Read bahnar Bl 25 Bible Online

Bl 25 - bahnar bible

Bl 25

¹Abraham iŏk akăn plơ̆ng anăn Kêtura.

²Sư đei tơpŭ kơ Abraham kon anăn Siram, Jôksan, Medan, Madian, Isbak, Sua.

³Jôksan pơjing Sêba păng Đêdan; Kon sâu Đêdan noh adrĕch adrung Asurim, adrĕch adrung Lêtusim păng adrĕch adrung Lêumim.

⁴Kon drŏ-nglo Mađian noh Êpha, Êpher, Hanok, Abida păng Elda, dôm lu tơ kơpal âu adrĕch adrung Kêtura.

⁵Abraham ăn kơ Isăk đĭ-đăng mŭk sư.

⁶Gah kon đơ̆ng bre akăn sư Hơgar păng Kêtura tơpŭ ăn noh sư asong ăn jên tơmam kơplah sư oei arih păng athei oei tơ dêh char gah hơlĕch, ataih đơ̆ng kon tơnơm sư Isăk.

⁷Abraham arih đei minh-hrĕng tơpơh-jĭt pơđăm sơnăm.

⁸Sơnăm sư đĭ lơ, akâu đĭ kră, arih kư̆m hrăp boih, đơ̆ng noh sư kơtĕch jơhngơ̆m, brŏk kiơ̆ yă 'bok.

⁹'Bar 'nu bre kon drŏ-nglo sư, Isăk păng Ismael, 'bŭ 'bă bre sư lăm gơp tơmo Makbêla tơ anih bri Êphrôn kon drŏ-nglo Sôhak, bơngai Hêtit, jê̆ Mamrê.

¹⁰Noh mă bri đêl Abraham răt đơ̆ng bơngai Hêtit. Tơ anih noh bre sư 'bŭ Abraham hơdai hăm Sara akăn sư.

¹¹Đơ̆ng rŏng kơ Abraham lôch, Kră Yang 'Bok Kei-Dei tuh ăn tơdrong pŭn hiôk kơ Isăk mă kon drŏ-nglo sư mă oei jê̆ sơlŭng đak Lahairoi.

¹²'Nâu adrĕch adrung Ismael, kon drŏ-nglo Abraham hăm yă Hagar, bơngai Êyiptơ, đam Sara tơpŭ ăn.

¹³Âu lu anăn kon drŏ-nglo Ismael Jô̆ hơrĭ.a Kon kơdră Ismael, Nêbaôt, Đơ̆ng noh Kêda, Atbêel, Mibôsam.

¹⁴Misma, Đuma, Masa,

¹⁵Hađat, Thêma, Jêtur, Naphis păng Kêtama.

¹⁶Noh dôm lu kon drŏ-nglo Ismael păng anăn lu sư kiơ̆ kơ anih păng pơlei mă lu sư oei na anăn ăn. Noh mơjĭt-'bar 'nu yŏng lăm adrĕchb lu sư.

¹⁷Ismael arih đei minh-hrĕng pêng-jĭt tơpơh sơnăm, na kơtĕch jơhngơ̆m lôch; na brŏk kiơ̆ yă 'bok.

¹⁸Adrĕch adrung sư oei 'bơ̆t anăp lu 'nhŏng oh sư kơdih, đơ̆ng Hawila truh tơ Sur, tơklă trong Êyiptơ hăm tơ Asiri.

¹⁹'Nâu adrĕch adrung Isăk, kon drŏ-nglo Abraham. Abraham pơjing Isăk.

²⁰Na, kơplah Isăk đei puăn-jĭt sơnăm, sư oei kơ Rê'bêka, kon adruh Bêthuel păng oh drŏ-kăn La'ban, lu sư bơngai Aram đơ̆ng char Phadan Aram.c

²¹Isăk krao apinh Kră Yang kơ akăn sư, yua kơ akăn sư hơwŏng. Kră Yang lăp đon kơ nơ̆r krao khan apinh noh, na ăn kơ Rê'bêka anăp.

²²Mă-lei yua kơ anăp kơmar nhen tơjrot băl lăm klak, na sư khan thoi âu: “Tơdah đei tơpă thoi noh, tơdrong thoi âu wă pơm kiơ?” Sư apinh Kră Yang tơdrong noh.

²³Kră Yang khan thoi âu: “'Bar tŏ dêh char oei lăm klak ih, păng đei 'bar adrĕch kon pơlei gô đei đơ̆ng lăm klak; kon pơlei âu gô pran hloh kơ kon pơlei noh, păng bơngai 'lŏ gô yom kơ bơngai 'lơ̆p.”

²⁴Truh năr sư tơpŭ, đei kơmar đơ̆ng lăm klak sư.

²⁵Bơngai mă jruh adrol akâu sư 'brê thoi ao sŏk kon sem, krao anăn sư Êsâu.d

²⁶Bơngai đơ̆ng rŏng, na ti rôp kơnơl jơ̆ng Êsâu, na krao anăn sư Jakôp.e Kơplah tơpŭ kơ bre 'bar 'nu âu Isăk đei tơdrâu-jĭt sơnăm boih.

²⁷Kơplah bre kon drŏ-nglo âu rai wơ̆ 'lŏ na Êsâu jing minh 'nu bơngai chă lua mơgap, ngăl chă ngôi tơ bri mir, chŭn; gah Jakôp bơngai iơ̆m dim oei kơtă lăm hnam.

²⁸Isăk lăp đon kơ Êsâu, yua kơ sư ngăl 'maih sa 'nhĕm bri; mă-lei Rê'bêka lăp đon kơ Jakôp.

²⁹Lăm minh năr noh, Jakôp pai chao, Êsâu 'nao brŏk đơ̆ng bri lap dêh;

³⁰Khan kơ Jakôp thoi âu: Apinh oh asong 'nhŏng sa chao kiơ mă 'brê 'brê noh bĕ, yua kơ 'nhŏng lap dêh. Yua kơ thoi noh boih gơ̆p krao anăn sư Eđôm.f

³¹Jakôp tơl sư thoi âu: “'Nhŏng tĕch ăn kơ inh tơdrong gơh jing 'nhŏng kơdră bĕ.”

³²Êsâu tơl: “Âu 'nhŏng jao kơ oh tơdrong gơh jing 'nhŏng kơdră lê̆ kơ 'nhŏng wă pơm kiơ?”

³³Jakôp tơl sư: “'Nhŏng athei pơkă adrol bĕ,” 'nhŏng sư pơkă; thoi noh sư tĕch tơdrong jing 'nhŏng kơdră kơ Jakôp.

³⁴Đơ̆ng noh Jakôp ăn kơ Êsâu sa 'bĕng păng chao hrâu hăm tơh; sa nhă đang boih, na sư iung yak năm. Noh boih Êsâu mă lăng hơi tơdrong jing 'nhŏng kơdră.