Read bahnar Bl 47 Bible Online

Bl 47 - bahnar bible

Bl 47

¹Jôsep năm roi ăn kơ Pharaôn dôm tơdrong wă kơ băt păng sư khan thoi âu: 'Bă inh păng lu 'nhŏng oh inh đơ̆ng dêh Kanaan truh boih, đei chông ba khŭl triu, rơmo păng kư̆m chĕp ba lu mŭk tơmam hai, dang ei oei tơ tơring Gôsen.

²Sư ba pơđăm 'nu 'nhŏng oh sư năm tơ Pharaôn wă apinh păng roi.

³Pharaôn jet: Lu iĕm juăt kơ bơ̆jang tơdrong kiơ? Lu sư tơl: Lu đĭch đam ih âu juăt kơ wei triu kư̆m thoi lu 'bok yă nhôn sơ̆.

⁴Đơ̆ng noh lu sư khan dơ̆ng: Noh boih lu nhôn oei tơ tơring mă lu nhôn đei truh boih; yua kơ dêh char Kanaan đei pơngot rơwĕt tih dêh, 'nhĕt kư̆m ưh pă đei wă ăn kơ sem dơrong sa, thoi noh, wă apinh ih ăn kơ lu đĭch đam ih âu oei jang sa tơ tơring Gôsen.

⁵Pharaôn khan kơ Jôsep thoi âu: 'Bă ih lu 'nhŏng oh ih truh boih;

⁶Thoi noh dêh Êyiptơ đei 'măn ăn kơ ih; chă păng ăn bĕ kơ 'bă ih hăm lu 'nhŏng oh ih oei tơ anih mă 'lơ̆ng hloh lăm char Êyiptơ âu: Ăn bĕ kơ lu sư oei tơ tơring Gôsen noh; ih băt lăm lu sư bơngai bu gơh juăt hơgei kơ wei rong kon sem dơrong, jao bĕ kơ lu sư wei rong kon sem dơrong inh.

⁷Đơ̆ng noh Jôsep chông 'bă sư năm tơ'bơ̆p Pharaôn. Jakôp sơkat ăn wă kơ đei pŭn hiôk kơ Pharaôn.

⁸Pharaôn jet Jakôp thoi âu: Ih arih đei dôm sơnăm boih?

⁹Jakôp tơl thoi âu: Lăm lu sơnăm inh arih oei tơ to tơ âu đei đĭ-đăng minh-hrĕng pêng-jĭt sơnăm, lăng lăm sơnăm inh oei arih kơđeh tơpă păng pơmat-tat, ưh kơ đei hơtŏ dang 'bok 'bă inh arih mă năm tơ jơ̆p-jang.

¹⁰Jakôp hơpơi sơkat ăn pŭn hiôk kơ Pharaôn minh wơ̆t dơ̆ng, na sư lĕch đơ̆ng noh.

¹¹Thoi noh, Jôsep chu nơ̆r Pharaôn athei, jao ăn teh kơ 'bă sư păng lu 'nhŏng oh sư oei jang sa, ăn teh mă 'lơ̆ng hloh lăm char Êyiptơ, wă choh jang sa, tơ gah tơring Ramse.

¹²Jôsep asong kiơ̆ kơ kơ̆l bơngai, asong tơmam sa kơ 'bă sư, lu 'nhŏng oh sư păng đĭ-đăng hnam dơnŏ 'bă sư.

¹³Yua kơ đei tơdrong pơngot rơwĕt tih dêh thoi noh na jơ̆p-jang kơ dêh char rơdu rơmơ̆n ưh pă đei tơmam sa; dêh Êyiptơ păng dêh Kanaan kư̆m ưh kơmah yua kơ tơdrong rơwĕt noh.

¹⁴Jôsep ra iŏk đĭ jên kăk lăm dêh Êyiptơ păng dêh Kanaan, wă khan jên đơ̆ng lu bơngai răt 'ba; na tah mong lê̆ jên noh lăm hnam kho Pharaôn.

¹⁵Kơplah jên kăk lăm dêh char Êyiptơ păng dêh Kanaan đĭ boih, na đĭ-đăng kon pơlei năm tơ Jôsep ôr krao thoi âu: Apinh asong nhôn phe 'ba; yua kơ jên lu nhôn đĭ boih na wă lê̆ kơ nhôn lôch 'bơ̆t anăp ih đĕch hă?

¹⁶Jôsep tơl lu sư: Tơdah jên kăk đĭ boih, jao lu kon sem dơrong iĕm kơ inh, inh gô tơplih hăm phe 'ba.

¹⁷Thoi noh lu kon pơlei pơla ba sem dơrong tơ Jôsep tơplih 'ba sư, hăm aseh, lu triu, khŭl rơmo păng aseh iĕ. Sơnăm noh, sư tơplih iŏk lu kon sem dơrong păng 'ba.

¹⁸Đĭ pơđăm sơnăm ei boih, sơnăm đơ̆ng rŏng kon pơlei ôr krao thoi âu: Lu nhôn ưh pă đei ôn kơ 'bok yŏng; jên kăk đĭ 'biao, sem dơrong kư̆m jao ăn kơ ih, dang ei pă akâu jăn păng bri, mir chŭn nhôn đĕch boih.

¹⁹Thoi noh mă akâu nhôn mă mir chŭn wă tơhiong 'bơ̆t anăp ih 'bok hă? Tơplih phe 'ba ih hăm bri, mir chŭn hai bĕ. Thoi noh, mă lu nhôn, mă bri mir chŭn nhôn jing đĭch đam Pharaôn. Asong nhôn găr kiơ kiơ bĕ wă rei, wă kơ lu nhôn huay kơ lôch păng lu mir teh huay kơ lê̆ bri.

²⁰Jôsep răt pơđĭ hloi bri seh teh choh đơ̆ng kon pơlei dêh Êyiptơ ăn kơ Pharaôn yua kơ tơdrong pơngot tih na kon pơlei pơla Êyiptơ jing tĕch lê̆ mir 'ba lu sư; thoi noh mir chŭn jing mir chŭn Pharaôn ngăl.

²¹Gah kon pơlei đơ̆ng tôch gah âu truh tôch gah to tă kơ năm oei tơ pơlei tih ngăl.

²²Mă-lei chŭn mir, gah teh lu 'bok soi, Jôsep ưh kơ đei răt ôh, yua kơ lu sư đei phe 'ba đơ̆ng Pharaôn klah asong hai. Thoi ei na lu 'bok soi ưh kơ đei tĕch ôh mir chŭn lu sư.

²³Jôsep khan kơ kon pơlei pơla thoi âu: Dang ei inh răt iŏk boih lu bri păng mir chŭn lu iĕm ăn kơ Pharaôn, âu, adrĕch, găr wă kơ lu iĕm rei pơm dơđah lăm chŭn noh.

²⁴Na truh tơ bơyan, kĕch yuă, kư̆ ăn kơ Pharaôn minh lăm pơđăm, gah oei pă puăn noh 'măn kơ lu iĕm pơm adrĕch, wă pơm tơmam sa kơdih akâu păng hnam dơnŏ kon akăn.

²⁵Kon pơlei drơ̆ng: 'Bok ih đei pơrih lu nhôn! Apinh ih asong mơnat kơ lu nhôn 'bơ̆t anăp ih, nhôn jing đĭch đam Pharaôn.

²⁶Gah tơdrong noh, Jôsep pơkă minh tơdrong juăt, truh tơ dang ei oei đei, athei thuê̆ teh ăn kơ Pharaôn minh lăm pơđăm chăl mă bơ̆n đei. Lăp dôm lu chŭn mir lu 'bok soi đĕch huay kơ jô̆ tơmam Pharaôn.

²⁷Thoi noh, Isơrael oei tơ tơring Gôsen lăm char Êyiptơ, bơ̆jang sa tơ noh, pơjing hơ'lơ̆p rai lơ hloh.

²⁸Jakôp oei lăm dêh char Êyiptơ đei mơjĭt-tơpơh sơnăm, sư arih đei minh-hrĕng puăn-jĭt tơpơh sơnăm.

²⁹Kơplah lăm năr sư wă jê̆ lôch, Isơrael krao Jôsep, kon drŏ-nglo sư păng khan thoi âu: Tơdah 'bă đei tơdrong pŭn hiôk 'bơ̆t anăp kon, dan bĕ ti 'bơ̆t blu 'bă lui gơnang đĭ gơh găt păng pơm tơpăt hăm 'bă, apinh kon 'nĕ kơ 'bŭ 'bă tơ teh đak Êyiptơ âu hŏ.

³⁰Mưh 'bă pơdơh kiơ̆ 'bok yă boih, athei tơlĕch 'bă đơ̆ng dêh char Êyiptơ âu, 'bŭ hơdai bơsat 'bok. Jôsep drơ̆ng 'bă sư thoi âu: Kon gô pơm kiơ̆ nơ̆r 'bă đei bơtho khan.

³¹Jakôp khan dơ̆ng: Kon pơkă bĕ. Jôsep pơkă, đơ̆ng noh Isơrael sơtơ̆p kŭl-tăng 'bơ̆t kơ̆l giơng sư.