Read bahnar Bl 43 Bible Online

Bl 43 - bahnar bible

Bl 43

¹Na, tơdrong pơngot rơwĕt rai dêh lăm char sư.

²Phe 'ba hnam dơnŏ sư sŏng sa đĭ boih phe 'ba mă đơ̆ng lu sư chă răt đơ̆ng dêh Êyiptơ noh: Na 'bă lu sư bơtho khan kơ lu sư dơ̆ng: Lu iĕm năm jur chă sa kơ lu bơ̆n 'ba dơ̆ng.

³Juđa tơl: Bơngai noh ki sư đei pơkă kơ lu nhôn tơpă thoi âu: Yua kơ tơdah oh hơdruch ưh kơ jur kiơ̆ hơdai lu iĕm, lei lu iĕm ưh pă 'bôh muh măt inh.

⁴Tơdah ih ăn kơ oh nhôn năm, lei lu nhôn gơh jur tơ dêh Êyiptơ chă phe 'ba kơ ih.

⁵Tơdah ưh, lei lu nhôn ưh kơ đei jur ôh, yua kơ bơngai noh đei khan boih thoi âu: Yua kơ tơdah oh hơdruch ưh kơ jur kiơ̆ lu iĕm, lei lu iĕm ưh pă đei 'bôh muh măt inh dơ̆ng boih.

⁶Isơrael jet: Liơ mă lu iĕm hơgei dêh pơm kơ inh, na tơbăt ăn kơ bơngai 'nei khan lu iĕm oei đei minh 'nu oh hơdruch dơ̆ng?

⁷Lu sư tơl: Bơngai noh sư apinh hơlen dêh lu nhôn păng gah tơdrong 'nhŏng oh lu nhôn thoi âu: 'Bă lu iĕm hăm oei arih? Hăm pă đei oh dơ̆ng ưh? Lu nhôn tơl dôm lu nơ̆r noh. Na bu băt kơ sư wă pơkă athei lu nhôn thoi âu: Athei chông ba oh hơdruch iĕm jur tơ âu.

⁸Juđa drơ̆ng Isơrael 'bă sư thoi âu: Apinh ih ăn oh hơdruch kiơ̆, na lu nhôn pơ̆n iung yak năm, wă kơ lu nhôn, lu kon, lu sâu, ih âu đei arih huay kơ lôch.

⁹Inh gô bơwei sư; ih gô pơm kơ inh tơdah inh ưh kơ đei chông ba sư brŏk 'bơ̆t anăp ih. Inh gô pŭ tơdrong glăi 'bơ̆t anăp ih ling-lang đĭ chăl arih.

¹⁰Tơdah huay kơ đei tơdrong kiơ lei lu nhôn brŏk năm 'bar wơ̆t boih.

¹¹Đơ̆ng noh Isơrael, 'bă lu sư khan: Tơdah đei tơdrong thoi noh, lei lu iĕm athei pơm thoi âu: Athei pơih iŏk tơmam gĭt kăp đơ̆ng lăm kơdŭng iĕm mă chĕp ba đơ̆ng dêh bơ̆n âu: Pơgang 'bâu phu, đak sut, chai 'long, 'long 'bâu phu, plei 'long gĭt na pơyơ̆r ăn kơ sư pơm tơmam bơnê.

¹²Athei chĕp ba jên hloh 'bar wơ̆t kơ lu adrol ki, wă pơdrâu kơ sư đơ̆ng sư tah pơdrâu lăm 'bơ̆r 'bi lu iĕm ki. Băt sư hiơt kơlĕ.

¹³Lu iĕm jah iung yak năm, chông ba oh hơdruch iĕm năm jur truh tơ bơngai noh.

¹⁴Apơi kơ Kră Yang 'Bok Kei-Dei, mơsêh mơyang tơgŭm ăn kơ sư đei mơnat kơ iĕm păng achăng 'nhŏng ki, hăm Bênjamin ăn kơ iĕm, bĕ gah 'bă, tơdah hiong kon, 'bă kư̆m chu đĕch boih.

¹⁵Thoi noh, lu 'nhŏng oh sư chĕp ba jên hloh kơ adrol ki 'bar wơ̆t, hăm lu tơmam pơyơ̆r, kư̆m chông ba Bênjamin yak hơdai jur tơ Êyiptơ wă tơ'bơ̆p Jôsep.

¹⁶Kơplah Jôsep 'bôh Bênjamin kư̆m jur kiơ̆, sư đei pơkă kơ bơngai wei-lăng, hnam sư thoi âu: Athei chông ba lu đe âu mơ̆t tơ lăm hnam, rôp kon sem dơrong hơmet pơm 'nhot sa păng pôk ăn por 'nhot; yua kơ 'năr dơ̆ng âu kơnh lu sư gô sŏng sa hơdai inh.

¹⁷Bơngai wei-lăng hnam sư pơm kiơ̆ thoi sư đei pơkă, tơmơ̆t đĭ lu sư lăm hnam Jôsep.

¹⁸'Nhŏng oh sư 'bôh đe tơmơ̆t lu sư lăm hnam Jôsep, kơna lu sư hli păng pơma tơduă lu sư khan: Âu yua kơ jên ki sư đei tah pơdrâu tơ rim 'nu 'bơ̆t 'bơ̆r 'bi bơ̆n, na sư mă tơmơ̆t bơ̆n tă tơ âu, wă chă tơdrong wă teh tôn lu bơ̆n, rôp lu bơ̆n pơm đĭch păng pơgô̆ thu iŏk dôm tơmam, dôm lu aseh bơ̆n.

¹⁹Lu 'nhŏng oh sư noh năm jê̆ tơ bơngai wei-lăng hnam Jôsep, Khan kơ sư 'bơ̆t 'nguaih kơ 'măng.

²⁰Thoi âu: Apinh yŏng kơ kơdră mơnat ăn! 'Nhŏng oh lu nhôn năm tơ âu minh wơ̆t boih, wă chă tơmam sa;

²¹Păng wă nhôn brŏk truh tơ anih nhôn pơdơh nhôn pơih 'bi 'bôh jên lu nhôn oei tơ lăm 'bi lu nhôn ngăl; lơ tŏ sĕt trăp phiơl dang yơ oei tôm dôm noh. Âu, lu nhôn kư̆m chĕp ba kơsô̆ jên noh.

²²Păng kư̆m đei chĕp ba jên plơ̆ng hai dơ̆ng wă răt phe 'ba. Ưh kơ băt bu mă tah pơdrâu lê̆ tơ lăm 'bi lu nhôn dơ̆ng.

²³Bơngai wei hnam khan; hiôk-hian bĕ iĕm 'nĕ kơ hli minh tơdrong kiơ! Noh đơ̆ng Kră Yang 'Bok Kei-Dei lu iĕm, mă Kră Yang 'Bok Kei-Dei 'bă lu iĕm, đei ăn tơmam gĭt tơ lăm 'bi lu iĕm. Lu jên iĕm inh iŏk boih. Đơ̆ng noh sư ba Simêôn năm tơ 'nhŏng oh lu sư;

²⁴Đơ̆ng noh năm ba lu 'nhŏng oh sư mơ̆t tơ lăm hnam Jôsep, iŏk ăn đak ôp jơ̆ng păng kư̆m hiĕm aseh lu sư sa.

²⁵Lu 'nhŏng oh sư hơmet lê̆ tơmam gô Jôsep brŏk 'năr dơ̆ng yua kơ lu sư đei kơtơ̆ng khan wă sŏng sa hơdai tơ noh.

²⁶Wă Jôsep brŏk truh tơ hnam lu sư pơyơ̆r ăn kơ Jôsep tơmam mă đơ̆ng lu sư chĕp ba đơ̆ng hnam, na lu sư drap bon tơ teh kơkuh 'bơ̆t anăp Jôsep.

²⁷Sư apinh hloi lu 'nhŏng oh sư thoi yơ hăm oei liĕm akâu păng khan; “'bă kră mă lu iĕm đei roi kơ inh ki noh sư hăm oei liĕm akâu, hăm oei arih?”

²⁸Lu sư tơl: Đĭch đam ih, 'bă lu nhôn, sư oei liĕm akâu mơ̆n păng oei arih đơ̆ng noh sư kŭp kơ̆l kơkuh.

²⁹Jôsep lăng 'bôh Bênjamin, oh sư, kon drŏ-nglo mĕ sư, na sư apinh: To noh hăm trŏ kơ oh hơdruch mă iĕm đei roi kơ inh ki? Sư khan dơ̆ng: Ơ dăm! Apinh Kră Yang 'Bok Kei-Dei ăn tơdrong pŭn hiôk kơ ih!

³⁰Jôsep lăng oh sư, na sư 'brơ̆k mơnat lĕch đak măt sư kơdâu lĕch tơ 'nguaih wă kơ chă anih nhơ̆m. Sư mơ̆t lăm hnam tơ anih sư na nhơ̆m.

³¹Đơ̆ng noh 'nhao măt sư na mơ̆t dơ̆ng, ĕnh păng khan: Hơmet bĕ tơmam sŏng sa.

³²Lu đe ei hơmet ăn kơ Jôsep gơ'bang sŏng sa phara: Yua kơ bơngai Êyiptơ ngăl lăng kơ bơngai Hêbrơ lŭch kơ sư yua kơ thoi noh na ưh kơ sŏng sa hơdai.

³³Thoi noh lu 'nhŏng oh sư hơdai sŏng sa tơklă anăp Jôsep 'lơ̆p 'lŏ kiơ̆ trŏ kơ sơnăm hơrĭ hơrĭ, lu sư pơglăn băl liơ kih?

³⁴Jôsep athei pôk ăn kơ lu 'nhŏng oh sư tơmam sa dan 'bơ̆t anăp sư. Mă-lei Bênjamin đe ăn tơmam sa lơ hloh kơ lu nai pơđăm wơ̆t. Lu sư sŏng sa 'băt 'lơ̆ng ngôi chơt hơdai hăm Jôsep.