Read bahnar Bl 38 Bible Online

Bl 38 - bahnar bible

Bl 38

¹Kơplah noh Juđa oei ataih đơ̆ng 'nhŏng oh sư,a oei hơdai hăm minh 'nu bơngai Ađulam, anăn Hira.

²Tơ noh Juđa 'bôh minh 'nu adruh Kanaan, kon 'bok Sua, na iŏk pơm akăn, oei hloi hăm sư.

³Sư anăp na tơpŭ kơ minh 'nu kon drŏ-nglo, krao anăn sư Er,

⁴akăn sư anăp dơ̆ng tơpŭ kơ minh 'nu kon drŏ-nglo dơ̆ng, anăn Ônan;

⁵akăn sư anăp dơ̆ng tơpŭ kơ minh 'nu kon drŏ-nglo anăn hĭ Sêla. Na kơplah akăn sư đei pơjing kơ hơ'lơ̆p ei, Juđa sư oei tơ Kêsip.

⁶Juđa rôp ăn kơ kon kơdră sư Er akăn, anăn sư Tamar.

⁷Mă-lei Er pơm kơnê̆ dêh 'bơ̆t anăp Kră Yang Kră Yang 'Bok Kei-Dei, na Kră Yang 'Bok Kei-Dei pơlôch hĭ sư.

⁸Juđa khan kơ Ônan thoi âu. To năm oei hơdai akăn 'nhŏng e, pơm buăl hăm sư kiơ̆ kơ tơdrong juăt e oh klo sư, wă pơtrơp adrĕch adrung 'nhŏng.

⁹Mă-lei Ônan băt tơdah đei kon kư̆m ưh kơ jô̆ kon sư na sư lê̆ đak lĕch tơ 'nguaih wă kơ Tamar ưh kơ đei kon hăm sư.

¹⁰Mă-lei tơdrong sư pơm thoi noh Kră Yang ưh kơ lăp đon, na Kră Yang kư̆m pơlôch sư dơ̆ng.

¹¹Đơ̆ng noh Juđa khan kơ Tamar mŏ mai sư thoi âu: Brŏk bĕ tơ hnam 'bă ih oei adro dĭng dang yơ Sêla kon drŏ-nglo inh hlôh 'mơ̆i. Yua kơ sư đei khan: Lu bơngai lăng hli kơ dơning dơmônh sư kư̆m lôch thoi bre 'nhŏng sư. Thoi noh Tamar brŏk oei tơ hnam 'bă sư.

¹²Đunh khei năr boih kon adruh Sua, akăn Juđa, lôch. Kơplah jơhngơ̆m sư dă 'biơ̆ kơ sơ'ngon boih, Juđa năm hơdai buăl sư Hira, bơngai Ađulam, yak tŏk truh tơ lu thơ̆ yuă sŏk triu sư, tơ Thimna.

¹³Lu đe tơbăt kơ Tamar mŏ mai sư khan: Tơnei ih năm tơ Thimna wă yuă sŏk triu,

¹⁴Na Tamar plôh hloi ao adro sư iŏk hloi hơdrao klơ̆p hloi muh măt sư păng pơ̆n lê̆ akâu, đơ̆ng noh tơoei 'bơ̆t 'măng jang pơlei Ênaim, trong mă năm tơ Thimna; pơm thoi noh yua kơ 'bôh Sêla 'lŏ boih, mă-lei Juđa ưh tam mă ăn oei kơ sư.

¹⁵Juđa 'bôh sư, ngeh kơ minh 'nu adruh đi, yua kơ sư gom lê̆ muh măt sư.

¹⁶Juđa năm jê̆ păng khan: Ăn bĕ kơ inh năm tơ ih, yua kơ Juđa ưh kơ băt adruh noh mŏ mai sư. Duch ei khan: Ih wă ăn kơ inh kiơ ih wă năm tơ inh?

¹⁷Sư tơl: Inh gô ăn kơ ih minh pôm bơbe lăm khŭl inh noh. Duch ei khan ih đei tơmam kiơ wă pơkăm, mă dĭng layơ bơbe noh truh?

¹⁸Sư tơl: Inh đei tơmam kiơ wă pơkăm hăm ih dang ei? Duch ei tơl: Tơmam tơdra pơsĭt, tơlei păng 'long jra mă ih chĕp tơ ti noh wă pơm kong kơnol pơsĭt. Juđa ăn hloi, na năm 'bĭch hơdai, duch ei anăp hloi đơ̆ng măr sư. Đơ̆ng noh, duch ei iung brŏk.

¹⁹Pơih lê̆ hơdrao, na iŏk hơbĕn ao adro hrŭk dơ̆ng.

²⁰Juđa gơnang kơ buăl sư bơngai Ađulam chĕp ba bơbe kon wă năm iŏk dôm lu tơmam đêl pơkăm đơ̆ng duch ei hei; mă-lei chă duch ưh kơ 'bôh.

²¹Buăl sư ei apinh anih mă duch ei oei thoi âu: Bơngai drŏ-kăn đi ki sư ngôi 'bơ̆t trong 'măng jang pơlei Ênaim tơ yơ kih? Lu sư tơl thoi âu: Tơ âu ưh kơ đei adruh đi.

²²Buăl ei wih brŏk tơ Juđa păng khan: Inh chă sư ưh kơ tơ'bơ̆p; păng lu kon pơlei pơla khan: Tơ âu ưh kơ đei minh 'nu adruh đi ôh.

²³Juđa khan: Lê̆ bưh inh đei gơih boih ră kon bơbe, mă-lei buăl chă duch ưh kơ tơ'bơ̆p thoi ei lê̆ kơ duch noh chĕp tơmam pơsĭt noh bưh, bơ̆n huay pă mơlâu boih.

²⁴Dang pêng khei đơ̆ng rŏng, đe đei roi dơ̆ng kơ Juđa thoi âu: Tamar, mŏ mai ih pơm adruh đi păng yua kơ thoi noh na sư đei anăp. Juđa khan rôp tơlĕch soh lê̆ sư bĕ.

²⁵Kơplah đe chông tơlĕch sư, na sư năm wơh bơngai khan kơ tơnei sư thoi âu: Apinh ih lăng tơmam pơsĭt, tơlei âu păng 'long jra bu âu? Inh mă đei anăp âu đơ̆ng bơngai mă đei pơkăm âu.

²⁶Juđa lăng kơnăl dôm lu tơmam noh na sư khan: Sư tơpăt hloh kơ inh, yua kơ inh ưh kơ ăn Sêla, kon tơdăm inh kơ sư, wă oei hơdai hăm sư. Đơ̆ng noh Juđa ưh pă oei hơdai hăm Tamar dơ̆ng.

²⁷Truh tơ năr sư hơiơch, âu đơ̆ng lăm klak sư đei kon kơmar.

²⁸Kơplah sư tơpŭ, đei minh 'nu lăm 'bar 'nu noh ăn ti adrol; yă kơ'mĭn ei rôp ti noh chô̆ tơlei 'brê păng khan: Bơngai âu jruh adrol.

²⁹Mă-lei sư dui tơmơ̆t lê̆ ti sư dơ̆ng, na 'bôh 'nhŏng sư jruh, yă kơ'mĭn ei khan dơ̆ng e blŭng hiah trong 'nâu! Na đe krao anăn sư Pêres.b

³⁰Đơ̆ng noh oh sư bơngai mă đei chô̆ brai 'brê tơ ti sư truh păng đe anăn sư Sêrak.c