Read bahnar II Sam 12 Bible Online

II Sam 12 - bahnar bible

II Sam 12

¹Kră Yang wơh Nathan năm tơ'bơ̆p Đawit, sư pơma khan: “Lăm minh pôm pơlei 'nei đei 'bar 'nu bơngai, minh 'nu mơdrŏng minh 'nu dơnuh.

²Bơngai mơdrŏng đei triu, rơmo lơ dêh.

³Bơngai dơnuh ưh kơ đei kiơ, sư đei lăp minh pôm triu akăn iĕ mă đơ̆ng sư răt; sư rong răi kon triu noh wơ̆ tih hơdai hăm kon hơ'lơ̆p sư tơ lăm hnam sư, kon triu iĕ noh sŏng sa hơdai sư, nhă đak minh pôm pơnhan hăm sư păng tep hăm sư. Sư lăng thoi minh 'nu kon drŏ-kăn sư kơdih.

⁴Lăm minh năr ei, đei minh 'nu bơngai tơmoi truh năm ngôi tơ bơngai mơdrŏng, bơngai mơdrŏng 'mêm kơ triu, rơmo sư ưh kơ wă rôp hơmet 'nhĕm sa ăn kơ tơmoi; 'nao truh noh, na sư rôp iŏk kon triu bơngai dơnuh noh pơm hơmet 'nhĕm sa ăn kơ tơmoi năm ngôi tơ sư noh.”

⁵Đawit blĕk dêh kơ bơngai mơdrŏng noh, păng khan kơ Nathan: “Inh pơkă 'bơ̆t anăp Kră Yang arih ling-lang, bơngai pơm kơnê̆ dêh thoi noh trŏ kơ lôch!

⁶Sư athei duh 'mong puăn plơ̆ng, yua kơ sư pơm thoi noh, sư ưh kơ đei jơhngơ̆m băt mơnat.”

⁷Nathan khan kơ Đawit: “Pơtao boih bơngai noh! Kră Yang 'Bok Kei-Dei Isơrael đei khan: ‘Inh boih rơih ăn kơ ih pơm pơtao Isơrael, Inh boih dŏng ih klaih đơ̆ng ti Sôl.

⁸Inh ăn kơ ih wei-lăng hnam yŏng tơ'ngla ih, Inh pơjao lu akăn yŏng tơ'ngla ih lăm ti ih ăn kơ ih pơm pơtao pơgơ̆r kon pơlei Isơrael păng Juđa, păng dah tơdrong noh ưh tam tôm mah lei Inh gô ăn thim kơ ih lơ hloh dơ̆ng.

⁹Liơ ih ưh kơ băt hli yom kơ nơ̆r Kră Yang tơtă, na pơm tơdrong kơnê̆ dêh 'bơ̆t anăp Sư? Ih yua đao pơlôch Uri, bơngai Hêtit, iŏk akăn sư pơm akăn ih, ih yua đao gưm linh bơngai Ammôn pơlôch sư.

¹⁰Thoi noh na, dao ưh kơ đei layơ pơdơh pơrăm hnam dơnŏ ih, yua kơ ih ưh kơ pơyom kơ Inh, tơgar iŏk akăn Uri, bơngai Hêtit, pơm akăn ih.”

¹¹Kră Yang khan: “Inh gô pơm đơ̆ng kơdih hnam dơnŏ ih iung blah pơm kơ ih, 'bơ̆t tơm măt ih; Inh gô rôp lu akăn ih pơjao ăn kơ minh 'nu bơngai jê̆ ih, sư gô pơ'brơh kơ lu akăn ih 'bơ̆t hơdah kơ'năr 'bơ̆t anăp lơ bơngai.

¹²Ih pơm tơdrong noh chă klĕnh ôn, mă-lei Inh gô pơm tơdrong 'nâu hơdah kơ'năr 'bơ̆t anăp đĭ-đăng bơngai Isơrael.”

¹³Đawit khan kơ Nathan: “Inh pơm yoch boih hăm Kră Yang.” Nathan tơl: “Mă-lei Kră Yang sŭt boih tơdrong yoch ih, ih huay kơ lôch ôh.

¹⁴Mă-lei yua kơ tơdrong ih pơjăm ưh kơ lăng boih Kră Yang lăm tơdrong 'nâu, na kon drŏ-nglo mă akăn ih 'nao tơpŭ kơ ih noh gô lôch.”

¹⁵Lăp Nathan wih brŏk tơ hnam sư, Kră Yang pơm kơ kon nge mă akăn Uri 'nao rơneh ăn kơ Đawit noh jĭ dêh hloi.

¹⁶Đawit krao khan apinh Kră Yang 'Bok Kei-Dei pơklaih nge noh, păng sư ơ̆t kơ sŏng sa; sư mơ̆t tơ lăm anih 'bĭch tơ teh prăt măng.

¹⁷Lu kră bơngai bơ̆jang đunh lăm hnam pơtao dơ̆ng tăp dăr tơiung sư đơ̆ng teh; mă-lei sư ưh kơ wă iung păng ưh kơ wă sŏng sa hơdai lu đe noh.

¹⁸Lăm tơpơh năr nge noh lôch. Lu đĭch đam ưh kơ pơ̆n roi kơ sư băt kơ nge noh lôch; yua kơ lu sư pơma tơduă khan: “Kơplah nge noh oei arih, bơ̆n nŏng kơ pơma pơlung pơtao, pơtao ưh kơ mơ̆ng; na liơ bơ̆n pơ̆n roi kơ sư băt nge noh lôch? Hơmơt kơ sư rai pơm kơ akâu sư!”

¹⁹'Bôh lu đĭch sư pơma mơmơnh băl, pơtao Đawit sư băt kơ nge noh lôch boih, na sư jet: “Hăm trŏ kơ nge noh lôch boih?” Lu sư tơl: “Trŏ boih, nge noh lôch boih.”

²⁰Kơplah noh, Đawit iung đơ̆ng teh, hum hơpĕch, pik đak pơgang 'bâu phu tơ akâu sư, hrŭk tơplih hơbĕn ao; sư mơ̆t tơ hnam Kră Yang drap kơkuh, đơ̆ng noh sư wih brŏk tơ hnam pơtao sư dơ̆ng, athei đe hơmet tơmam sŏng sa. Na lăp đe hơmet dang boih sư sŏng sa hloi.

²¹Lu đĭch đam sư jet: “Yua kơ kiơ ih pơm thoi noh. Lu nhôn ưh kơ băt hloi, kơplah nge noh oei arih, ih ơ̆t kơ sŏng sa păng nhơ̆m hmoi; wă 'bơ̆t sư lôch, ih iung păng sŏng sa.”

²²Pơtao tơl: “Kơplah nge noh oei arih, inh ơ̆t kơ por păng nhơ̆m hmoi yua kơ inh tơchĕng khan: ‘Băt rŏ lăng Kră Yang wă mơnat kơ inh, păng ăn kơ nge noh arih.’

²³Mă-lei dang ei sư lôch boih, inh wă ơ̆t kơ sŏng sa pơm kiơ dơ̆ng? Inh hăm gơh pơm kơ sư wơ̆t tơ âu dơ̆ng? Inh gô năm tơ sư, mă-lei sư ưh pă gơh wơ̆t wih tơ inh dơ̆ng.”

²⁴Đawit pơlung Batsêba, akăn sư, Đawit năm tep hơdai hăm akăn sư; akăn sư tơpŭ kơ minh 'nu kon drŏ-nglo krao anăn sư Sôlômôn, Kră Yang 'mêm kơ sư dêh.

²⁵Yua kơ Kră Yang 'mêm kơ nge noh dêh, na Sư wơh Nathan bơngai pơtruh nơ̆r sư krao anăn nge noh Jêđiđia.

²⁶Jôap tơblah pơlei Rapba, pơlei tih bơngai Ammôn, păng wă blah iŏk pơlei pơtao noh.

²⁷Jôap wơh linh sư năm roi tơbăt kơ Đawit: “Inh oei tơblah hăm pơlei tih Rapba păng inh đei blah iŏk boih kơđông kơjăp anih wei mong đak.

²⁸Dang ei, ih athei krao akŭm pơđĭ lu linh mă oei oei noh, năm wang blah iŏk pơlei tih noh, mưh inh blah iŏk kơnh đe krao pơlei noh anăn inh.”

²⁹Pơtao Đawit krao akŭm pơđĭ lu linh, năm blah iŏk pơlei Rapba, na blah iŏk hloi pơlei noh.

³⁰Pơtao Đawit sư plôh iŏk môk pơtao đơ̆ng kơ̆l rup yang Milkôm, na yơ̆l tơ kơ̆l sư; môk noh pơm păng maih trăp dang pêng-jĭt pơđăm kĭ, đei pơgong hăm minh găr tơmo gĭt. Sư kư̆m đei blah tơgar iŏk mŭk tơmam lơlap đơ̆ng lăm pơlei noh.

³¹Sư kư̆m rôp kon pơlei lăm noh bơ̆jang kơ sư, jao ăn hơnuă, 'nhik, sung bơsei păng jang man gŏch; sư kư̆m pơm kơ đĭ-đăng lu pơlei bơngai Ammôn jang thoi noh. Đơ̆ng noh, Đawit păng lu linh sư wih brŏk đĭ tơ pơlei Jêrusalem.