Read bahnar Bl 23 Bible Online

Bl 23 - bahnar bible

Bl 23

¹Sara sư arih đei minh-hrĕng 'bar-jĭt tơpơh sơnăm. Dôm noh chăl arih Sara.

²Sara lôch tơ Kêriat Arba, noh krao Hêbrôn, lăm tơring Kanaan. Abraham grong nhơ̆m hmoi kơ Sara.

³Đang kơ noh Abraham iung dơ̆ng 'bơ̆t anăp bơngai lôch na pơma kơ lu bơngai Hêtit thoi âu:

⁴“Inh jơ̆ bơngai tơmoi oei pơdơh tơ âu hơdai iĕm. Apinh asong inh teh wă pơm bơsat lăm tơring iĕm wă 'bŭ bơngai mă inh jô̆ akâu akar inh.”

⁵Kon pơlei Hêtit drơ̆ng thoi âu:

⁶“'Bok, apinh ih mơ̆ng lu nhôn, ih jing 'bok yŏng lăm lu nhôn Kră Yang 'Bok Kei-Dei ăn; 'bŭ bĕ ŭnh hnam ih tơ anih ayơ mă 'lơ̆ng hloh mă nhôn đei. Tơ lăm lu nhôn ưh kơ đei kơeng ôh kơ teh bơsat, mă wă 'bŭ akăn ih 'bok yŏng.”

⁷Abraham gruih iung năm drap bon kơkuh 'bơ̆t anăp lu kon pơlei lăm tơring noh, wă khan kon pơlei Hêtit,

⁸Păng khan: “Tơdah iĕm lăp đon kơ inh 'bŭ ŭnh hnam inh, na athei mơ̆ng inh bĕ păng apinh Êphrôn, kon drŏ-nglo Sôhak tơgŭm inh.

⁹Wă kơ sư asong ăn kơ inh gơp tơmo tơ Makbêla, 'bơ̆t tơklă kơ̆l mir sư, tĕch mă trŏ, wă kơ inh gơh đei teh kơdih pơm bơsat wă 'bŭ.”

¹⁰Na, Êphrôn bơngai Hêtit oei lăm kon pơlei sư tơl nơ̆r Abraham 'bơ̆t anăp bơngai Hêtit kơtơ̆ng păng đĭ-đăng kon pơlei oei 'bơ̆t 'măng jang thoi âu:

¹¹“Ưh, 'Bok yŏng, mơ̆ng bĕ nơ̆r inh; dang ei 'bơ̆t anăp kon pơlei pơla inh, inh apinh pơyơ̆r kơ ih bri noh păng kư̆m pơyơ̆r hloi lăm noh; 'bŭ bĕ ŭnh hnam ih lôch lăm noh.”

¹²Abraham drap bon kơkuh 'bơ̆t anăp kon pơlei ei.

¹³Păng pơma hloi thoi âu 'bơ̆t anăp Êphrôn păng kon tơring mơ̆ng: “Mơ̆ng inh bĕ, inh ăn jên kơ bri noh, iŏk bĕ, na mă inh gơh 'bŭ bơngai lôch âu.”

¹⁴Êphrôn tơl Abraham:

¹⁵“'Bok yŏng, mơ̆ng inh, minh hlak mir dang puăn-hrĕng hlak jên hu inh hăm ih huay ôh.a Apinh ih 'bŭ bĕ ŭnh hnam ih.”

¹⁶Abraham mơ̆ng chu nơ̆r Êphrôn, 'bơ̆t anăp kon pơlei Hêtit, kŏng puăn-hrĕng hlak jên hu ăn kơ sư, jên hu mă lu bơngai lăm chăl ei juăt kơ mơdro sa.b

¹⁷Thoi noh mir bri Êphrôn, tơ Makbêla gah hơlĕch kơ Mamrê, noh mir gơp tơmo, đei lu 'long lăm noh păng puăn-hrĕng hlak jên hu ăn kơ sư tăp dăr tôch kơ mir.

¹⁸'Bơ̆t anăp đĭ lu bơngai Hêtit mă oei 'bơ̆t 'măng jang noh Êphrôn pơjao ăn kơ Abraham teh noh jang sa hloi.

¹⁹Đơ̆ng rŏng kơ dôm tơdrong noh, Abraham 'bŭ Sara, akăn sư, lăm gơp tơmo lăm mir Makbêla hơlĕch kơ pơlei Mamrê wă khan Hêbrôn, lăm char Kanaan.

²⁰Mir păng gơp tơmo đơ̆ng lu bơngai Hêtit pơjao, noh wă khan Abraham yua teh noh pơm bơsat.