Read bahnar II Sam 10 Bible Online

II Sam 10 - bahnar bible

II Sam 10

¹Đơ̆ng rŏng kơ pơtao bơngai Ammôn lôch, na Hanun kon drŏ-nglo sư pơgơ̆r, pơtrơp sư.

²Đawit khan: “Inh 'maih pơm hiôk hăm Hanun, kon drŏ-nglo Nabas, kư̆m thoi 'bă sư hlôi pơm 'lơ̆ng kơ inh boih” Đawit wơh đĭch đam sư năm ngôi pơlung pơtao Hanun gah tơdrong 'bă sư lôch. Lu đĭch đam Đawit năm truh tơ lăm dêh char kon pơlei Ammôn.

³Mă-lei lu yŏng wei-lăng kon pơlei Ammôn roi kơ yŏng tơ'ngla sư pơtao Hanun: “Ih tơchĕng khan Đawit wơh lu bơngai năm ngôi pơlung ih yua kơ lu sư pơyom kơ 'bă ih hă? Ưh ôh! Đawit wơh lu bơngai đĭch đam sư năm truh tơ ih lu sư 'maih wă chop lăng lu pơlei tih đĕch păng wă blah iŏk dơning kơnh;”

⁴Pơtao Hanun athei đe rôp lu đĭch đam Đawit, na hơkôih lê̆ sŏk kang lu sư minh pah tơ'bŏk, kăt lê̆ minh pah hơbĕn ao lu sư gah pơtâu, na ăn kơ lu sư brŏk.

⁵Đawit kơtơ̆ng tơdrong ei, na sư wơh lu bơngai năm sơng lu đe ei, yua kơ lu sư mơn mơlâu dêh, pơtao pơkă kơ lu sư: “Lu iĕm oei tơ pơlei Jêrikô dĭng truh tơ sŏk kang lu iĕm chăt 'mơ̆i; na lu iĕm wih brŏk.”

⁶Kon pơlei Ammôn băt kơ lu sư pơm wă kơ Đawit blĕk, na wơh bơngai năm mưng iŏk kon pơlei Siri oei tơ pơlei Bêtrêhot păng tơ Sôba dang 'bar-jĭt rơbâu 'nu linh, na mưng iŏk đơ̆ng pơtao Maaka minh-rơbâu 'nu linh, păng mơjĭt-'bar rơbâu 'nu bơngai đơ̆ng pơlei Top.

⁷Đawit kơtơ̆ng tơdrong noh, na wơh hloi Jôap yŏng linh hăm lu bơngai linh nuih kơtang sư năm tơblah.

⁸Khŭl linh Ammôn lĕch dă 'bơ̆t trong wă mơ̆t tơ pơlei tih, gah lu linh Siri dă 'bơ̆t Sôba păng oei tơ Rêhôp, lu linh oei tơ pơlei Top păng oei tơ Maaka lu sư dă kơdih pha tơ bri tơ tơmăn glă.

⁹Wă Jôap yŏng linh 'bôh lu linh ayăt wă blah 'bar pah gah anăp gah rŏng kơ lu sư, na sư rơih lu linh nuih kơtang lăm lu bơngai Isơrael săp dă năm tơblah lu linh bơngai Siri.

¹⁰Gah lu linh mă oei oei, sư pơjao ăn kơ Abisai oh sư, săp dă năm tơblah hăm lu linh Ammôn.

¹¹Sư khan kơ Abisai: “Tơdah lu linh Siri pran hloh kơ inh, ih gô năm tơgŭm inh, mă-lei tơdah lu linh Ammôn pran hloh kơ ih, inh gô năm tơgŭm ih.”

¹²'Nĕ kơ hli athei tơblah mă nuih đĭ jơhngơ̆m wă wei kon pơlei pơla bơ̆n, păng lu pơlei tih Kră Yang 'Bok Kei-Dei bơ̆n; hơpơi kơ Kră Yang pơm kiơ̆ thoi Sư tơchĕng 'lơ̆ng!

¹³Jôap hăm lu linh kiơ̆ sư năm tơblah hăm lu linh Siri, lu linh Siri thuơ chă kơdâu ôn.

¹⁴Wă lu linh Ammôn 'bôh lu linh Siri kơdâu, na lu sư kư̆m kơdâu weh 'bơ̆t anăp Abisai, păng mơ̆t ôn lăm pơlei. Jôap weh ưh pă blah lu linh Ammôn na hơlơ̆k brŏk tơ pơlei Jêrusalem.

¹⁵Lu linh Siri 'bôh sư blah jei lu linh bơngai Isơrael, na pơtơm akŭm pơpôi băl dơ̆ng.

¹⁶Pơtao Hadadêser wơh bơngai năm akŭm linh Siri mă oei tơ pah to Krong Ơphrat; lu sư năm truh tơ pơlei Hêlam, đei Sobak pơm yŏng linh pơgơ̆r linh Hadadêser.

¹⁷Kơtơ̆ng tơdrong 'nâu, Đawit akŭm pơpôi dơ̆ng đĭ-đăng lu linh bơngai Isơrael năm tŏk hlôi kơ đak Krong Jôrđăn, năm truh tơ Hêlam, tơ noh lu linh Siri săp dă wă tơblah hăm pơtao Đawit păng lu linh Siri tơblah hloi.

¹⁸Mă-lei lu linh Siri thuơ kơdâu đơ̆ng anăp lu linh Isơrael, Đawit pơlôch lu linh Siri pơrăm tơpơh-hrĕng tŏ gre aseh, păng puăn-jĭt rơbâu 'nu lu linh bơngai Siri. Sobak yŏng pơgơ̆r linh Siri rơka hngăm dêh păng lôch hloi tơ noh.

¹⁹Na đĭ-đăng lu pơtao kiơ̆ pơtao Hadadêser 'bôh khŭl linh Siri thuơ kơ lu linh bơngai Isơrael, na lu sư apinh lung pơm hiôk hăm lu bơngai Isơrael păng mơ̆t khŭl lu bơngai Isơrael. Lu linh Siri pă pơ̆n dŏng lu kon pơlei Ammôn dơ̆ng.