Read bahnar Bl 37 Bible Online

Bl 37 - bahnar bible

Bl 37

¹Jakôp oei lăm char mă 'bă sư đei oei boih, noh dêh char Kanaan.

²'Nâu roi tơdrong adrĕch adrung Jakôp. Jôsep sư mơjĭt-tơpơh sơnăm, sư wei triu hơdai hăm lu đe 'nhŏng oh sư, sư pơm buăl juăt hăm lu kon Bila hăm kon Yilpa, 'bar 'nu akăn kơnhŏng 'bă sư. Jôsep sư roi kơ 'bă sư tơdrong lu đe noh pơm kơnê̆.

³Isơrael 'mêm kơ Jôsep hloh kơ lu kon drŏ-nglo sư nai, yua kơ hơiơch kơ Jôsep tơpo sư kră boih. Na sĭt ăn kơ sư ao tai đei lơ brông.

⁴Lu 'nhŏng sư 'bôh 'bă sư 'mêm kơ Jôsep hloh kơ lu sư, na lu sư đei jơhngơ̆m klai monh kơ Jôsep, đơ̆ng noh ưh pă gơh pơma pơ'lơ̆ng hăm sư dơ̆ng.

⁵Jôsep đei tep apo; na roi ăn kơ lu 'nhŏng oh sư mơ̆ng lu 'nhŏng sư rai blĕk kơ sư dêh. Đơ̆ng noh sư roi thoi âu: Inh đei tep apo 'bôh,

⁶“Apinh lu iĕm mơ̆ng inh roi.”

⁷Lu bơ̆n oei lăm mir chô̆ 'ba hơchô̆ 'ba inh oei dơ̆ng, mă lu hơchô̆ 'ba iĕm năm drap tăp dăr kơ hơchô̆ 'ba inh, drap pơđĭ 'bơ̆t anăp hơchô̆ 'ba inh.

⁸Na lu 'nhŏng sư tơl: Lei e gô pơm yŏng lu bơ̆n hă? Lu 'nhŏng sư rai blĕk dêh yua kơ đơ̆ng sư apo noh.

⁹Jôsep tep apo dơ̆ng, roi dơ̆ng kơ lu 'nhŏng oh sư thoi âu: Inh oei đei apo pă minh dơ̆ng: 'Nâu đei măt 'năr, măt khei păng mơjĭt-mônh tŏ sơnglŏng đĭ-đăng tă kơ drap kơkuh 'bơ̆t anăp inh!

¹⁰Sư roi tơdrong apo noh kơ 'bă sư păng lu 'nhŏng oh sư mơ̆ng; 'bă sư hil păng khan thoi âu: Tơdrong e apo noh wă khan thoi yơ? Hăm trŏ kơ inh hăm mĕ e păng lu 'nhŏng oh e gô drap kơkuh 'bơ̆t anăp e hă?

¹¹Lu 'nhŏng sư blĕk kơ sư rai dêh. Gah 'bă sư răp gô lăng tơdrong noh.

¹²Lu 'nhŏng sư oei wei triu tơ bri tơmăn Sichem.

¹³Isơrael khan kơ Jôsep thoi âu: Lu 'nhŏng e oei wei triu tơ Sichem năm tơ âu, inh wă wơh kon năm tơ lu sư. Jôsep tơl: Đei inh tơ âu:

¹⁴Isơrael khan: E năm lăng lu 'nhŏng e thoi yơ păng lu khŭl triu hai liơ? Na brŏk roi kơ inh băt. Thoi noh na đơ̆ng lăm thŭng Hêbrôn, sư athei Jôsep năm tơ Sichem, Jôsep truh tơ Sichem.

¹⁵Đei minh 'nu tơ'bơ̆p sư wơ̆l lăm mir păng jet sư thoi âu: Ih chă kiơ?

¹⁶Inh chă lu đe 'nhŏng inh, apinh ih tơ'bôh ăn kơ inh lu sư wei triu tơ yơ?

¹⁷Bơngai ei khan: Lu 'nhŏng ih weh tơ nai boih, inh đei kơtơ̆ng lu sư khan: Bĕ bơ̆n năm tơ Dôthan. Thoi noh Jôsep chơchă lu 'nhŏng sư tơ Dôthan.

¹⁸Lu 'nhŏng sư tơmang 'bôh sư oei ataih, lu sư pơđâu wă pơlôch Jôsep.

¹⁹Lu sư pơma tơduă lu sư thoi âu: To! Bơngai mă tep apo truh boih to!

²⁰Dang ei thoi âu: Bĕ lu bơ̆n pơlôch sư, na gô klơ̆m lê̆ lăm sơlŭng đak ayơ ayơ na lu bơ̆n gô khan thoi âu: Đei lu sem bri châu sa sư, đơ̆ng noh bơ̆n gô lăng tơdrong apo sư noh gô jing thoi yơ?

²¹Rubên mơ̆ng nơ̆r ei, na hloi khan kơ lu 'nhŏng oh sư, wă pơklaih oh sư; lu bơ̆n 'nĕ kơ pơlôch sư;

²²Sư khan dơ̆ng lu bơ̆n 'nĕ kơ pơm truh pham lĕch; iŏk rôp klơ̆m lê̆ sư tơ lăm sơlŭng đĕch păng bơ̆n 'nĕ kơ pơrăm lê̆ sư păng ti bơ̆n. Sư pơma thoi noh sư wă pơklaih Jôsep đơ̆ng ti 'nhŏng oh sư, wă kơ tơbrŏk tơ 'bă lu sư.

²³Jôsep 'nao wă jê̆ truh tơ lu sư. Lu 'nhŏng sư plôh lê̆ hloi ao sư, ao sư đei lơ brông đak 'brê dreng jơk kok sư oei hrŭk;

²⁴Đơ̆ng noh rôp chông ba klơ̆m lăm sơlŭng đak. Hơlŭng đak ei đĭ hrơ̆ boih.

²⁵Lu sư oei sŏng sa. Tơmang lăng 'bôh bơngai Ismaela đơ̆ng Gileat wă truh, kơpal rŏng aseh lăk-đa lu sư đei tơmam lơ dêh, pơgang 'bâu phu, jăr 'long 'bâu phu wă chĕp mơdro tơ char Êyiptơ.

²⁶Juđa khan kơ lu 'nhŏng oh sư thoi âu: Pơlôch oh bơ̆n na ôn pham sư đei yua kiơ kơ bơ̆n?

²⁷Thoi âu đĕch! Bĕ bơ̆n tĕch sư tơ lu bơngai Ismael to bơ̆n 'nĕ kơ pơrăm akâu sư, yua kơ sư oh bơ̆n, sĕch akar bơ̆n, na lu 'nhŏng oh sư chu kiơ̆ nơ̆r sư.

²⁸Thoi noh, kơplah lu bơngai Madian khŭl mơdro yak rok ei; lu 'nhŏng sư hơtŏk Jôsep đơ̆ng lăm sơlŭng đak, đơ̆ng noh tĕch lê̆ sư 'bar hlak jên hu kơ lu bơngai Ismael chông ba tơ char Êyiptơ.

²⁹Rubên hơlơ̆k dơ̆ng tơ sơlŭng đak lăng jua ưh pă 'bôh boih sư hek lê̆ ao sư kơdih.

³⁰Năm tơ lu 'nhŏng oh sư păng khan: Ôu! Bơngai 'lơ̆p tơ yơ boih! Pơm liơ 'nâu kơnh? Bê̆ inh âu wă năm tơ yơ?

³¹Lu 'nhŏng sư pơlôch minh pôm bơbe tơno, đơ̆ng noh iŏk ao Jôsep djrŭ tơ lăm pham noh.

³²Na, chĕp ba ao tai brông noh chĕp tơ'bôh kơ 'bă sư păng khan: 'Nâu tơmam mă lu nhôn đei chă 'bôh. Âu iung bĕ hăm trŏ kơ ao kon hơ'lơ̆p ih ưh?

³³Jakôp lăng păng khan: Trŏ boih noh ao kon drŏ-nglo inh kon sem bri hek sa boih! Sĭt tơpă akâu sư răm boih!

³⁴Jakôp hek lê̆ hơbĕn ao sư kơdih, sư iŏk 'bi hơbĕn păng grong sơ'ngon đunh năr kơ kon drŏ-nglo sư lôch.

³⁵Đĭ-đăng lu kon drŏ-nglo, kon drŏ-kăn ngôi tăp dăr kơ sư, pơlung ngôi apong kơ sư, mă-lei Jakôp 'bă lu sư ưh kơ chu păng khan thoi âu: Inh gô grong sơ'ngon dĭng truh lôch hơdai kon hơ'lơ̆p inh tơ lăm bơsat! Noh boih, 'bă Jôsep nhơ̆m hmoi kơ sư thoi noh.

³⁶Lu bơngai Madian mơdro noh chông ba Jôsep truh tơ dêh char Êyiptơ, tĕch sư tơ Pôtipha, yŏng linh bơngai wei Pharaôn.