Read bahnar II Sam 1 Bible Online

II Sam 1 - bahnar bible

II Sam 1

¹Đơ̆ng rŏng kơ Sôl lôch, Đawit blah lu bơngai Amalek jei sư đang boih, na sư brŏk oei lăm pơlei Siklak 'bar năr.

²Năr mă pêng đei minh 'nu bơngai đơ̆ng kơđông Sôl, hơbĕn ao sư hiah đĭ, kơ̆l sư 'bĕnh kơ 'mui teh sư năm 'bơ̆t anăp drap kơkuh kơ Đawit.

³Đawit jet sư: “Ih đơ̆ng yơ?” Sư tơl: “Inh đơ̆ng kơđông linh Isơrael kơdâu hlôi tơ âu.”

⁴Đawit jet dơ̆ng: “Đei tơdrong kiơ tơ noh? Ih roi kơ inh.” Sư roi: “Lu bơngai Isơrael tơblah thuơ kơdâu đĭ boih, đei lơ bơngai lôch; Sôl păng kon sư Jônathan, kư̆m lôch mơ̆n.”

⁵Đawit jet bơngai tơdăm mă roi ei: “Liơ ih băt kơ Sôl păng kon sư Jônathan lôch boih?”

⁶Bơngai tơdăm ei tơl: “Lăp inh năm rok trong kông Gilbôa,” na inh 'bôh Sôl oei 'bĭch hơgrop hăm tơju sư, gre hăm lu linh ayăt druh wă jê̆ sư.

⁷Na sư hue lăng 'bôh inh păng krao inh. Inh tơl: “Kiơ inh tơ âu.”

⁸Sư jet inh; “ih bu? Inh tơl:” Inh bơngai Amalek.

⁹Sư khan kơ inh: Năm tơ âu jah pơlôch inh đĕch, yua kơ inh pơnĕ pơmat ưh kơ jah lôch.

¹⁰Na inh năm jê̆ pơlôch sư hloi, yua kơ inh băt kơ sư ưh pă gơh arih boih, yua kơ rơka jrŭ dêh, na inh plôh iŏk môk pơtao đơ̆ng kơ̆l sư hăm kong maih đơ̆ng kơkŏng ti sư, na chĕp ba tơ âu ăn kơ ih yŏng inh.

¹¹Đawit hek hloi ao sư, đĭ-đăng lu bơngai kiơ̆ sư kư̆m pơm thoi noh.

¹²Lu sư tŭr kơtơh, nhơ̆m hmoi, hăm ơ̆t kơ sŏng sa truh tơ kơsơ̆, wă wang ơh sơ'ngon kơ Sôl hăm kon sư Jônathan, hăm yua kơ kon pơlei Kră Yang păng adrĕch Isơrael, yua kơ lu bơngai 'nâu pơ̆k lôch lăm anih tơblah.

¹³Đawit jet bơngai tơdăm noh: “Ih bơngai đơ̆ng yơ? Sư tơl:” Inh kon tơdăm bơngai Amalek, oei tơ âu.

¹⁴Đawit ôr: “Yua kơ kiơ ih pơ̆n pơlôch bơngai mă đơ̆ng Kră Yang rơih.”

¹⁵Đawit krao minh 'nu bơngai tơdăm kiơ̆ sư na khan: “Năm pơlôch sư bĕ!” Bơngai ei năm pơlôch sư hloi.

¹⁶Đawit khan: “Pham ih tuh plơ̆ kơpal kơ̆l ih! Nơ̆r ih roi kơdih tơdrong noh, yua kơ ih khan: ‘Kơdih inh pơlôch bơngai mă Kră Yang rơih.’ ”

¹⁷Đawit pơm 'bai hơri nhơ̆m hmoi ơh sơ'ngon kơ Sôl păng kon tơdăm sư Jônathan.

¹⁸Đawit bơtho tơ'blŏk kơ lu kon pơlei bơngai Juđa 'bai hơri hơ'ngon gah Hră jŭk, mă đe gô chih răk lăm sơ̆p hla bơar roi gah Bơngai 'lơ̆ng tơpăt (Jashar)

¹⁹Ơ bơngai mă iĕm ư-ang, ơ Isơrael Đĭ lôch hiong lăm kông kŏ! Ôi lu bơngai nuih kơtang 'nâu lôch boih.

²⁰'Nĕ chă roi tơdrong 'nâu tơ lăm pơlei Gat, 'nĕ chă roi tơdrong noh kiơ̆ trong tih pơlei Askalon; kơnh lu bơngai drŏ-kăn Philistin hiĕk chhôk, lu drŏ-kăn bơngai ưh kơ kăt tơdra akar hiôk chơt.

²¹Ơ kông groi Gilbôa Rŏ kơ tŭk gom păng 'mi 'nĕ pă jruh tơ ih, rŏ kơ ưh pă đei chŭn mir, teh mơ̆r 'lơ̆ng tơ anih 'nâu dơ̆ng. Yua kơ tơ anih noh khêl đao tơblah lu bơngai nuih kơtang jing đĭ 'mê̆-'mach, Khêl đao Sôl ưh pă layơ wă sŭt pơiel hăm đak rơmă dơ̆ng.

²²Hră jŭk Jônathan ưh kơ đei layơ wơ̆t brŏk, khan huay kơ đei pham bơngai lôch klep, Đao Sôl ưh kơ layơ brŏk hoh. Mă-lei layơ kư̆m đei rơmă lu bơngai nuih kơtang klep.

²³Ôi pơtao Sôl hăm Jônathan trŏ kơ 'mêm gĭt tơpă! Mă oei arih truh tơ lôch kư̆m ưh kơ đei achăng băl: Măr sư hơbĕch hloh kơ Klang pran hloh kơ Dăm-brang!

²⁴Ơ lu drŏ-kăn Isơrael, nhơ̆m hmoi bĕ 'mêm kơ Sôl. Sư pơhrŭk ăn kơ iĕm ao che thêt 'lơ̆ng, Pơhrôp pơguăng chô̆ ăn maih tơ ao lu iĕm.

²⁵Ôi hĭ bơngai nuih kơtang âu pơ̆k tơ anih tơblah. Jônathan lôch tơ anih groi grôn.

²⁶Ơ Jônathan, 'nhŏng inh, jơhngơ̆m inh ơh hang nuih kơ ih thoi đe 'bet; Inh 'mêm kơeng kơ ih dêh. Tơdrong buăl juăt ba hiôk hơiă dêh Hloh kơ tơdrong hưch wă kơ bơngai drŏ-kăn.

²⁷“Ôi hĭ bơngai nuih kơtang đĭ pơ̆k lôch! Tơmam tơblah đĭ pơchah răm.”