Read bahnar Bl 9 Bible Online

Bl 9 - bahnar bible

Bl 9

¹Kră Yang 'Bok Kei-Dei ăn pŭn hiôk kơ Nôê păng lu kon drŏ-nglo sư, Sư khan thoi âu: “Athei pơjing adrĕch adrung hrôh ngôh rai lơ dĭng 'bĕnh-'bang kơpal teh.

²Lu sem dơrong kơpal teh, lu sem păr kơpal plĕnh păng lu sem brem adrŏ kơpal teh, lu ka lăm đak dơsĭ, đĭ-đăng gô hli păng chu yom kơ iĕm yua kơ Inh jao boih lăm ti lu iĕm.

³Mă dôm kon sem brem đei tơdrong arih yak mơmŏ kơpal teh gô jing tơmam sa lu iĕm. Inh ăn dôm kon sem brem noh kư̆m thoi Inh ăn boih kơ lu 'bok yă iĕm sơ̆ sa hla 'nhot.

⁴Mă-lei lu iĕm 'nĕ kơ sa 'nhĕm lu kon sem mă đei bơhngol arih, wă khan oei đei pham.

⁵Sĭt tơpă, tơdah kon bơngai dah sem brem pơlôch iĕm, inh ưh kơ ăn kơ sư oei arih ôh.

⁶Thoi noh bơngai bu mă pơlôch đe, na kư̆m đei đe nai pơlôch sư, yua kơ Kră Yang 'Bok Kei-Dei pơjing lu iĕm hơbŏ thoi rup sư.

⁷Gah lu iĕm athei pơjing adrĕch adrung rai lơ 'bĕnh-'bang jơ̆p-jang kơpal teh đak.”

⁸Kră Yang 'Bok Kei-Dei kư̆m đei khan kơ Nôê hăm lu kon drŏ-nglo sư thoi âu:

⁹“Gah Inh âu: Inh pơjing tơdrong pơgơ̆p pơkă pơkăm hăm lu iĕm păng lu adrĕch adrung lu iĕm,

¹⁰Păng lu kon sem mă oei arih hơdai iĕm, lu sem păr, mă lu sem dơrong, lu sem bri oei kơpal teh, wă khan đĭ lu kon sem brem mă 'nao lĕch đơ̆ng duk mă truh tơ kon sem brem oei kơpal teh.

¹¹Thoi noh Inh pơjing tơdrong pơgơ̆p hăm lu iĕm păng đĭ-đăng lu kon sem, ưh pă đei layơ đak wă lơ̆p pơlôch dơ̆ng păng kư̆m pă đei khan wă lơ̆p pơrăm teh.”

¹²Kră Yang 'Bok Kei-Dei khan dơ̆ng: “Âu boih tơdrong, tơdra gah tơdrong pơgơ̆p mă inh pơkă hăm lu iĕm păng đĭ-đăng lu tơmam arih oei hăm lu iĕm rim jơhnơr dĭng truh ning-mônh.

¹³Inh ăn plĕnh chro tơ hơmơ̆l wă pơm tơdra pơgơ̆p inh hăm teh.

¹⁴Mưh layơ Inh akŭm đĭ lu hơmơ̆l kơpal teh păng đei plĕnh chroa tơ hơmơ̆l noh.

¹⁵Na Inh gô 'blŏk tơdrong Inh đei pơgơ̆p boih hăm lu iĕm păng lu kon sem mă đei tơdrong arih na đak ưh kơ đei layơ wă lơ̆p pơrăm pơlôch đĭ dơ̆ng.

¹⁶Thoi noh plĕnh chro gô tơ'bôh tơ hơmơ̆l Inh lăng tơ noh 'blŏk âu boih tơdrong pơgơ̆p ling-lang mă đơ̆ng Inh đei pơkă hăm dôm lu adrĕch mă đei tơdrong arih kơpal teh.”

¹⁷Kră Yang 'Bok Kei-Dei pơma dơ̆ng hăm 'bok Nôê: “Âu boih tơdra gah tơdrong Inh pơgơ̆p hăm dôm lu adrĕch arih kơpal teh.”

¹⁸Lu kon drŏ-nglo Nôê lĕch đơ̆ng lăm duk noh, Sem, Cham, Japhet. Cham âu jơ̆ 'bă Kanaan.

¹⁹Noh pêng 'nu kon drŏ-nglo Nôê păng đơ̆ng lu sư boih na mă đei kon bơngai jơ̆p kơpal teh.

²⁰Đơ̆ng noh Nôê pơtơm choh teh păng pơtăm plei hơmu.

²¹Sư huch sik hơmu na suai sư 'bĭch akâu hoh lăm bơsŭn sư.

²²Cham mă 'bă Kanaan 'bôh 'bă sư brao akâu hoh thoi noh na lĕch tơ 'nguaih roi ăn kơ bre 'nhŏng oh sư.

²³Mă-lei Sem păng Japhet iŏk ao trăk tơ hơngiĕng măr sư, sư năm kơdŭn wih rŏng na klơ̆p akâu 'bă sư yua kơ măr sư lăng măt tơ nai, na huay kơ 'bôh 'bă sư akâu hoh,

²⁴Lăp Nôê praih kơ suai boih băt hloi kơ kon sư mă 'barb đei pơm kiơ kơ sư,

²⁵Na khan: “Kanaan trŏ tơpă pŭ hơngiap! Sư gô pơm đĭch đam kơ lu 'nhŏng oh sư.”

²⁶Nôê khan dơ̆ng: “Trŏ bơnê kơkuh kơ Kră Yang, mă Kră Yang 'Bok Kei-Dei Sem, Kanaan athei pơm đĭch sư!

²⁷Apinh Kră Yang 'Bok Kei-Dei pơih teh mă să kơ Japhet ăn kơ sư oei hơdai hăm Sem; gah Kanaan athei pơm đĭch lu sư.”

²⁸Đơ̆ng rŏng kơ đak lơ̆p, Nôê arih pêng-hrĕng pơđăm-jĭt sơnăm.

²⁹Thoi noh, Nôê arih đei tơsĭn-hrĕng pơđăm-jĭt sơnăm, na sư lôch.