrong noh, đe roi ăn kơ Abraham thoi âu: “Duch Milka gô tơpŭ ăn kơ Nahôr oh ih,

²¹kon kơdră sư anăn Us, oh drŏ-nglo sư Bus, Kêmuel ('Bă Aram),

²²Kheset, Haso, Pildas, Jilap păng Bêthuel.”

²³Bêthuel pơjing kon drŏ-kăn Rê'bêka. Mika đei hơiơch kơ tơhngam 'nu kon drŏ-nglo kơ Nahôr, oh Abraham.

²⁴Gah akăn kơnhŏng, anăn Ruma, kư̆m pơjing kon anăn Têba, Gaham, Tahas păng Maka.