Read bahnar Bl 29 Bible Online

Bl 29 - bahnar bible

Bl 29

¹Đơ̆ng noh Jakôp sư yak năm dĭng truh tơ tơring lu kon pơlei gah hơlĕch.

²Sư lăng, 'bôh đei minh pôm sơlŭng đak lăm thŭng dơnă, tơ noh đei pêng khŭl triu oei bun pơdơh, yua kơ anih noh, anih đe ngăl juăt kơ pơnhă triu. Đei tơnglơ̆p đe klơ̆p đak sơlŭng păng tơmo tih dêh.

³Lu khŭl triu akŭm tơ noh, na lu sư tơgrŏl pơih lê̆ tơmo đơ̆ng đơ̆p sơlŭng, wă pơnhă triu; đang kơ pơnhă boih lu sư klơ̆p dơ̆ng thoi đêl.

⁴Jakôp jet lu bơngai wei triu. Ơ Lu đe 'nhŏng, lu iĕm đơ̆ng yơ? Lu sư tơl thoi âu: Nhôn đơ̆ng Charan.

⁵Sư jet: Lu iĕm hăm băt kơ La'ban sâu Nahôr ưh? Lu sư tơl: Lu nhôn băt.

⁶Sư jet dơ̆ng: Sư hăm oei liĕm akâu? Lu sư tơl: Sư oei liĕm akâu mơ̆n păng tơ to Rachel, kon adruh sư, mă oei puh lu triu năm tơ âu to.

⁷Jakôp khan: 'Nâu oei hrôih tam trŏ kơ triu akŭm; lu iĕm jah pơnhă triu lu iĕm wăi, na jah achăng lê̆ lu sư chă sa dơ̆ng.

⁸Lu sư tơl: Nhôn ưh kơ gơh pơm thoi noh ôh; athei gô hơdai mă tôm kơ triu akŭm tơ âu 'mơ̆i, na lu nhôn tơgrŏl pơih tơmo tơnglơ̆p sơlŭng noh na pơnhă khŭl triu.

⁹Na 'nâu; kơplah sư oei pơma dơnuh hăm đe noh, blư kơ Rachel truh chông lu triu 'bă sư, yua kơ sư bơngai wei triu.

¹⁰Kơplah sư 'bôh Rachel, kon adruh La'ban mih sư, na sư năm hloi tơ sơlŭng tơlơ̆ tơmo mă đêl klơ̆p 'măng sơlŭng, na pơnhă hloi lu triu La'ban, mih sư.

¹¹Jakôp chŭm Rachel, sư nhơ̆m.

¹²Đơ̆ng noh sư roi ăn kơ Rachel băt sư kơtum, kôn mon La'ban. Sư kon tơdăm Rê'bêka, na Rachel kơdâu roi kơ 'bă sư băt.

¹³'Nao kơtơ̆ng roi khan Jakôp, kon tơdăm oh sư, na La'ban kơdâu truh kuăr păng chŭm na chông pơtơm ba mơ̆t tơ hnam sư. Jakôp roi ăn kơ mih sư La'ban băt dôm tơdrong truh kơ sư.

¹⁴La'ban drơ̆ng sư: Tơpă boih, mon jơ̆ bơngai mă mih 'mêm. Đơ̆ng noh Jakôp oei hơdai mih sư tơ noh minh khei.

¹⁵Đang kơ noh La'ban khan kơ Jakôp thoi âu: Yua kơ mon jơ̆ kôn mon inh, na mon bơ̆jang tơgŭm inh đĕch hă? Wă apah mon jang noh dôm yơ jah roi kơ mih.

¹⁶La'ban đei 'bar 'nu kon adruh, kon 'lŏ sư anăn Lêa, kon 'lơ̆p sư anăn Rachel.

¹⁷Lêa măt sư ưh kơ gan hơdah, gah Rachel 'lơ̆ng hơbŏ muh măt hơdah hơdong.

¹⁸Jakôp hưch kơ Rachel na sư khan thoi âu: Yua kơ oh inh Rachel kon adruch mih, mon gô jang tơgŭm mih lăm tơpơh sơnăm.

¹⁹La'ban drơ̆ng sư: Kơtrơ̆m ăn sư oei kơ mon 'lơ̆ng hloh kơ sư oei kơ bơngai nai; lei oei bĕ hăm mih păng jang tơpơh sơnăm.

²⁰Thoi noh, Jakôp yua kơ Rachel, na sư lăng tơpơh sơnăm noh dang lăp 'bar pêng năr.

²¹Đơ̆ng noh Jakôp khan kơ La'ban thoi âu: Sơnăm đêl pơkă tôm boih; apinh mih jah ăn akăn inh kơ inh, wă kơ inh oei hơdai sư.

²²Na La'ban hloi wơ̆n lu kon pơlei, pơih minh năr et sa;

²³truh kơsơ̆ măng, sư rôp ăn Lêa, kon adruh 'lŏ sư, kơ Jakôp, na Jakôp oei hơdai Lêa.

²⁴La'ban kư̆m ăn đam sư Silpa kiơ̆ awih awăn kơ Lêa, kon adruh sư.

²⁵Truh pơgê, na băt kơ Lêa, Jakôp jet La'ban dơ̆ng: Lơliơ mih hơlĕnh kơ inh?

²⁶La'ban tơl: Tơdrong juăt nhôn thoi âu, ưh kơ gơh ăn oh hơdruch đei klo adrol kơ mŏ ôh.

²⁷Oei hơdai bĕ hăm mŏ lăm minh 'măng giĕng, đơ̆ng noh inh gô ăn hloi oh dai; gah oh noh kon athei jang tơgŭm mih pă tơpơh sơnăm dơ̆ng 'mơ̆i.

²⁸Jakôp chu kiơ̆ nơ̆r mih na oei hơdai Lêa truh minh 'măng giĕng, đơ̆ng noh La'ban rôp ăn Rachel, kon hơdruch sư kơ Jakôp.

²⁹Păng kư̆m jao đam sư Bila kiơ̆ awih awăn kơ Rachel kon adruh sư.

³⁰Jakôp oei hơdai Rachel, sư hưch kơ Rachel hloh kơ Lêa. Thoi noh sư jang tơgŭm hnam dơnŏ La'ban thim tơpơh sơnăm dơ̆ng.

³¹Kră Yang 'bôh Jakôp ưh kơ 'mêm kơ Lêa, ăn kơ sư đei pơjing hơ'lơ̆p, gah Rachel hơwŏng hơwŏ.

³²Lêa anăp tơpŭ kơ minh 'nu kon drŏ-nglo krao anăn sư Rubên, a yua kơ đei khan Kră Yang 'bôh tơdrong inh pơmat-tat; na dang ei klo inh gô 'mêm hưch kơ inh.

³³Sư đei anăp dơ̆ng tơpŭ kơ minh 'nu kon drŏ-nglo dơ̆ng, anăn sư Simêôn;b păng khan thoi âu; Kră Yang kơtơ̆ng păng băt kơ klo inh ưh kơ 'mêm kơ inh, na ăn thim kơ inh kon 'nâu.

³⁴Sư đei anăp dơ̆ng kư̆m tơpŭ kơ minh 'nu kon drŏ-nglo, sư khan thoi âu: Đơ̆ng âu kơnh klo inh gô bơwei inh, yua kơ inh đei pơjing ăn kơ sư đei pêng 'nu kon drŏ-nglo boih; yua kơ thoi noh na krao anăn kon sư Lêwi.c

³⁵Sư anăp dơ̆ng, tơpŭ kơ minh 'nu kon drŏ-nglo păng khan thoi âu: Dang ei inh bơnê kơ Kră Yang, yua kơ thoi noh na krao anăn kon sư noh Juđa.d Đơ̆ng noh lăm hơdôm sơnăm sư ưh pă đei anăp dơ̆ng.