Read bahnar Bl 33 Bible Online

Bl 33 - bahnar bible

Bl 33

¹Jakôp tơmang lăng 'bôh Êsâu, chông ba puăn-hrĕng 'nu năm wă jê̆ truh. Jakôp klah asong kon sư kiơ̆ Lêa, Rachel păng ăn kơ bre đam;

²Săp pơrĕng đam hăm lu kon bre sư adrol; đơ̆ng noh Lêa păng kon sư, Rachel hăm Jôsep hơtuch.

³Gah sư, năm adrol drap kơkuh tơpơh wơ̆t tơ teh, dĭng truh tơ jê̆ 'nhŏng sư

⁴Mă-lei Êsâu kơdâu truh 'bơ̆t anăp sư, tơkan kuăr chŭm hloi, na pơđĭ kơ măr sư nhơ̆m.

⁵Đơ̆ng noh Êsâu hue lăng 'bôh lu drŏ-kăn păng lu hơ'lơ̆p apinh lu đe bu to mă kiơ̆ oh noh? Sư tơl: Lu kon hơ'lơ̆p inh đĭch đam 'nhŏng mă đơ̆ng Kră Yang 'Bok Kei-Dei ăn.a

⁶'Bar 'nu đam sư păng lu kon sư năm jê̆ Jakôp kư̆m drap kơkuh.

⁷Lêa păng lu kon sư kư̆m năm jê̆ na drap kơkuh, đơ̆ng noh Rachel hăm kon sư Jôsep kư̆m năm jê̆ na drap kơkuh.

⁸Êsâu apinh: Khŭl bơngai mă 'nhŏng đei tơ'bơ̆p hei noh. Oh wă pơm kiơ? Sư tơl: Noh wă apinh tơdrong mơnat đơ̆ng ih kơdră inh.

⁹Êsâu khan: “Oh, 'nhŏng đei tôm mah boih; thoi noh pơdrâu bĕ kơ oh dôm tơmam oh noh hei.”

¹⁰Jakôp tơl thoi âu: Ưh ôh, apinh 'nhŏng iŏk bĕ dôm tơmam oh pơyơ̆r kơ 'nhŏng noh đơ̆ng jơ̆ng ti oh jang; yua kơ 'bôh tơ'bơ̆p muh măt 'nhŏng thoi 'bôh muh măt Kră Yang 'Bok Kei-Dei mơ̆n; păng 'nhŏng đei jơhngơ̆m hiôk sơng iŏk nhôn.

¹¹Apinh 'nhŏng iŏk bĕ dôm tơmam mă oh đei pơyơ̆r ăn kơ 'nhŏng, yua kơ Kră Yang 'Bok Kei-Dei đei tơgŭm boih oh đei jang sa pŭn păng đei tôm mah rơkah kơ yua. Jakôp apinh lung 'bơ'bel athei iŏk, na Êsâu chu iŏk.

¹²Êsâu khan: Âu bĕ bơ̆n yak! 'Nhŏng gô yak adrol kơ oh.

¹³Jakôp tơl: Ơ 'nhŏng, Ih băt boih kơ lu hơ'lơ̆p oei 'lơ̆p dêh; păng oh oei chă chơng lăng lu triu păng rơmo yŏng mă kon sư oei mŏm; tơdah bơ̆n yak năm dơ̆ng pă minh năr lei kơnh hli kơ lu sư lôch đĭ.

¹⁴Apinh ih rai yak adrol, gah inh gô yak hơdar hơdeh kiơ̆ bơrơng lu kon triu, rơmo păng lu hơ'lơ̆p 'nâu, dĭng truh tơ hnam ih tơ tơring Sir.

¹⁵Êsâu khan: Thoi ei, 'nhŏng lê̆ hơya minh 'bar 'nu bơngai gô yak hơdai oh, Jakôp khan: Ngĕ kiơ kơ lei huay ôh, 'nhŏng đei jơhngơ̆m 'mêm kơ oh, 'noh gĭt dêh bơih!

¹⁶Kŭm lăm năr noh Êsâu wih brŏk tơ kông Sir.

¹⁷Jakôp yak truh tơ Sukôt, na sư pơm hĭ minh pôm hnam kơ sư kơdih oei păng dôm tŏ hơdrong kơ lu kon sem dơrong sư na sư anăn anih noh Sukôt.b

¹⁸Jakôp đơ̆ng tơring Phadan Aram truh tơ pơlei Sichem, lăm dêh char Kanaan; hiôk-hian. Sư pơm anih anăp pơlei tih Sichem.

¹⁹Sư kư̆m răt hloi teh 'bơ̆t anih sư oei pơm hnam, minh-hrĕng hlak jên hu đơ̆ng lu 'nhŏng oh Sichem kon drŏ-nglo Hamôr.

²⁰Tơ anih noh sư pơm chơnang soi, sư anăn Êl Êlôhe Isơraelc