Read bahnar II Sam 19 Bible Online

II Sam 19 - bahnar bible

II Sam 19

¹Đe năm roi ăn kơ Jôap: “Pơtao nhơ̆m hmoi dêh ơh 'mêm kơ Apsalôm”

²Lăm năr tơdrong sư tơblah jei, tơplih jing tơdrong ơh sơ'ngon kơ đĭ-đăng kon pơlei pơla, yua kơ kon pơlei pơla kơtơ̆ng ang khan pơtao nhơ̆m hmoi ơh sơ'ngon 'mêm kơ kon sư.

³Lăm năr noh khŭl linh klen klon mơ̆t lăm pơlei nhen thoi lu khŭl linh mơlâu klen klon kơdâu ôn đơ̆ng tơblah.

⁴Kơplah noh pơtao gom muh măt hmoi ôr re khan: “Ơ Apsalôm kon dăm inh! Ơ Apsalôm kon dăm inh! Kon dăm inh!”

⁵Jôap mơ̆t lăm hnam pơtao păng khan: “Năr 'nâu pơtao pơm ăn kơ đĭ-đăng lu đĭch đam ih mơlâu, jơ̆ lu bơngai noh boih mă dŏng pơklaih tơdrong arih pơtao, lu kon drŏ-nglo drŏ-kăn pơtao, hăm dŏng pơklaih đĭ-đăng tơdrong arih lu akăn tơm păng lu akăn kơnhŏng ih hai mơ̆n.

⁶Na, ih 'mêm kơ lu bơngai areh kơ ih na areh kơ lu bơngai mă 'mêm kơ ih! Tơdrong mă pơtao pơm năr 'nâu wă kơ lu yŏng pơgơ̆r linh păng lu linh pơtao 'bôh hơđăl, ih lăng lu sư ưh kơ đei lĕch kiơ. Inh 'bôh hơđăl pơtao gô lăp đon ngei tơdah Apsalôm oei arih năr 'nâu, mă khan đĭ-đăng kơ lu nhôn lôch.

⁷Thoi noh dang ei pơtao jah iung bĕ, năm pơma pơlung jơhngơ̆m lu đĭch đam ih hloi; inh pao anăn Kră Yang na pơkă, tơdah pơtao ưh kơ năm pơlung, lei lăm măng 'nâu ưh kơ đei minh 'nu bơngai bu oei hơdai hăm ih; păng noh boih tơdrong gô truh pơmat trăp hloh kơ lu tơdrong đei truh kơ pơtao mă đơ̆ng kơplah oei 'lơ̆p sơ̆ truh kơ dang ei.”

⁸Pơtao iung lĕch ngôi 'bơ̆t 'măng jang pơlei. Đĭ-đăng kon pơlei pơla băt khan pơtao ngôi 'bơ̆t 'măng jang pơlei, na pơma dơnuh hăm pơtao. Kơplah noh lu linh Isơrael kơdâu brŏk tơ hnam lu sư kơdih.

⁹Lăm lu adrĕch adrung Isơrael lu sư pơđâu băl khan: “Pơtao dŏng pơklaih boih lu bơ̆n đơ̆ng ti bơngai ayăt kơ lu bơ̆n, păng sư đei pơklaih lu bơ̆n đơ̆ng ti lu bơngai Philistin. Na dang ei, sư mah kơdâu ôn đơ̆ng dêh char yua kơ Apsalôm.

¹⁰Na Apsalôm mă lu bơ̆n tuh boih đak pơgang 'bâu phu pôk pơm pơtao lu bơ̆n, dang ei lôch boih. Lei na, dang ei liơ lu bơ̆n ưh kơ pơma pơđâu pơtơm pơtao brŏk?”

¹¹Nơ̆r đĭ-đăng bơngai Isơrael pơma băl gah tơdrong sơng iŏk pơtao brŏk kơtơ̆ng truh tơ pơtao boih; pơtao Đawit wơh bơngai năm tơ bre 'bok soi, Sađŏk, păng Abiathar: “Măr iĕm khan bĕ kơ lu bơngai kră Juđa: ‘Liơ mă tă tơ lu iĕm jing bơngai tuch-luch năm krao pơtơm pơtao brŏk tơ hnam sư?’

¹²Lu iĕm jơ̆ 'nhŏng oh inh, jơ̆ sĕch akar inh! Liơ mă lu iĕm jing tă tơ bơngai tuch-luch krao pơtơm pơtao brŏk?

¹³Apinh măr iĕm kư̆m athei khan kơ Amasa: ‘Ih jơ̆ sĕch akar inh. Tơdah đơ̆ng âu tơ anăp ih ưh kơ pơm yŏng pơgơ̆r linh tơplih Jôap lei apinh Kră Yang 'Bok Kei-Dei phak inh trăp hloh!’ ”

¹⁴Pơtao Đawit pơm lăp đon kơ đĭ-đăng bơngai Juđa, lu sư minh jơhngơ̆m đon wơh bơngai năm wơ̆n pơtao: “Apinh pơtao hăm đĭ-đăng đĭch đam pơtao wih brŏk bĕ.”

¹⁵Na pơtao iung brŏk truh 'bơ̆t đak Krong Jôrđăn. Lu bơngai Juđa kư̆m năm truh sơng iŏk pơtao 'bơ̆t Gilgal wă ba pơtao năm tŏk hlôi kơ đak Krong Jôrđăn.

¹⁶Simêi, kon drŏ-nglo Gêra, bơngai Bênjamin oei tơ Bahurim, hăt hot năm jur hăm lu bơngai Juđa wă sơng pơtao Đawit.

¹⁷Simêi chông ba minh-rơbâu 'nu bơngai Bênjamin kiơ̆ sư. Siba, đĭch đam wei-lăng hnam Sôl, hăm mơjĭt-pơđăm 'nu kon drŏ-nglo, păng 'bar-jĭt 'nu đĭch đam sư, lu sư năm hăt hot truh tơ đak Krong Jôrđăn, adrol kơ pơtao.

¹⁸Lu sư glơi wih wơ̆t to âu wă hơtŏk hnam dơnŏ pơtao tŏk kơ krong, păng pơm dôm tơdrong kiơ pơtao wă. Simêi, kon drŏ-nglo Gêra, kơkuh drap ala jơ̆ng pơtao Đawit kơplah pơtao wă tŏk kơ đak Krong Jôrđăn.

¹⁹Sư khan kơ pơtao: “Apinh yŏng tơ'ngla inh, 'nĕ kơ jô̆ tơdrong yoch kơnê̆ inh, păng 'nĕ kơ 'blŏk tơdrong đĭch đam ih mă đei pơm yoch boih lăm năr ih yŏng tơ'ngla inh lĕch đơ̆ng pơlei Jêrusalem. Apinh ih 'nĕ pă 'blŏk răk tơdrong noh.

²⁰Yua kơ inh đĭch đam ih băt kơdih yoch boih. Na dang ei lăm đĭ-đăng adrĕch hnam Jôsep, inh boih truh adrol wă jur sơng ih yŏng tơ'ngla inh.”

²¹Abisai, kon drŏ-nglo Sêruia, tơl khan: “Simêi ưh kơ trŏ pơlôch sư yua kơ tơdrong noh hă? Sư bơngai hiap pơtê̆ tơ'ngla mă Kră Yang rơih iŏk!”

²²Đawit khan: “Ơ lu kon drŏ-nglo yă Sêruia, tơdrong inh 'bơm kiơ kơ lu iĕm, na lu iĕm mă oei wă ayăt kơ inh năr 'nâu? Hăm gơh pơlôch minh 'nu bơngai ayơ lăm teh đak Isơrael năr âu ưh? Inh ưh kơ băt năr 'nâu inh pơm pơtao Isơrael hă?”

²³Pơtao pơkă hăm Simêi: “Ih ưh kơ đei lôch ôh.”

²⁴Mephibôset sâu drŏ-nglo Sôl, kư̆m năm jur sơng pơtao, sư ưh kơ đei ôp jơ̆ng, yuă sŏk kang dah pih hơbĕn ao sư iŏk đơ̆ng năr pơtao yak năm truh tơ năr pơtao wih brŏk hiôk-hian.

²⁵Kơplah sư đơ̆ng pơlei Jêrusalem năm sơng pơtao, Đawit jet sư: “Ơ, Mephibôset, liơ ih ưh kơ năm hăm inh?”

²⁶Sư tơl: “Ơ pơtao yŏng tơ'ngla inh! Đĭch đam inh hơlĕnh kơ inh,” inh athei sư: “Năm chă ăn kơ inh aseh iĕ, inh wă hao năm kiơ̆ pơtao, yua kơ inh đĭch đam ih âu jopo

²⁷Sư roi hơlĕnh kơ inh hăm ih yŏng tơ'ngla inh; mă-lei pơtao yŏng tơ'ngla inh thoi lĕ minh 'nu linh jang 'lơ̆ng Kră Yang 'Bok Kei-Dei. Apinh ih pơm kơ inh kiơ̆ kơ ih tơchĕng trŏ.

²⁸Tơpă, lu bơngai lăm adrĕch hnam 'bă inh trŏ kơ pơlôch. Mă-lei pơtao ăn kơ inh gơh song sa hơdai hăm pơtao tơ gơ'bang. Lei na, inh wă đei tơdrong kiơ dơ̆ng gơh pơma hăm pơtao?”

²⁹Pơtao khan: “Ih huay pă pơma dơ̆ng. Inh athei boih ih păng Siba asong băl teh.”

³⁰Mephibôset khan: “Lê̆ Siba iŏk đĭ kư̆m bưh mơ̆n, đei pơtao yŏng tơ'ngla inh wih brŏk hiôk-hian tơ hnam noh inh hiôk boih.”

³¹Barsilai bơngai Gileat kư̆m jur năm đơ̆ng pơlei Rogelim, năm kiơ̆ ba pơtao tŏk hlôi kơ đak Krong Jôrđăn.

³²Barsilai kră dêh boih, sư đei tơhngam-jĭt sơnăm. Sư boih bơngai ăn kơ pơtao tơmam sa kơplah pơtao oei lăm pơlei Mahanaim, yua kơ sư mơdrŏng dêh.

³³Pơtao khan kơ Barsilai: “Năm tŏk kơ đak Krong Jôrđăn hơdai inh, păng oei hăm inh tơ pơlei Jêrusalem inh gô wei rong ih.”

³⁴Mă-lei Barsilai tơl pơtao: “Inh oei arih dôm yơ sơnăm dơ̆ng na mah năm oei hăm ih tơ pơlei Jêrusalem?

³⁵Dang ei inh đei tơhngam-jĭt sơnăm boih, inh ưh pă băt kơ tơdrong 'lơ̆ng păng tơdrong kơnê̆ dơ̆ng boih Đĭch đam ih kư̆m ưh pă băt kơ tơmam sa, đak nhă nham dah ưh. Kŭm ưh pă gơh mơ̆ng nơ̆r hơri lu khŭl drŏ-nglo, drŏ-kăn hiôk dah ưh Đĭch đam ih pơnĕ pơm pơmat kơ pơtao yŏng tơ'ngla inh đĕch

³⁶Đĭch đam pơtao adrin tŏk hlôi kơ Krong Jôrđăn hăm pơtao đĕch, ưh kơ trŏ kơ pơtao mah wă apah inh thoi noh

³⁷Apinh ăn kơ inh brŏk, wă kơ inh lôch lăm pơlei inh, jê̆ bơsat mĕ 'bă inh, mă-lei đei Kimham âu, đĭch đam ih; ăn kơ sư kiơ̆ ih yŏng tơ'ngla inh, păng apinh ih wei rong sư kiơ̆ kơ ih tơchĕng.”

³⁸Pơtao tơl: “Kimham gô năm kiơ̆, păng inh gô rong ba sư kiơ̆ kơ ih wă. Ih apinh inh tơdrong kiơ, inh gô ăn kơ ih.”

³⁹Na đĭ-đăng linh păng kon pơlei tŏk găn kơ đak Krong Jôrđăn, pơtao kư̆m tŏk, pơtao chŭm Barsilai păng tơklah băl. Barsilai wih tơ pơlei sư kơdih.

⁴⁰Đơ̆ng noh pơtao năm truh tơ pơlei Gilgal. Kimham kư̆m năm, đĭ-đăng kon pơlei Juđa, păng hloh kơ minh puăt kon pơlei Isơrael kư̆m năm kiơ̆ ba pơtao.

⁴¹Đĭ-đăng lu bơngai Isơrael năm jet pơtao: “Liơ 'nhŏng oh lu nhôn bơngai Juđa klĕnh chông ba ih, hnam dơnŏ ih păng đĭ-đăng bơngai kiơ̆ ih tŏk kơ đak Krong Jôrđăn?”

⁴²Bơngai Juđa tơl: “Yua kơ lu nhôn 'nhŏng oh hăm pơtao. Na liơ mă lu iĕm blĕk? Lu nhôn đei sa yua tơmam kiơ đơ̆ng pơtao ưh? Pơtao hăm đei ăn đĕch kơ lu nhôn tơmam kiơ?”

⁴³Bơngai Isơrael tơl bơngai Juđa: “Lu nhôn hăm hnam pơtao 'bơm hloh kơ lu iĕm mơjĭt wơ̆t, na gah Đawit lu nhôn jê̆ hloh kơ lu iĕm; na liơ mă lu iĕm klai kơ lu nhôn? Lu nhôn boih pơđâu adrol wă sơng pơtao brŏk dah kiơ?” Mă-lei nơ̆r pơma lu bơngai Juđa tơl; oei trăp hloh kơ nơ̆r pơma bơngai Isơrael.