Read bahnar Bl 44 Bible Online

Bl 44 - bahnar bible

Bl 44

¹Jôsep pơkă dơ̆ng kơ bơngai wei-lăng pơk 'ba noh thoi âu: Dah lu sư kĕ chơ dôm yơ ih kư̆ tah ăn kơ lu sư 'bĕnh dôm noh, kư̆m tah pơdrâu jên 'bơ̆t 'bơ̆r 'bi.

²Kŭm athei tah kơchŏk hu inh păng jên oh hơdruch wă răt 'ba noh tơ lăm 'bi sư. Bơngai wei-lăng pơk 'ba noh pơm kiơ̆ thoi Jôsep đei pơkă kơ sư.

³Năr đơ̆ng rŏng, 'năr 'nao lĕch, sư ăn kơ lu đe noh păng đĭ-đăng lu aseh sư brŏk.

⁴Kơplah lu sư lĕch hlôi kơ pơlei tam mă ataih, Jôsep khan kơ bơngai wei hnam ei thoi âu: Năm druh kiơ̆ lu sư bĕ, mưh tam boih, ih khan thoi âu: Liơ iĕm pơm kơnê̆ kơ bơngai pơm 'lơ̆ng kơ iĕm, liơ iĕm tơtông iŏk kơchŏk hu yŏng inh?

⁵Kơchŏk 'nâu boih mă yŏng inh juăt kơ huch sik? Păng chă pơih tơdrong hlơp, lu iĕm pơm tơdrong noh kơnê̆ dêh.

⁶Bơngai wei hnam noh druh tam boih păng khan dơ̆ng thoi nơ̆r tơtă noh;

⁷Lu 'nhŏng oh sư tơl: Yua kơ kiơ yŏng nhôn pơma thoi noh? Lu nhôn ưh kơ lah pơm thoi noh ôh.

⁸Âu, đơ̆ng dêh Kanaan lu nhôn đei chĕp ba jên mă đêl tah lê̆ 'bơ̆t 'bi nhôn dơ̆ng wă pơdrâu ăn kơ ih ră; mă-lei liơ mă khan wă tơtông dơ̆ng hu maih đơ̆ng anih yŏng tơ'ngla ih?

⁹Apinh ih chă tơmam noh tơ lăm 'bi bu bơngai noh athei pơlôch bĕ păng kơdih akâu lu nhôn kư̆m jing đĭch đam ih.

¹⁰Bơngai wei hnam ei khan: Bưh! Pơm thoi iĕm đei khan noh; inh chă 'bôh kơchŏk noh tơ lăm 'bi bu, bơngai noh pơm đĭch đam inh; gah lu nai huay kơ đei kiơ ôh.

¹¹Đơ̆ng noh hloi, đĭ-đăng kơ lu sư bu bu kư̆m tơjur 'bi kơdih kơdih tơ teh păng pơih chă lăng.

¹²Bơngai wei-lăng ei chă pơih lăng iŏk đơ̆ng 'nhŏng kơdră truh tơ oh hơdruch. Kơchŏk noh 'bôh tơ lăm Bênjamin.

¹³Đĭ-đăng kơ lu sư hek ao kơdih kơdih. Hơtŏk 'bi 'ba tơ rŏng aseh, năm hơlơ̆k brŏk tơ pơlei Jôsep.

¹⁴Juđa hăm đĭ-đăng 'nhŏng oh sư mơ̆t dơ̆ng tơ lăm hnam Jôsep; sư oei lăm hnam noh; lu sư drap bon tơ teh kơkuh 'bơ̆t anăp sư.

¹⁵Jôsep apinh: Lu iĕm pơm kiơ tơdrong ưh kơ 'lơ̆ng thoi noh? Iĕm ưh kơ băt ôh hă, inh ngăl chă pơih tơdrong hlơp.

¹⁶Juđa tơl: Lu nhôn pă băt thoi yơ hăm yŏng tơ'ngla nhôn wă pơma dŏng nhôn kơdih thoi yơ? Wă pơ̆n pơma kơ ih thoi yơ dơ̆ng. Kră Yang 'Bok Kei-Dei 'bôh nhen boih tơdrong kơnê̆ đĭch đam ih. 'Nâu, na đĭ-đăng kơ lu nhôn păng bơngai mă chă 'bôh kơchŏk tơ 'bi sư wă jing đĭch đam ih yŏng tơ'ngla.

¹⁷Mă-lei Jôsep tơl lu sư: Inh ưh kơ wă pơm tơdrong thoi noh! Bơngai bu mă đei chă 'bôh kơchŏk tơ lăm 'bi sư, bơngai noh đĕch jing đĭch đam inh; na lu bơngai nai brŏk bĕ tơ hnam 'bă hiôk-hian.

¹⁸Juđa năm jê̆ tơ Jôsep păng lung apinh thoi âu: Yua kơ ih pơm tih hơtŏ kơ hơngiĕng Pharaôn, apinh ih mơnat, 'nĕ kơ hil blĕk kơ đĭch đam ih, asong inh pơma minh nơ̆r kơ ih mơ̆ng yŏng tơ'ngla.

¹⁹Ih đei apinh lu nhôn đĭch đam ih thoi âu: Lu iĕm hăm pă đei oh hơdruch păng 'bă lu iĕm hăm pă oei?

²⁰Nhôn đei tơl ih thoi âu: Lu nhôn oei đei 'bă kră boih păng kư̆m oei đei minh 'nu oh 'lơ̆p mă hơiơch tuch-luch ăn kơ sư. 'Nhŏng kơdră sư lôch boih, na lăm lu kon mĕ sư, oei pă minh 'nu sư boih păng 'bă nhôn kơeng kơ sư dêh.

²¹Ih đei khan thoi âu: Athei chông ba sư jur tơ inh, wă kơ inh 'bôh sư păng măt inh kơdih.

²²Păng lu nhôn kư̆m đei roi boih kơ ih thoi âu: Oh 'lơ̆p noh ưh kơ gơh tơklah đơ̆ng 'bă sư ôh; tơdah sư tơklah đơ̆ng 'bă sư lei 'bă sư gô lôch.

²³Mă-lei ih đei khan: Tơdah oh hơdruch ưh kơ đei kiơ̆, lei lu iĕm ưh pă đei layơ wă 'bôh muh măt inh dơ̆ng.

²⁴Thoi noh boih lu nhôn brŏk ki lu nhôn brŏk roi ăn kơ 'bă lu nhôn đĭch đam ih dôm lu nơ̆r ih đei pơma noh.

²⁵Đơ̆ng noh, 'bă lu nhôn khan thoi âu: Năm jur dơ̆ng bĕ chă 'ba.

²⁶Lu nhôn tơl sư: Ưh kơ gơh ôh; athei ăn oh hơdruch nhôn jur kiơ̆ lei gơh, tơdah ưh lei lu nhôn ưh pă gơh tơ'bơ̆p muh măt sư dơ̆ng.

²⁷Đĭch đam ih 'bă lu nhôn, drơ̆ng khan: Lu iĕm athei băt akăn pơjing ăn kơ inh 'bar 'nu kon drŏ-nglo;

²⁸Minh 'nu năm đơ̆ng inh hiong boih, inh kư̆m đei khan: Băt sem bri châu sa boih, yua kơ truh dang ei tam mă 'bôh.

²⁹Tơdah lu iĕm wă chông ba oh âu dơ̆ng tơklah đơ̆ng inh, dah đei tơdrong kiơ truh kơ sư, thoi iĕm wă pơm kơ 'bă iĕm sŏk ko âu jĭ nuih hang klơm jur tơ dêh atâu.

³⁰'Bă nhôn 'mêm kơeng kơ sư dêh, măr sư dang pôm akâu pôm bơhngol; dang ei, inh brŏk truh tơ anih đĭch đam ih, 'bă nhôn, na ưh kơ đei oh hơdruch âu.

³¹Na mưh lăng biŏng kơ sư ưh kơ 'bôh oh hơdruch, sĭt sư lôch tơpă. Na thoi ei dang ih pơm ăn kơ 'bă sŏk ko lu nhôn, kư̆m đĭch đam ih jĭ klơm hang nuih lôch.

³²Yua kơ inh pơkă kơjăp hăm 'bă gah oh hơdruch âu na inh khan: Tơdah nhôn ưh kơ đei ba oh nhôn brŏk tơ ih dơ̆ng yoch hăm ih ling-lang hloi.

³³Yua kơ thoi ei, na apinh lê̆ inh pơm đĭch ih tơplih kơ bơngai 'lơ̆p âu, wă kơ sư brŏk kiơ̆ lu 'nhŏng sư.

³⁴Yua kơ tơdah 'lơ̆p âu ưh kơ brŏk, lei liơ nhôn pơ̆n brŏk tơ 'bă nhôn? Liơ inh pơ̆n lăng tơdrong kơnê̆ gô truh kơ 'bă inh.