Read bahnar Bl 30 Bible Online

Bl 30 - bahnar bible

Bl 30

¹Rachel lăng 'bôh kơdih akâu ưh kơ đei pơjing kon hơ'lơ̆p ăn kơ Jakôp, na lăm jơhngơ̆m sư areh kơ mŏ sư Lêa, sư khan kơ Jakôp thoi âu: Ăn bĕ kơ inh đei hơ'lơ̆p, tơdah ưh, inh lôch.

²Jakôp hil kơ Rachel păng khan: Inh Kră Yang 'Bok Kei-Dei hă na gơh ăn kơ e tơpŭ kon?

³Rachel tơl: Âu đam inh Bila, oei kơ sư bĕ, wă kơ sư đei pơjing kon hơ'lơ̆p tơplih kơ inha wă kơ inh kư̆m đei kon đơ̆ng sư.

⁴Thoi noh Rachel ăn Bila oei kơ Jakôp, na Jakôp oei.

⁵Bila anăp tơpŭ ăn minh 'nu kon drŏ-nglo kơ Jakôp.

⁶Rachel khan: Kră Yang 'Bok Kei-Dei sek tơlang tơpăt kơ inh, mơ̆ng nơ̆r inh krao apinh, na ăn kơ inh đei minh 'nu kon drŏ-nglo: Yua kơ thoi noh na krao anăn Đan.b

⁷Bila đam Rachel anăp dơ̆ng păng tơpŭ ăn kơ Jakôp kon drŏ-nglo mă 'bar.

⁸Rachel khan thoi âu: Inh adrin đĭ jơhngơ̆m blah mŏ inh, na dang ei jei inh boih; yua kơ thoi noh, sư anăn kon drŏ-nglo noh Neptali.c

⁹Lêa 'bôh kơdih akâu ưh pă đei pơjing kon boih, na rôp Silpa; đam sư pơm akăn Jakôp.

¹⁰Silpa, đam Lêa đei tơpŭ ăn kơ Jakôp minh 'nu kon drŏ-nglo.

¹¹Lêa khan, Pŭn pă băt dang yơ! Đơ̆ng noh sư anăn kon sư noh Gat!d

¹²Silpa, đam Lêa, tơpŭ kơ minh 'nu kon drŏ-nglo mă 'bar dơ̆ng ăn kơ Jakôp.

¹³Na Lêa khan thoi âu: Inh hiôk chơt dêh pă băt dang yơ! Yua kơ lăm lu drŏ-kăn khan inh đei pŭn tơpă. Yua kơ thoi sư anăn kon mă 'bar noh Aser.e

¹⁴Lăm bơyan kĕch 'ba mi, Rubên năm tơ bri 'bôh lu plei hơra brif chĕp ba ăn kơ mĕ sư Lêa. Rachel khan kơ Lêa thoi âu: Apinh mŏ asong inh plei 'long mă kon mŏ đei noh.

¹⁵Lêa tơl: Tơgar iŏk klo inh 'nâu tơdrong iĕ đĕch hă? Na e 'maih iŏk plei 'long hơra bri đơ̆ng kon inh dơ̆ng? Rachel khan thoi âu: Kư̆m bưh, klo ba gô oei hơdai hăm mŏ kơnh, tơplih ăn kơ inh plei 'long mă kon ih đei noh.

¹⁶Truh kơsơ̆ Jakôp brŏk đơ̆ng mir, na Lêa dơ̆ng 'bơ̆t anăp sư păng khan: Ih athei năm tơ inh, yua kơ inh đei tơplih boih hăm plei 'long đơ̆ng kon inh dônh wă kơ đei ih. Thoi noh lăm măng noh sư 'bĭch hơdai hăm Lêa.

¹⁷Kră Yang 'Bok Kei-Dei tơl nơ̆r Lêa apinh, Lêa tơpŭ dơ̆ng kon drŏ-nglo mă pơđăm kơ Jakôp,

¹⁸Sư khan: Kră Yang 'Bok Kei-Dei 'mong păng ăn kơ inh, yua kơ inh đei ăn đam inh kơ klo inh, thoi noh sư anăn kon drŏ-nglo noh Isakar.g

¹⁹Lêa anăp dơ̆ng tơpŭ ăn kon drŏ-nglo mă tơdrâu kơ Jakôp.

²⁰Na khan: Kră Yang 'Bok Kei-Dei ăn kơ inh minh anăn tơmam gĭt tơpă; đơ̆ng âu kơnh klo inh gô 'mêm kơ inh hloh oei păng inh, yua kơ inh tơpŭ ăn kơ sư tơdrâu 'nu kon drŏ-nglo boih. Sư krao anăn kon sư âu Sabulôn.h

²¹Đơ̆ng rŏng noh sư tơpŭ kơ minh 'nu kon drŏ-kăn, anăn sư Đina.

²²Kră Yang 'Bok Kei-Dei 'blŏk dơ̆ng kơ Rachel, na Sư mơ̆ng nơ̆r sư apinh păng ăn kơ sư đei hơ'lơ̆p.

²³Sư anăp, tơpŭ kơ minh 'nu kon drŏ-nglo păng khan: Kră Yang 'Bok Kei-Dei ôp lê̆ boih tơdrong mơlâu đơ̆ng inh;

²⁴na sư krao anăn kon drŏ-nglo sư noh Jôsep.i Sư khan dơ̆ng thoi âu: Apinh Kră Yang thim ăn kơ inh pă minh 'nu kon drŏ-nglo dơ̆ng!

²⁵Đơ̆ng rŏng kơ Rachel tơpŭ boih kơ Jôsep, na Jakôp khan kơ mih sư La'ban thoi âu: Apinh ih ăn kơ inh pơdơh, wă kơ inh brŏk wih tơ tơring nhôn.

²⁶Apinh ih jao ăn kon akăn inh kơ inh, yua kơ đei lu sư noh na inh jang tơgŭm ih thoi noh.

²⁷La'ban tơl sư: Apơi rŏ kơ inh đei pŭn hiôk đơ̆ng mon! Inh tơchĕng băt nhen yua kơ đơ̆ng mon mă Kră Yang đei ăn kơ inh pŭn hiôk noh.

²⁸Sư khan dơ̆ng, mon khan bĕ dôm yơ inh gô ăn?

²⁹Jakôp tơl: Ih băt kơ inh jang tơgŭm ih thoi yơ păng đơ̆ng jơ̆ng ti inh na kon sem dơrong ih thoi yơ?

³⁰Adrol kơ inh truh, kon sem dơrong ih tŏ sĕt đĕch, mă-lei na đơ̆ng năr inh jang na đei rai lơ tơpă. Kră Yang đei tuh ăn pŭn hiôk kơ inh iŏk đơ̆ng năr inh juă jơ̆ng mơ̆t oei tơ lăm hnam âu; băt dang yơ inh gô pơjing sa hnam kơdih.

³¹La'ban tơl: Mih ăn kơ mon kiơ dang ei? Jakôp drơ̆ng: Ưh kơ đei ăn kiơ ôh. Tơdah lăp thoi nơ̆r âu, inh gô wei păng năm pơsa lu kon sem dơrong ih dơ̆ng!

³²Năr âu inh năm chă lăng khŭl triu păng bơbe ih; lăm khŭl triu dah bơbe, bơbe dah triu ayơ sŏk 'brông, hơglŭk hơglăk, hăm lu bơbe triu sŏk găm inh lê̆ pha; noh boih tơmam wă apah inh.

³³Na ih năm lăng lăng tơmam ih apah, jơhngơ̆m tơpăt inh gô pơm kơdranh 'bơ̆t anăp mih. Tơdah gah inh bơbe dah triu ayơ mă ưh kơ 'brông dah ưh kơ đei sŏk găm, gô jô̆ inh tơtông.

³⁴La'ban tơl: Kŭm bưh kiơ̆ thoi nơ̆r đei khan.

³⁵Lăm năr noh hloi, La'ban klah lê̆ pha lu bơbe tơno 'brông, lu bơbe yŏng đei 'brông hơglŭk hơglăk, lu ayơ mă đei trong kok păng lu kon triu mă đei sŏk găm, jao ăn kơ kon drŏ-nglo sư.

³⁶Đơ̆ng noh bre sư tơklah ataih dang pêng năr kơ trong yak; Jakôp wei-lăng kon sem dơrong La'ban mă oei oei.

³⁷Đơ̆ng noh, Jakôp iŏk dơng 'long hơngo, hơmu, 'long krăk lŏng kơđoh lê̆ kok lăm.

³⁸Sư dan lê̆ lu dơng 'long mă đĭ lŏng kơđoh boih hơtat lăm bơng 'bơ̆t anăp lu triu, anih mă lu triu juăt kơ năm nhă mưh lu sư năm nhă na lu triu tơno kiơ̆.

³⁹Lu triu lăng 'bôh lu dơng 'long noh na kơplah lu sư tơkiơ̆ băl na lu sư su kon tă kơ 'brông ngăl, đei trong, đei 'brông hơglŭk hơglăk.

⁴⁰Jakôp 'măn lê̆ pha lu kon triu sư đơ̆ng noh achăng lu yŏng sư kiơ̆ khŭl triu La'ban 'bơ̆t anăp lu triu tơno đei trong 'brông păng găm; lu khŭl triu mă lê̆ pha, ưh kơ tah hơdai jê̆ triu La'ban.

⁴¹Mưh rim wơ̆t lu triu bek kiơ̆ akăn, na Jakôp dan lu dơng 'long noh 'bơ̆t ala tơklă măt lăm bơng đak nhă, wă kơ lu triu lăng tơ dơng 'long noh na kiơ̆ akăn.

⁴²Mă-lei kơplah lu yŏng hơkĕ, sư ưh kơ dan dơng 'long thoi noh, lei na lu triu hơkĕ noh lê̆ kơ La'ban, gah lu triu kok pran noh gah Jakôp.

⁴³Yua kơ thoi noh sư mă mơdrŏng dêh, đei lơ sem dơrong, đĭch drŏ-nglo, đam drŏ-kăn, lăk-đa păng aseh iĕ.