Read bahnar II Sam 16 Bible Online

II Sam 16 - bahnar bible

II Sam 16

¹Đawit 'nao tŏk hlôi kơ kơ̆l kông, na tơ'bơ̆p Siba, đĭch đam Mephibôset, năm sơng chông ba 'bar tŏ aseh iĕ tah an đei tơlei pơhơ̆p păng kơpal rŏng aseh chơ 'bar-hrĕng tơpei 'bĕng, minh-hrĕng hơchô̆ plei hơmu, minh-hrĕng tŏ 'bĕng iĕ plei hơra, păng minh pôm get hơkar 'bĕnh kơ sik hơmu.

²Pơtao jet Siba: “Ih wă pơm kiơ kơ tơmam noh?” Siba khan: “'Bar tŏ aseh iĕ noh yua ăn kơ bơngai lăm hnam pơtao hao, 'bĕng păng plei hơmu noh yua pơm tơmam sa ăn kơ khŭl linh, na sik hơmu noh wă yua ăn kơ lu bơngai brŏk đơ̆ng char glă gleh lap huch.”

³Pơtao apinh dơ̆ng: “Sâu drŏ-nglo yŏng tơ'ngla ih tơ yơ?” Siba tơl: “Sư oei tơ lăm pơlei Jêrusalem, sư tơchĕng khan: ‘Năr 'nâu rŏ lăng kon pơlei Isơrael gô pơdrâu kơ inh tang-dŏ pơtao teh đak 'bok inh.’ ”

⁴Pơtao pơma hăm Siba. “Lei na inh ăn kơ ih dôm tơmam, Mephibôset.” Siba tơl dơ̆ng: “Inh kơkuh bơnê kơ ih,” “apinh ăn kơ inh gơh lăp jơhngơ̆m ih yŏng tơ'ngla inh ling-lang.”

⁵Pơtao Đawit 'nao truh tơ pơlei Bahurim, 'bôh minh 'nu bơngai lĕch đơ̆ng lăm pơlei noh, anăn sư Simêi, kon drŏ-nglo Gêra, sư đơ̆ng adrĕch adrung Sôl na năm rah hiap rah.

⁶Simêi klơ̆m kơ Đawit tơmo păng đĭ-đăng lu đĭch đam sư. Mă khan đĭ-đăng kon pơlei pơla păng lu linh nuih kơtang oei yak gah 'ma gah 'ngiĕo tăp kơ pơtao.

⁷Simêi hiap Đawit khan: “Ơ bơngai pơlôch đe. Bơngai kư̆ kă! Weh bĕ, năm tơ nai bĕ!

⁸Kră Yang phak e, yua kơ đêl e pơlôch tuh pham lăm adrĕch adrung hnam dơnŏ Sôl. Tơgar iŏk pơm pơtao đơ̆ng Sôl, na dang ei Kră Yang gô pơjao teh đak lăm tơpang ti Apsalôm, kon drŏ-nglo e; păng e gô pŭ tơdrong pơmat-tat, kơlih yua kơ e jơ̆ minh 'nu bơngai pơlôch đe.”

⁹Đơ̆ng noh Abisai, kon drŏ-nglo Sêruia, khan kơ pơtao: “Liơ kŏ lôch 'nâu pơ̆n hiap pơtao yŏng tơ'ngla inh? Apinh pơtao lê̆ kơ inh năm chơ̆ng kơ̆l sư.”

¹⁰Pơtao tơl khan: “Ơ lu kon drŏ-nglo Sêruia, tơdrong inh 'bơm kiơ kơ lu iĕm? Lê̆ Simêi hiap, tơdah noh đơ̆ng Kră Yang athei hiap inh, na bu pơ̆n jet sư: ‘Yua kơ kiơ ih pơm thoi noh?’ ”

¹¹Đawit khan dơ̆ng kơ Abisai păng đĭ lu bơngai jang kơ sư: “To, kon inh kơdih, đơ̆ng blu pôih inh pơjing, oei 'maih pơrăm tơdrong arih inh 'mơ̆i; pơma kiơ kơ bơngai Bênjamin 'nâu! Lê̆ sư loh lê̆ sư hiap inh, yua kơ Kră Yang athei sư.

¹²Băt Kră Yang lăng 'bôh boih tơdrong pơmat-tat inh, na ăn tơdrong pŭn hiôk tơplih tơdrong sư hiap năr 'nâu.”

¹³Đawit păng lu đĭch đam sư yak nơnăm tơ anăp; na Simêi druh kiơ̆ trong tơter jơ̆ng kông. Sư nơnăm rah hiap pơtê̆ rah Đawit, klơ̆m tơmo, păng săi 'mui teh.

¹⁴Pơtao păng đĭ-đăng kon pơlei pơla kiơ̆ pơtao, năm truh tơ anih lu sư gleh lap ngăl păng pơdơh kơ lap tơ noh.

¹⁵Kơplah noh Apsalôm păng đĭ-đăng bơngai Isơrael mơ̆t lăm pơlei Jêrusalem, đei Ahithôphel kiơ̆ sư.

¹⁶Kơplah Husai, bơngai Arkit, buăl juăt Đawit, năm tơ'bơ̆p Apsalôm, sư ôr khan: “Pơtao arih sot! Pơtao arih sot!”

¹⁷Apsalôm jet Husai: “'Nâu ih wă tơ'bôh tơdrong ih 'mêm kơ buăl ih hă? Liơ mă ih ưh kơ năm kiơ̆ sư?”

¹⁸Husai tơl Apsalôm: “Inh ưh kơ năm, inh gô kiơ̆ bơngai bu mă Kră Yang, kon pơlei 'nâu, păng đĭ-đăng kon pơlei Isơrael rơih iŏk; inh gô kiơ̆ păng oei hơdai bơngai noh.

¹⁹Hloh kơ noh dơ̆ng. Inh wă bơ̆jang kơ bu, dah ưh kơ bơ̆jang kơ kon drŏ-nglo buăl inh. Thoi inh bơ̆jang kơ 'bă pơtao thoi yơ, inh kư̆m gô bơ̆jang kơ ih thoi noh mơ̆n.”

²⁰Apsalôm khan kơ Ahithôphel: “Ih chă pơđâu lăng, lu bơ̆n athei pơm kiơ̆.”

²¹Ahithôphel tơl: “Ih athei năm 'bĭch hăm lu akăn kơnhŏng 'bă ih mă lê̆ lu sư oei tơ noh wă wei-lăng hnam pơtao. Mưh đĭ-đăng bơngai Isơrael băt khan ih pơm kơnê̆ krưp kơ 'bă ih thoi noh, lei đĭ-đăng lu bơngai kiơ̆ ih, rai nuih kơtang hloh dơ̆ng.”

²²Đe pơm ăn kơ Apsalôm minh pôm bơsŭn tơ kơpal bơbŭng hnam pơtao, Apsalôm năm 'bĭch hơdai hăm lu akăn kơnhŏng 'bă sư. Đĭ-đăng bơngai Isơrael băt tơdrong noh.

²³Lăm kơplah noh đe lăng tơdrong tơchĕng Ahithôphel nhen thoi nơ̆r pơma đơ̆ng tơ'ngla Kră Yang 'Bok Kei-Dei. Lu tơdrong tơchĕng Ahithôphel, mă pơtao Đawit, păng Apsalôm, tă kơ mơ̆ng kiơ̆ nơ̆r Ahithôphel thoi noh ngăl.