Read bahnar II Sam 15 Bible Online

II Sam 15 - bahnar bible

II Sam 15

¹Đơ̆ng rŏng kơ noh Apsalôm chă lê̆ gre aseh hăm pơđăm-jĭt 'nu linh kơdâu adrol kơ gre aseh.

²Apsalôm juăt kơ iung đơ̆ng hrôih, dơ̆ng jê̆ cheng trong mơ̆t 'bơ̆t 'măng jang pơlei. Tơdah tơ'bơ̆p bơngai bu đei tơdrong kiơ năm tơ pơtao wă apinh sek tơlang, na Apsalôm krao bơngai noh apinh jet. “Ih đơ̆ng pơlei ayơ?” Dah sư tơl: “Đĭch đam ih đơ̆ng adrĕch 'nâu, adrĕch to lăm Isơrael,”

³Apsalôm juăt kơ pơma: “'Lơ̆ng dêh, tơdrong ih apinh trŏ păng lăp tơpă; mă-lei pơtao ưh kơ đei wơh bơngai bu wă mơ̆ng ih ôh.”

⁴Apsalôm khan dơ̆ng: “Ôi! Rŏ kơ đe pôk inh pơm yŏng sek tơlang lăm dêh char! Dah đei bơngai ayơ đei tơdrong kiơ wă sek tơlang, năm truh tơ inh, inh gô sek tơlang tơpăt hơnơ̆ng ăn kơ lu sư.”

⁵Tơdah bơngai bu năm jê̆ drap kơkuh kơ sư, Apsalôm thar kuăr tơiung sư păng chŭm hloi.

⁶Apsalôm pơm thoi noh hăm đĭ-đăng lu bơngai Isơrael năm tơ pơtao wă apinh sek tơlang; thoi noh Apsalôm gơh đei iŏk jơhngơ̆m klơm klak bơngai Isơrael boih.

⁷Puăn sơnăm đơ̆ng rŏnga Apsalôm năm khan kơ pơtao: “Apinh ih ăn kơ kon năm tơ Hêbrôn wă pơkeh tơdrong krao apinh Kră Yang.

⁸Yua kơ kơplah đĭch đam ih oei tơ Gêsur lăm char Siri, đei krao apinh. ‘Tơdah Kră Yang ăn inh wih tơ pơlei Jêrusalem, lei inh gô năm kơkuh kơ Kră Yang, tơ Hêbrôn.’ ”

⁹Pơtao tơl khan: “Kon năm mă 'lơ̆ng. Na Apsalôm iung, năm truh tơ Hêbrôn.”

¹⁰Apsalôm kư̆m wơh lu bơngai năm tơ jơ̆p lăm lu adrĕch adrung Isơrael na pơkă khan: “Lăp 'nhŏng oh kơtơ̆ng re đe hlôm keng, lei athei wang ôr khan: ‘Apsalôm pơm pơtao tơ Hêbrôn!’ ”

¹¹Đei 'bar-hrĕng 'nu bơngai oei tơ pơlei Jêrusalem mă Apsalôm krao pơtơm, năm hơdai hăm sư, lu sư năm hăm đon 'lơ̆ng đĕch ưh kơ băt kiơ gah tơdrong Apsalôm wă pơm kơnê̆.

¹²Kơplah Apsalôm wă pơyơ̆r tơmam soi, wơh đe năm krao Ahithôphel sư bơngai hơgei tơgŭm chă pơđâu kơ Đawit oei tơ pơlei Gilô, pơlei sư hơdai. Lu bơngai chă đon pơm plơ̆ rai pran, păng khŭl kon pơlei năm kiơ̆ Apsalôm rai đunh rai lơ.

¹³Đei bơngai năm roi tơbăt ăn kơ Đawit: “Kon pơlei Isơrael kiơ̆ khŭl Apsalôm.”

¹⁴Đawit khan hloi hăm lu bơngai bơ̆jang oei hăm sư lăm pơlei Jêrusalem, “lu bơ̆n athei jah iung kơdâu weh bĕ. Tơdah ưh, lu bơ̆n ưh kơ đei bu gơh klaih đơ̆ng Apsalôm pơlôch; năm tĕnh bĕ, kơnh sư druh tam lu bơ̆n, pơrăm lu bơ̆n, păng yua đao pơlôch lu bơngai lăm pơlei.”

¹⁵Lu bơngai bơ̆jang kơ pơtao tơl khan: “Mă tơdrong pơtao yŏng tơ'ngla lu nhôn wă pơm thoi yơ, lei lu nhôn đĭch đam ih gô pơm kiơ̆ hloi.”

¹⁶Lei na, pơtao lĕch năm hơdai hăm đĭ-đăng lăm hnam pơtao; mă-lei pơtao oei lê̆ mơjĭt 'nu akăn kơnhŏng sư wă wei hnam pơtao sư.

¹⁷Pơtao lĕch năm đei kon pơlei pơla kư̆m kiơ̆, lu sư pơdơh 'bơ̆t hnam tuch-luch kơ pơlei.

¹⁸Đĭ-đăng đĭch đam pơtao păng đĭ lu bơngai Kêrêthit, bơngai Phêlêthit, păng tơdrâu-hrĕng bơngai Gitit, mă oei hơdai pơtao đơ̆ng pơlei Gat yak adrol kơ pơtao.

¹⁹Pơtao jet Itai, bơngai Gitit: “Ih kư̆m 'maih năm hơdai hăm lu nhôn mơ̆n ah? Wih bĕ, oei hăm pơtao Apsalôm. Ih bơngai tơmoi chă oei ataih đơ̆ng dêh char iĕm.

²⁰Ih oei hăm inh 'nao năr brei, na năr 'nâu ih wă kiơ̆ chă jăk ah. 'Nhŏ kơdih inh kư̆m ưh kơ băt wă năm tơ yơ? Lei ih jah wih bĕ păng chông lu 'nhŏng oh ih. Apinh tơdrong 'mêm mơnat păng tơdrong 'lơ̆ng tơpăt Kră Yang oei hơdai hăm ih!”

²¹Itai tơl: “Đei Kră Yang arih ling-lang lăng tông păng 'bơ̆t anăp pơtao yŏng inh, oei arih na inh pơkă: Mă pơtao yŏng inh oei tơ yơ, inh kư̆m oei tơ noh, mă lôch mă arih.”

²²Pơtao Đawit khan kơ Itai: “Ơ lei rai yak adrol bĕ.” Thoi noh na Itai bơngai Gitit yak hơdai hăm đĭ-đăng kon pơlei păng lu hnam dơnŏ sư, đĭ-đăng lu sư rai yak adrol.

²³Đĭ-đăng kon pơlei lăm pơlei Jêrusalem nhơ̆m ôr re kơplah lu khŭl tơpôl kon pơlei yak năm. Pơtao năm rok trong thŭng Kidrôn păng đĭ-đăng kon pơlei pơla năm rok tơklă tơ trong gah tơmăn glă.

²⁴Kŭm đei Sađŏk 'bok soi păng đĭ-đăng bơngai Lêwi tung Hom pơgơ̆p Kră Yang 'Bok Kei-Dei. Lu sư tơjur Hom Pơgơ̆p Kră Yang 'Bok Kei-Dei, na Abiathar 'bok soi pơyơ̆r tơmam soi gô dĭng đĭ-đăng kon pơlei yak hlôi đơ̆ng pơlei 'mơ̆i.

²⁵Pơtao khan dơ̆ng kơ Sadok 'bok soi: “Tung bĕ Hom pơgơ̆p Kră Yang 'Bok Kei-Dei wơ̆t tơ lăm pơlei tih. Tơdah inh đei tơdrong mơnat 'bơ̆t anăp Kră Yang sĭt Kră Yang ba inh wih, ăn kơ inh 'bôh dơ̆ng Hom Pơgơ̆p păng anih dan sư.

²⁶Mă-lei tơdah Kră Yang khan: ‘Inh ưh kơ lăp kơ ih,’ lei apinh Kră Yang hơmet inh kiơ̆ kơ Kră Yang lăp đon lăng 'lơ̆ng!”

²⁷Pơtao khan dơ̆ng: “Ih hăm hlôh, ih hăm 'bok soi Abiathar athei wih dơ̆ng tơ pơlei mă hiôk rơnŭk hơdai hăm 'bar 'nu kon drŏ-nglo iĕm, Ahimaas kon drŏ-nglo ih păng Jônathan kon drŏ-nglo Abiathar.

²⁸Gah inh, inh răp gô lăm char glă dĭng truh kơtơ̆ng nơ̆r đơ̆ng măr iĕm roi tơbăt ăn kơ inh.”

²⁹Thoi noh na Sađŏk 'bok soi păng Abiathar tung ba Hom Pơgơ̆p Kră Yang 'Bok Kei-Dei brŏk tơ pơlei Jêrusalem păng oei hloi tơ noh.

³⁰Đawit tŏk tơ kông ôliwơ; sư yak rah nhơ̆m rah gom lê̆ kơ̆l păng yak tơpang jơ̆ng hoh. Đĭ-đăng bơngai năm kiơ̆ kư̆m dai gom kơ̆l, yak rah nhơ̆m rah.

³¹Đe roi ăn kơ Đawit: “Ahithôphel kư̆m minh khŭl iung blah hơdai hăm Apsalôm.” Đawit krao apinh: “Ơ Kră Yang! Apinh Ih pơm ăn lu tơdrong tơchĕng Ahithôphel wă pơm jing kơtul kơwao.”

³²Lăp kơplah Đawit năm tŏk truh tơ kơ̆l kông, anih mă đe kơkuh kơ Kră Yang 'Bok Kei-Dei, đei Husai, bơngai Arkit, năm sơng tơ'bơ̆p sư, ao tơhek hiah păng kơ̆l 'bĕnh kơ 'mui teh.

³³Đawit khan kơ sư: “Tơdah ih năm hơdai hăm inh, lei ih gô pơhiơ̆k inh.

³⁴Mă-lei tơdah ih brŏk tơ pơlei, roi ăn kơ Apsalôm: ‘Ơ pơtao! Inh jơ̆ bơngai đĭch đam ih, adrol sơ̆ inh bơ̆jang kơ pơtao Đawit, 'bă ih, dang ei inh đĭch đam ih,’ lei na apinh ih tơgŭm inh pơm tơhiong lê̆ tơdrong Ahithôphel chă đon.

³⁵To 'bar 'nu 'bok soi Sađŏk păng Abiathar kư̆m oei tơ noh hơdai hăm ih, ih athei roi ăn kơ bre sư băt dôm tơdrong kiơ ih băt đơ̆ng lăm hnam pơtao.

³⁶'Bar 'nu bre sư kư̆m đei 'bar 'nu kon drŏ-nglo oei tơ noh, Ahimaas kon drŏ-nglo Sađŏk păng Jônathan, kon drŏ-nglo Abiathar; ih wơh bre sư athei năm roi tơbăt ăn kơ inh dôm tơdrong ih đei kơtơ̆ng.”

³⁷Na Husai, buăl juăt Đawit; wih dơ̆ng tơ pơlei lăp kơplah Apsalôm 'nao wih mơ̆t lăm pơlei Jêrusalem.