Read bahnar II Sam 17 Bible Online

II Sam 17 - bahnar bible

II Sam 17

¹Ahithôphel pơma pơđâu hăm Apsalôm: “Apinh ih ăn kơ inh rơih iŏk mơjĭt-'bar rơbâu 'nu linh. Inh gô lĕch druh 'moi Đawit lăm măng 'nâu.

²Inh gô druh blah sư lăm kơplah sư rơmơ̆n gleh lap, phôch kơ jơhngơ̆m, pơm ăn kơ sư hli tơrơ; đĭ-đăng kon pơlei năm kiơ̆ sư gô kơdâu tơklah tơklang, inh gô pơlôch minh 'nu pơtao đĕch.

³Inh gô chông ba đĭ-đăng kon pơlei pơla wih tơ ih; mưh lu sư wih brŏk đĭ, lăp minh 'nu mă ih oei druh chă noh đĕch; na đĭ-đăng kon pơlei pơla gô đei tơdrong hiôk rơnŭk.”

⁴Apsalôm păng lu bơngai kră Isơrael iŏk kiơ̆ nơ̆r noh khan 'lơ̆ng.

⁵Mă-lei Apsalôm khan: “Athei krao Husai, bơngai Arkit hai mơ̆n, wă kơ lu bơ̆n kư̆m mơ̆ng lăng nơ̆r sư pơma.”

⁶Lăp Husai mơ̆t lăm hnam, na Apsalôm roi kơ sư: “Ahithôphel pơđâu thoi âu; lu bơ̆n wă pơm kiơ̆ nơ̆r sư ưh? Dah ưh apinh ih khan lăng liơ?”

⁷Husai tơl: Nơ̆r pơma pơđâu Ahithôphel dĭng 'nâu ưh kơ 'lơ̆ng ôh.

⁸Husai pơma dơ̆ng: Ih băt boih, pơtao 'bă păng lu bơngai kiơ̆ sư jơ̆ lu bơngai nuih pran kơtang, đei jơhngơ̆m tơtŏ, blĕk dêh thoi kơ chơgơu yŏng tơ bri mă đe rôp kon sư. Hloh kơ noh dơ̆ng pơtao 'bă jơ̆ minh 'nu bơngai juăt kơ tơblah wang, kơmăng sư ưh kơ 'bĭch hơdai hăm lu linh ôh.

⁹Băt dang ei sư oei ôn lăm trôm hơgơp ayơ dah lăm anih ayơ nai. Tơdah đei bơngai lăm khŭl bơ̆n lôch 'bơ̆t năr tơblah blŭng-a, bu bu kơtơ̆ng kư̆m gô khan: ‘Khŭl linh kiơ̆ Apsalôm thuơ boih.’

¹⁰Kơplah noh, lu bơngai nuih kơtang đei jơhngơ̆m thoi Dăm-brang kư̆m hli tơrơ tơtơ̆; yua kơ đĭ-đăng bơngai Isơrael băt kơ pơtao 'bă ih jơ̆ minh 'nu bơngai tơblah hơgei păng lu bơngai kiơ̆ sư tă kơ đei jơhngơ̆m nuih pran ngăl.

¹¹“Na inh pơđâu khan kơ bơ̆n athei krao akŭm đĭ-đăng linh lăm kon pơlei Isơrael, iŏk ba dơ̆ng pơlei Đan truh tơ Bêrsêba, akŭm jum dăr kơ ih, lơ thoi chuơh đak dơsĭ, na ih kơdih gô pơgơ̆r lu sư năm tơblah.

¹²Lu bơ̆n gô năm blah Đawit, mă sư oei tơ anih ayơ, lu bơ̆n gô bruh tơ kơpal sư thoi tŭk jur tơ kơpal teh; na sư păng bơngai kiơ̆ sư ưh kơ đei bu gơh klaih.

¹³Tơdah sư kơdâu ôn tơ lăm pơlei ayơ, đĭ-đăng linh Isơrael gô iŏk tơlei giĕn dăng jum dăr pơlei noh, na dui pơlei noh păk hơlih tơ lăm thŭng thong, dĭng mah ưh pă đei 'bôh minh pôm tơmo hơga ayơ oei oei.”

¹⁴Apsalôm păng đĭ-đăng kon pơlei Isơrael tă kơ lăp ngăl khan tơdrong tơchĕng chă đon Husai, bơngai Arkit, hơgei hloh kơ tơdrong tơchĕng Ahithôphel. Yua kơ Kră Yang pơrăm lê̆ tơdrong tơchĕng gơh hơgei Ahithôphel, wă tuh tơdrong pơmat-tat ăn kơ Apsalôm.

¹⁵Husai roi ăn kơ bre 'bok soi Sađŏk păng Abiathar mơ̆ng khan: “Ahithôphel pơđâu thoi âu hăm Apsalôm păng lu kră bơngai Isơrael, na inh kư̆m đei pơđâu thoi âu,

¹⁶Na dang ei măr iĕm wơh bơngai jah năm roi tơbăt kơ Đawit: ‘'Nĕ pơdơh kơmăng 'bơ̆t glung đơng tơnŏk juăt kơ tŏk năm tơ char glă; athei tŏk năm hloi, kơnh hli kơ pơtao păng lu bơngai kiơ̆ pơtao đe gô pơlôch.’ ”

¹⁷Jônathan păng Ahimaas dơ̆ng gô tơ đak glung Ên Rôgel, đei minh 'nu bơngai drŏ-kăn juăt kơ năm roi tơbăt ăn kơ lu sư, na bre sư roi ăn kơ Đawit. Bre sư ưh kơ pơ̆n mơ̆t lăm pơlei hli kơ đe 'bôh.

¹⁸Mă-lei đei minh 'nu bơngai tơdăm 'bôh bre sư, na năm roi hloi kơ Apsalôm băt. Bre Jônathan Ahimaas. Hăt hot kơ weh năm tơ hnam minh 'nu bơngai lăm pơlei Bahurim. Cham hnam 'bok 'nâu đei minh pôm đak sơlŭng. Na bre sư jur tơ lăm noh.

¹⁹Akăn 'bok 'nâu iŏk minh blah 'bi tơsu klơ̆p lê̆ 'bơ̆r đak sơlŭng, đơ̆ng noh sư tuh 'ba tơ'bâu sơ̆k kơpal noh, wă kơ đe ưh kơ băt.

²⁰Lu đĭch đam Apsalôm năm tơ hnam bơngai drŏ-kăn 'nâu na jet khan: “Ahimaas păng Jônathan tơ yơ?” Bơngai drŏ-kăn ei tơl khan: “'Bar 'nu bre sư năm tŏk hlôi kơ đak glung boih.” Lu linh druh kiơ̆ chơchă, mă-lei ưh kơ đei tơ'bơ̆p, na wih dơ̆ng tơ Jêrusalem.

²¹Wă lu sư năm hloh boih, Ahimaas păng Jônathan tŏk đơ̆ng đak sơlŭng, đơ̆ng noh năm tơbăt tơdrong 'nâu ăn kơ Đawit: “Apinh pơtao păng lu bơngai bơ̆jang hăm ih, iung bĕ, mă tĕnh jah năm tŏk hlôi kơ đak Krong, yua kơ Ahithôphel pơđâu wă pơrăm ih:”

²²Đawit păng đĭ-đăng lu bơngai kiơ̆ sư tŏk hlôi kơ đak Krong Jôrđăn. Lăp 'brưch hơdah pơgê ưh pă đei minh 'nu bơngai bu mă ưh tam tŏk hlôi kơ đak Krong.

²³Ahithôphel 'bôh đe ưh kơ wă kiơ̆ tơdrong sư pơđâu, na hao hloi aseh iĕ sư brŏk tơ hnam pơlei sư kơdih tơ Gilô. Đang kơ sư hơmet dôm tơdrong jang lăm hnam dơnŏ sư keh boih, sư hrek hơlŏng kơdih lôch. Đe 'bŭ sư hơdai tơ lăm bơsat 'bă sư.

²⁴Đawit năm truh tơ pơlei Mahanaim, kơplah noh Apsalôm năm hăm đĭ-đăng lu linh Isơrael kiơ̆ sư tŏk hlôi kơ đak Krong Jôrđăn.

²⁵Apsalôm pôk Amasa pơm yŏng linh pơtrơp đơ̆ng Jôap. Amasa kon drŏ-nglo Jether adrĕch bơngai Isơrael. Jether sơ̆ sư oei kơ Abigail, kon adruh Nahas, mŏ Sêruia, mĕ Jôap.

²⁶Khŭl bơngai Isơrael păng Apsalôm pơm kơđông pơdơh lăm dêh char Gileat.

²⁷Lăp pơtao Đawit truh tơ pơlei Mahanaim, na Sôbi kon drŏ-nglo Nahas đơ̆ng pơlei Rapba kon pơlei Ammôn Makir kon drŏ-nglo Ammiel đơ̆ng pơlei Lôdêbar păng Barsilai bơngai Gileat đơ̆ng pơlei Rôgelim,

²⁸chĕp ba ăn kơ Đawit păng kơ đĭ-đăng bơngai kiơ̆ sư. Lu hơkok, pơnhan, lu bô̆i teh, 'ba mi, 'ba tơ'bâu, tơpŭng, găr hơdrĕng, lơ găr tơh, păng lơ găr hơdrĕng nai,

²⁹đak sut, đak toh iŭ, triu păng 'bĕng đak toh rơmo, wă ăn kơ Đawit păng lu linh sư sa, yua kơ lu sư băt kon pơlei ơ̆t ưh kơ đei por ol kơ đak păng gleh glăn pơmat-tat dêh lăm char glă.