Read bahnar Bl 5 Bible Online

Bl 5 - bahnar bible

Bl 5

¹Âu boih sơ̆p hla bơar chih răk adrĕch adrung Ađam. Năr mă Kră Yang 'Bok Kei-Dei pơjing kon bơngai, Sư pơjing kon bơngai hơbŏ thoi Kră Yang 'Bok Kei-Dei.

²Sư pơjing bơngai drŏ-nglo păng bơngai drŏ-kăn, ăn tơdrong pŭn hiôk kơ bre sư păng năr Sư pơjing ei Sư anăn bre sư bơngai.

³Kơplah Ađam đei minh-hrĕng pêng-jĭt sơnăm, sư pơjing minh 'nu kon drŏ-nglo hơbŏ thoi sư, sư anăn Set.

⁴Đơ̆ng rŏng kơ Ađam đei pơjing Set boih, sư oei arih tơhngam-hrĕng sơnăm, kư̆m oei đei pơjing kon drŏ-nglo kon drŏ-kăn.

⁵Thoi noh Ađam arih đei tơsĭn-hrĕng pêng-jĭt sơnăm, na lôch.

⁶Set đei minh-hrĕng pơđăm sơnăm, pơjing Ênos.

⁷Đơ̆ng rŏng kơ Set pơjing Ênos boih sư arih tơhngam-hrĕng tơpơh sơnăm, pơjing kon drŏ-nglo kon drŏ-kăn.

⁸Thoi noh Set arih đei tơsĭn-hrĕng mơjĭt-'bar sơnăm na sư lôch.

⁹Ênos đei tơsĭn-jĭt sơnăm, pơjing Kênan.

¹⁰Đơ̆ng rŏng kơ Ênos pơjing Kênan boih, sư oei arih tơhngam-hrĕng mơjĭt-pơđăm sơnăm, pơjing kon drŏ-nglo kon drŏ-kăn.

¹¹Thoi noh Ênos arih đei tơsĭn-hrĕng pơđăm sơnăm na sư lôch.

¹²Kênan đei tơpơh-jĭt sơnăm, pơjing Mahalale,

¹³Đơ̆ng rŏng kơ Kênan pơjing Mahalale boih, sư oei arih tơhngam-hrĕng puăn-jĭt sơnăm pơjing kon drŏ-nglo kon drŏ-kăn.

¹⁴Thoi noh Kênan arih đei tơsĭn-hrĕng mơjĭt sơnăm, na sư lôch.

¹⁵Mahalale đei tơdrâu-jĭt pơđăm sơnăm, pơjing Jaret.

¹⁶Đơ̆ng rŏng kơ Mahalale pơjing Jaret, sư oei arih tơhngam-hrĕng pêng-jĭt sơnăm, pơjing kon drŏ-nglo kon drŏ-kăn.

¹⁷Thoi noh Mahalale arih đei tơhngam-hrĕng tơsĭn-jĭt pơđăm sơnăm, na sư lôch.

¹⁸Jaret đei minh-hrĕng tơdrâu-jĭt 'bar sơnăm, pơjing Ênok.

¹⁹Đơ̆ng rŏng kơ Jaret pơjing kơ Ênok boih sư oei arih tơhngam-hrĕng sơnăm, pơjing kon drŏ-nglo kon drŏ-kăn.

²⁰Thoi noh Jaret arih đei tơsĭn-hrĕng tơdrâu-jĭt 'bar sơnăm, na sư lôch.

²¹Ênok đei tơdrâu-jĭt pơđăm sơnăm, pơjing Mêtusêla.

²²Đơ̆ng rŏng kơ Ênok pơjing kơ Mêtusêla boih, đơ̆ng noh sư mơ̆ng kiơ̆ Kră Yang 'Bok Kei-Dei lăm pêng-hrĕng sơnăm, sư pơjing kon drŏ-nglo kon drŏ-kăn.

²³Thoi noh Ênok đei arih pêng-hrĕng tơdrâu-jĭt pơđăm sơnăm.

²⁴Ênok kiơ̆ Kră Yang 'Bok Kei-Dei, na biŏng pă 'bôh hloi, yua kơ Kră Yang 'Bok Kei-Dei sơng iŏk sư boih.

²⁵Mêtusêla đei minh-hrĕng tơhngam-jĭt tơpơh sơnăm pơjing Lêmek.

²⁶Đơ̆ng rŏng kơ Mêtusêla pơjing Lêmek boih, sư oei arih tơpơh-hrĕng tơhngam-jĭt 'bar sơnăm pơjing kon drŏ-nglo kon drŏ-kăn.

²⁷Thoi noh Mêtusêla arih đei tơsĭn-hrĕng tơdrâu-jĭt tơsĭn sơnăm, na sư lôch.

²⁸Lêmek đei minh-hrĕng tơhngam-jĭt 'bar sơnăm, pơjing minh 'nu kon drŏ-nglo.

²⁹Sư anăn Nôê păng khan thoi âu: “Sư âu boih wă pơlung jơhngơ̆m lu bơ̆n đơ̆ng tơdrong jang mă gleh lap yua kơ Kră Yang hiap pơtê̆ boih teh âu.”

³⁰Đơ̆ng rŏng kơ Lêmek pơjing Nôê boih, sư oei arih pơđăm-hrĕng tơsĭn-jĭt pơđăm sơnăm, sư pơjing kon drŏ-nglo kon drŏ-kăn.

³¹Thoi noh Lêmek arih đei tơpơh-hrĕng tơpơh-jĭt tơpơh sơnăm, na sư lôch.

³²Gah Nôê, dĭng truh sư pơđăm-hrĕng sơnăm, sư pơjing pêng 'nu kon drŏ-nglo, Sem, Cham păng Japhet.