Read bahnar Bl 40 Bible Online

Bl 40 - bahnar bible

Bl 40

¹Đang kơ dôm tơdrong noh boih, đei tơdrong truh kơ bre bơ̆jang kơ pơtao, minh 'nu lăng hơmet đak nhă, minh 'nu lăng gah tơmam sa păng pơm 'bĕng sa kơ pơtao Êyiptơ, đei pơm yoch hăm yŏng tơ'ngla sư.

²Pơtao Pharaôn blĕk dêh kơ bre sư, pơm 'bĕng păng lăng hơmet đak nhă.

³Na kư̆m wang tah bre sư hơdai lăm hnam phak mă đei tah Jôsep lăm noh.

⁴Yŏng wei-lăng hnam phak jao kơ Jôsep awih awăn kơ bre noh, bre sư oei tơ lăm hnam phak kư̆m đunh 'biơ̆.

⁵Lăm minh măng ei bơngai pôk đak nhă păng bơngai hơmet tơmam sa kơ pơtao Êyiptơ mă đe oei phak, kư̆m đei apo 'bôh, đĭ-đăng tơdrong apo bre sư noh wă tơbăt đei tơdrong kiơ truh kơdih kơdih.

⁶Dơning loh; Jôsep năm tơ bre sư, 'bôh muh măt bre sư hơ'nhŭk sơ'ngon.

⁷Na sư apinh: Năr âu liơ măr iĕm sơ'ngon thoi noh?

⁸Bre sư tơl: Nhi đei tep apo, mă ưh kơ băt wă khan kiơ. Roi bĕ tơdrong măr iĕm apo noh kơ inh mơ̆ng.

⁹Bơngai hơmet đak nhă noh roi ăn kơ Jôsep tơdrong sư apo noh thoi âu: Inh đei tep apo, inh 'bôh minh tơnơm 'long hơmu 'bơ̆t anăp inh;

¹⁰Tơm hơmu noh đei pêng tŏ dơng. 'Bôh dơng noh đei bluh tơmơ̆ng, pơkao, hơie đei plei đum hĭ.

¹¹Tơ ti inh đei chĕp kơchŏk pơtao Pharaôn, đơ̆ng noh inh phĕ chơpĕt plei hơmu noh inh pôk tơpơng ăn tơ ti Pharaôn.

¹²Jôsep khan: Tơdrong apo noh wă khan thoi âu: Pêng tŏ dơng noh wă khan pêng năr.

¹³Pă pêng năr dơ̆ng Pharaôn gô tơlĕch ih đơ̆ng hnam phak, hơlơ̆k ăn kơ ih jang thoi đêl, ih gô pôk kơchŏk Pharaôn tơpơng tơ ti sư thoi so, thoi ih đei jang pơm bơngai lăng hơmet đak nhă sơ̆.

¹⁴Kơna mưh ih đei jang dơ̆ng, ih 'blŏk kơ inh, roi ăn kơ Pharaôn gah tơdrong arih inh păng kư̆m ăn kơ inh lĕch đơ̆ng anih 'nâu.

¹⁵Yua kơ đe rôp ba inh đơ̆ng bơngai Hêbrơ păng tơ âu inh ưh kơ đei pơm yoch kiơ, mă-lei đe kư̆m tah inh lăm hnam pơmat 'nâu.

¹⁶Bơngai pơm 'bĕng 'bôh tơdrong Jôsep tơblang tơdrong apo trŏ na khan! Gah tơdrong inh đei tep apo noh thoi âu: Inh yơ̆l pêng tŏ bai 'bĕng kơpal kơ̆l inh.

¹⁷Bai mă kơpal hloh, đei tôm 'bĕng pơm ăn kơ Pharaôn; sem jruh tơ bai kơpal kơ̆l inh na sa đĭ hloi tơmam sa noh.

¹⁸Jôsep khan: Tơdrong apo noh wă khan thoi âu: Pêng tŏ bai noh wă khan pêng năr.

¹⁹Oei pă pêng năr dơ̆ng, Pharaôn sek tơlang kơ ih, athei đe atol ih tơ 'long na sem jur sa sĕch ih.

²⁰Truh tơ năr mă pêng, trŏ năr tơpŭ kơ Pharaôn, sư hơmet et sa chơt hiôk krao đĭ lu 'bok tih păng tơlĕch hloi 'bok lăng hơmet đak nhă hăm 'bok pơm 'bĕng đơ̆ng hnam phak.

²¹Pharaôn pôk ăn kơ bơngai mă lăng hơmet đak nhă jang thoi đêl ki sơ̆, wă kơ bơngai 'nâu pôk glơng đak nhă tơ sư thoi so;

²²mă-lei kư̆m athei đe chô̆ atol 'bok pơm 'bĕng, trŏ thoi nơ̆r Jôsep đei tơblang.

²³Đơ̆ng noh bơngai mă lăng pôk đak nhă kư̆m đĭ hiơt kơ Jôsep boih, pă 'blŏk kơ Jôsep dơ̆ng.