Read bahnar Bl 34 Bible Online

Bl 34 - bahnar bible

Bl 34

¹Lăm minh năr Đina, kon adruh Lêa hăm Jakôp, năm chă ngôi hơdai lu buăl tơ lăm tơring noh.

²Sichem kon tơdăm pơtao Hamôr, bơngai Hêwit, 'bôh adruh noh, na rôp pơgŏ iŏk 'bĭch hơdai păng pơm kư̆ kă.

³Jơhngơ̆m Sichem hưch kơ Đina, sư pơlung pơhlŭ dang đak sut đak kơdrot pơma hăm adruh noh.

⁴Sichem apinh 'bă sư, Hamôr thoi âu: Rôp ăn kơ inh Đina wă pơm akăn.

⁵Na Jakôp kơtơ̆ng Sichem pơm kơnê̆ glăi hăm Đina kon adruh sư, mă-lei sư kư̆ ngăn dĭng mă lu kon drŏ-nglo sư brŏk. Lu kon drŏ-nglo sư oei tơ bri yua kơ oei wei rong lu kon sem dơrong,

⁶Kơplah noh, Hamôr păng Sichem, năm tơ Jakôp wă pơma dơnuh tơdrong noh.

⁷Lu kon drŏ-nglo Jakôp brŏk đơ̆ng bri, lu sư 'nao băt tơdrong noh, na lu sư hil hơwĕng dêh; yua kơ tơdrong pơ'brơh pơm kơnê̆ kơ adrĕch adrung Isơrael, 'bĭch hơdai hăm kon adruh Jakôp, noh jơ̆ tơdrong lu sư ưh kơ wă kơ đei thoi noh.

⁸Hamôr pơma dơnuh hăm lu sư thoi âu: Jơhngơ̆m Sichem, kon tơdăm inh, đei tơ'bưh boih hăm kon adruh lu iĕm; apinh ăn kơ sư oei kơ oh lu iĕm, pơm akăn sư.

⁹Wă kơ bơ̆n jing pô̆ 'băn, rui-ra; lu iĕm rôp ăn kơ kon adruh iĕm klo đơ̆ng nhôn, lu nhôn kư̆m rôp ăn akăn kơ kon nhôn đơ̆ng iĕm;

¹⁰oei hơdai bĕ hăm nhôn! Tơring âu kư̆m asong ăn kơ lu iĕm; oei bĕ, mơdro mơchan, jang sa pơjing anih-anơ̆m tơ noh.

¹¹Sichem tơl 'bă hăm lu 'nhŏng oh bơngai adruh noh thoi âu: Apinh tơdrong mơnat đơ̆ng iĕm păng tơdrong kiơ mă lu iĕm pơma khan inh chu kiơ̆.

¹²Apinh bĕ tơmam et sa kơ pơkong mă tih, tơmam pơsĭt mă lơ, inh gô ăn kiơ̆ kơ nơ̆r lu iĕm apinh; kư̆ mă iĕm ăn adruh oh iĕm noh jing akăn inh.

¹³Lu kon drŏ-nglo tơl nơ̆r Sichem păng Hamôr, 'bă sư, lu sư chă đon na pơma kơ lu đe noh, yua kơ Sichem pơ'brơh boih kơ Đina, oh lu sư.

¹⁴Lu sư khan thoi âu: Lu nhôn ưh kơ gơh ôh chă ăn klo kơ oh lu nhôn bơngai mă ưh kơ kăt tơdra akar, yua kơ gô pơm ăn kơ lu nhôn mơlâu pă băt.

¹⁵Lu nhôn gơh chu drơ̆ng nơ̆r iĕm, tơdah lu iĕm iŏk mă jing thoi nhôn 'mơ̆i, wă khan đĭ-đăng kon drŏ-nglo athei kăt tơdra akar.

¹⁶Thoi noh na nhôn gơh ăn kon adruh lu nhôn oei chă klo đơ̆ng lu iĕm păng kư̆m gơh iŏk akăn đơ̆ng lu kon adruh iĕm; na lu bơ̆n gô oei hơdai, jing minh pôm kon pơlei đĕch.

¹⁷Dah lu iĕm ưh kơ mơ̆ng kiơ̆ nơ̆r lu nhôn păng ưh kơ chu kăt tơdra akar, lei lu nhôn pơdrâu iŏk kon adruh lu nhôn, na lu nhôn gô năm oei tơ nai.

¹⁸Dôm nơ̆r lu sư pơma kư̆m pơm ăn kơ Hamôr păng Sichem lăp đon.

¹⁹Tơdăm mơlôh noh ưh kơ đei kơdŭn mă dôm lu nơ̆r đe noh khan pơkă, yua kơ kon adruh Jakôp noh sư hưch wă lăp dêh boih. Na, sư âu jơ̆ minh 'nu kon drŏ-nglo mă gĭt lăm hnam dơnŏ sư.

²⁰Thoi noh Hamôr păng Sichem, kon tơdăm sư, năm truh tơ 'măng dur pơlei sư păng khan kơ lu kon pơlei sư thoi âu:

²¹Lu bơngai noh sư oei hiôk hơiă hăm lu bơ̆n; thoi noh na ăn kơ lu sư oei lăm char âu chă mơdro sa. Âu, char kư̆m rơhơi asong kơ lu sư oei; lu bơ̆n kư̆m gô chă ŭnh om, oei kơ kon adruh lu sư păng kư̆m ăn kon adruh lu bơ̆n chă klo đơ̆ng lu sư.

²²Mă-lei lu sư wă oei minh jơhngơ̆m hăm lu bơ̆n jing minh pôm kon pơlei kư̆ mă lu kon drŏ-nglo bơ̆n chu kăt tơdra akar, kư̆m thoi lu kon drŏ-nglo lu sư mơ̆n.

²³Lei mă dôm lu sem dơrong, dôm lu mŭk tơmam lu sư noh ưh kơ jing tơmam bơ̆n hơdai dah kiơ? Bĕ lu bơ̆n chu kiơ̆ dôm tơdrong sư khan noh, wă kơ lu sư oei hơdai bơ̆n.

²⁴Đĭ-đăng kon pơlei lĕch năm tơ 'măng jang pơlei kơtơ̆ng păng kiơ̆ nơ̆r Hamôr păng Sichem kon tơdăm sư, na đĭ-đăng lu bơngai drŏ-nglo lĕch tơ 'măng jang pơlei ei na kăt tơdra akar.

²⁵Truh năr mă pêng, kơplah lu bơngai oei jĭ, na 'bar 'nu kon tơdăm Jakôp, Simêôn păng Lêwi, 'nhŏng Đina, chĕp minh 'nu minh hlak đao, lăp lu sư oei hreh ngeh kơ oei hiôk đĕch, na mơ̆t hloi lăm pơlei pơlôch đĭ kon drŏ-nglo.

²⁶Bre sư 'bet pơlôch Hamôr păng Sichem, kon tơdăm sư, iŏk oh bre sư Đina wih đơ̆ng hnam Sichem, na yak tơ nai.

²⁷Yua kơ đơ̆ng lu đe noh pơm kơnê̆ pơ'brơh kơ oh lu sư, kon adruh Jakôp, lu kon drŏ-nglo lu sư mơ̆t tơ lu bơngai lôch ei hơloh năm blah iŏk tơmam pơlei;

²⁸Rôp lu triu, rơmo, aseh, iŏk tơmam kiơ mă kon pơlei đei lăm pơlei dah tơ bri.

²⁹Blah iŏk pơđĭ mŭk măk tơmam, lu kon hơ'lơ̆p lu drŏ-kăn kră, hăm dôm tơmam kiơ mă oei lăm hnam.

³⁰Na Jakôp khan kơ Simêôn păng Lêwi thoi âu: Măr iĕm pơm kiơ kơ inh ưh kơ hiôk, pơm ăn kơ kon tơring âu. Bơngai Kanaan păng bơngai Phêrêsit, hil areh kơ bơ̆n. Bơ̆n âu, tŏ sĕt bơngai; dah lu sư akŭm băl blah bơ̆n inh păng hnam dơnŏ bơ̆n gô răm.

³¹Bre sư tơl: Lu nhôn kĕ ĕnh hă lu sư pơm pơ'brơh kơ oh drŏ-kăn lu nhôn thoi bơngai đi?