Read bahnar Bl 35 Bible Online

Bl 35 - bahnar bible

Bl 35

¹Kră Yang 'Bok Kei-Dei khan kơ Jakôp thoi âu: Iung bĕ, weh năm tŏk oei tơ Bethel. Păng pơdơ̆ng tơ noh minh pôm chơnang soi ăn kơ Kră Yang 'Bok Kei-Dei, Kră Yang mă đei tơ'bôh boih kơ ih kơplah ih kơdâu ôn kơ Êsâu 'nhŏng ih.

²Jakôp sư roi hloi kơ kon akăn sư hăm lu bơngai năm hơdai sư thoi âu: Hŭt lê̆ bĕ dôm lu rup man pơm yang đơ̆ng lu dêh tơmoi, na hum 'nhao wă kơ bơ̆n rơgoh 'lơ̆ng păng tơplih bĕ hơbĕn ao iĕm.

³Klaih kơ noh bơ̆n iung, yak năm tơ Bethel, tơ anih noh inh gô pơm minh pôm chơnang soi kơ Kră Yang 'Bok Kei-Dei, Yang mă đei tơl tơwih kơ inh năr inh đei tơdrong hli krưp păng Yang mă đei tơgŭm inh lăm năr inh oei yak rok trong.

⁴Na lu sư jao đĭ kơ Jakôp lu rup yang dêh tơmoi, mă khan lu le đoh kơ đon; na sư 'bŭ dôm tơmam noh ala tơm 'long kôih, jê̆ pơlei Sichem.

⁵Đơ̆ng noh lu sư pơtơm yak, Kră Yang 'Bok Kei-Dei pơm ăn kơ rim pơlei tăp dăr kơ noh đei tơdrong hli krưp, na lu đe huay kơ druh lu đe Jakôp.

⁶Jakôp hăm lu bơngai mă kiơ̆ sư truh tơ Lus noh pơlei Bethel lăm dêh Kanaan.

⁷Jakôp pơm tơ noh minh pôm chơnang soi, sư anăn anih âu El Bethela Yua kơ tơ âu Kră Yang 'Bok Kei-Dei tơ'bôh akâu Sư kơ Jakôp 'bơ̆t năr sư kơdâu đơ̆ng 'nhŏng sư Êsâu.

⁸Kơplah noh Đêbôra, yă rong Rê'bêka, lôch 'bŭ 'bơ̆t tơm 'long kôih tơ pơlei Bethel đe krao anăn Alôm-Bakut.b

⁹Kơplah lu sư truh đơ̆ng Phadan Aram. Kră Yang 'Bok Kei-Dei tơ'bôh akâu Sư kơ Jakôp dơ̆ng păng ăn tơdrong pŭn hiôk kơ sư.

¹⁰Păng khan thoi âu: Anăn ih Jakôp, dơning dơmônh ưh pă krao anăn Jakôp dơ̆ng boih, mă-lei krao anăn Isơrael. Thoi noh na Kră Yang 'Bok Kei-Dei anăn sư Isơrael.

¹¹Kră Yang 'Bok Kei-Dei khan dơ̆ng thoi âu: Inh boih Kră Yang 'Bok Kei-Dei mơsêh mơyang, ih athei pơjing kon hơ'lơ̆p mă rai lơ; jing minh adrĕch adrung kơdrâ̆m păng lơ adrĕch adrung gô đơ̆ng ih, kư̆m đơ̆ng adrĕch adrung ih gô đei lu pơtao.

¹²Char inh mă đei ăn boih kơ Abraham păng Isăk na Inh gô ăn kơ ih păng lu adrĕch adrung ih.

¹³Đơ̆ng noh Kră Yang 'Bok Kei-Dei tŏk wih đơ̆ng anih mă sư đei pơma hăm Jakôp.

¹⁴Jakôp pơdơ̆ng hloi minh pôm jrăng tơmo tơ anih mă Kră Yang 'Bok Kei-Dei đei pơma dơnuh hăm sư tuh pơyơ̆r sik păng đak rơmă kơpal noh.

¹⁵Na Jakôp krao anih mă Kră Yang 'Bok Kei-Dei pơma dơnuh hăm sư noh Bethel.c

¹⁶Oei đơ̆ng Bethel năm wă jê̆ Êphrat dang minh 'bar măng kơ trong, na Rachel hơiơch kơ Bênjamin, gah tơdrong sư hơiơch noh sư đei jĭ pơmat dêh.

¹⁷Kơplah sư tơpŭ anat thoi noh, yă kơ'mĭn sư khan thoi âu: 'Nĕ kơ hli, yua kơ âu ih đei tơpŭ kon drŏ-nglo dơ̆ng.

¹⁸Kơplah Rachel wă kơtĕch jơhngơ̆m, lap săi kơ lai na sư anăn kon sư noh Bên Ônid 'bă sư krao anăn Bênjamin.e

¹⁹Đơ̆ng noh Rachel sư lôch, na 'bŭ 'bơ̆t cheng trong brŏk tơ Êphrat. Êphrat wă khan Betlehem.

²⁰Jakôp pơdơ̆ng minh pôm tơmo 'bơ̆t kơ̆l, noh boih bơsat Rachel, tơmo pơdơ̆ng kơ̆l bơsat Rachel oei truh tơ dang ei.

²¹Đơ̆ng noh Isơrael yak, năm pơm anih oei tơ 'nguaih thôt Êder.

²²Kơplah, lu đe Isơrael oei tơ dêh noh, na Rubên đei năm 'bĭch hơdai Bila, akăn kơnhŏng 'bă sư; Isơrael băt tơdrong noh.

²³'Nâu Jakôp sư đei mơjĭt-'bar 'nu kon drŏ-nglo: Kon Lêa: Rubên, sư kon kơdră Jakôp, đơ̆ng noh Simêôn, Lêwi, Juđa, Isakar păng Sabulôn.

²⁴Kon Rachel: Jôsep păng Bênjamin.

²⁵Kon Bila đam Rachel noh Đan păng Neptali.

²⁶Păng kon Silpa đam Lêa, noh Gat păng Aser. Noh boih kon drŏ-nglo Jakôp đei tơpŭ tơ Phadan Aram.

²⁷Jakôp truh tơ Isăk, 'bă sư, tơ Mamrê jê̆ pơlei Kiriat, wă khan Hêbrôn, anih pơlei mă bre Abraham păng Isăk oei.

²⁸Isăk arih đei minh-hrĕng tơhngam-jĭt sơnăm.

²⁹Sư arih sot, sư arih hrăp boih lăm chăl arih sư, na kơtĕch jơhngơ̆m kiơ̆ yă 'bok. Êsâu păng Jakôp 'bar 'nu kon drŏ-nglo sư 'bŭ 'bă bre sư.