Read bahnar II Sam 22 Bible Online

II Sam 22 - bahnar bible

II Sam 22

¹Pơtao Đawit pơyơ̆r kơ Kră Yang lu nơ̆r hơri 'nâu, đơ̆ng rŏng kơ Kră Yang dŏng pơklaih sư đơ̆ng ti bơngai ayăt păng đơ̆ng ti pơtao Sôl.

²Pơtao hơri: “Kră Yang jơ̆ kông tơmo păng kơđông kơjăp inh, Tơ'ngla dŏng pơklaih inh!

³Kră Yang 'Bok Kei-Dei jơ̆ kông tơmo anih inh gơnang jơ̆ khêl pĕng inh, hơke dŏng pơklaih inh, hnam Thôt kơjung kơjăp anih inh kơ'nơp; Tơ'ngla dŏng pơklaih! Ih boih dŏng inh đơ̆ng bơngai pơm kơnê̆.

⁴Ơ Kră Yang, inh hơri ư-ang kơ ih; inh krao apinh Ih, na inh gơh klaih đơ̆ng lu bơngai ayăt kơ inh.

⁵Tơdrong lôch thoi đak dơsĭ poh-yă wang tăp dăr kơ inh, tơdrong lôch thoi chơkơi đak huơ̆r pơdăr răp lê̆ tơ noh boih.

⁶Tơlei anih lôch wăr tăp kơ inh, hơđong tơdrong lôch oei răp inh.

⁷Lăm tơdrong truh pơmat inh krao apinh Kră Yang. Inh ôr krao Kră Yang 'Bok Kei-Dei inh, đơ̆ng anih hnam Kră Yang kơtơ̆ng nơ̆r inh krao ôr, Ih pơgling đon mơ̆ng inh krao apinh.

⁸Kơplah noh teh adrŏ kyĭng kyơ̆ng, hơnă lu plĕnh kư̆m adrŏ gĭl-gŭl, yua kơ Kră Yang hil mĭl.

⁹'Nhui lĕch đơ̆ng trôm muh Kră Yang, 'bơ̆r Kră Yang bluh pla ŭnh soh chhông ngar ngŭr khơ̆ng.

¹⁰Kră Yang hek lu plĕnh, jur tơ ala. Jơ̆ng juă kơpal hơmơ̆l găm hơ'bơ̆l.

¹¹Kră Yang hao kơpal chêrubim na păr, 'bôh Sư tơ kơpal jơwa pơnăr kial.

¹²Kră Yang dăng măng mu tăp kơ Sư, hơmơ̆l 'mi găm hơ'bơ̆l đơ̆ng plĕnh klơ̆p lê̆ Sư.

¹³Đơ̆ng lăm rang mơnhal 'bơ̆t anăp Sư. Lĕch hloi đei 'mi prĕl păng ngar ngŭr.

¹⁴Kră Yang ăn grơ̆m glaih kơpal plĕnh. Nơ̆r re jơwa đơ̆ng Tơ'ngla Kơjung hloh kơ đĭ-đăng.

¹⁵Kră Yang prah 'brơ̆m, lu ayăt kơ inh kơdâu bru bra, tơlĕch kơmlat chêr 'blêt pơm kơ lu sư tơklah tơklang.

¹⁶Đơ̆ng nơ̆r Kră Yang chrih hiap kơđĕl đak dơsĭ 'bôh tơ 'nguaih, bluh kial đơ̆ng trôm muh, hơnă teh 'bôh bang.

¹⁷Đơ̆ng plĕnh kơjung Kră Yang chro ti rôp iŏk inh, dui hơtŏk inh đơ̆ng đak jrŭ.

¹⁸Kră Yang dŏng pơklaih inh đơ̆ng lu bơngai ayăt pơm kơtang dêh. Hlôi kơ đơ̆ng lu bơngai areh kơ inh, yua kơ lu sư pran hloh kơ inh.

¹⁹Lăm năr truh kơ inh pơmat-tat lu sư bruh tơ inh. Mă-lei Kră Yang dŏng tơgŭm inh.

²⁰Kră Yang dui anhăk inh lĕch tơ anih rơhơi, Sư dŏng pơklaih inh yua kơ Sư 'mêm kơ inh.

²¹Kră Yang đei apah inh kiơ̆ kơ tơdrong tơpăt hơnơ̆ng inh. Kră Yang tơwih kơ inh kiơ̆ kơ đêl ti inh 'lơ̆ng rơgoh.

²²Inh wei răk kiơ̆ trong Kră Yang bơtho. Ưh kơ đei pơm kơnê̆ achăng lê̆ Kră Yang 'Bok Kei-Dei inh.

²³Yua kơ dôm tơdrong juăt Kră Yang tơtă oei 'bơ̆t anăp inh. Inh ưh kơ weh đơ̆ng tơdrong juăt Sư.

²⁴Kră Yang băt kơ inh chu kiơ̆ tôm tơdrong Sư. Păng inh bơwei akâu kơdih ưh kơ pơm kơnê̆.

²⁵Na Kră Yang tuh tơdrong pŭn hiôk ăn kơ inh, yua kơ inh chu yom nơ̆r Sư, yua kơ Kră Yang băt kơ inh 'lơ̆ng rơgoh.

²⁶Kră Yang đei jơhngơ̆m 'mêm mơnat kơ bơngai ayơ mă tơnăp chu yom nơ̆r Sư. Kră Yang pơm 'lơ̆ng tôm tơdrong kơ bơngai chu kiơ̆ Sư.

²⁷Kră Yang pơm 'lơ̆ng tơpăt hăm lu bơngai 'lơ̆ng tơpăt. Mă-lei Kră Yang wă phak lu bơngai hơlĕnh pơdăr kiơ̆ kơ tơdrong jang lu sư pơm.

²⁸Kră Yang dŏng pơklaih lu bơngai iŏk đon ala kơ đe. Mă-lei măt Sư 'bôh lu bơngai pơang, Kră Yang gô tơjur lu sư.

²⁹Ơ Kră Yang Ih jơ̆ ŭnh kơđeng inh, pơchrang lăm jơhngơ̆m inh puh tơweh lê̆ măng mu tơdrong yoch păng tơdrong lôch.

³⁰Hăm jơhngơ̆m pran Ih inh blah drŭt lu ayăt, gơnang kơ Kră Yang 'Bok Kei-Dei inh plŏng hlôi kơ dur pơlei.

³¹Ơ Kră Yang 'Bok Kei-Dei, trong Ih 'lơ̆ng tơpăt; Nơ̆r Kră Yang pơkă trŏ kơ lui ngeh tơpă. Kră Yang jơ̆ khêl pĕng lu bơngai ôn kơ'nơp lăm Sư.

³²'Nguaih kơ Kră Yang, bu dơ̆ng Kră Yang 'Bok Kei-Dei? Bu thoi tơmo tih, 'nguaih kơ Kră Yang 'Bok Kei-Dei lu nhôn mă kơkuh?

³³Ơ Kră Yang 'Bok Kei-Dei, Ih boih anih inh ôn kơjăp, Ih wei inh yak năm hơđơ̆ng.

³⁴Kră Yang ăn kơ jơ̆ng inh hơbĕch hơbal thoi jơ̆ng juei. Kră Yang dan inh dơ̆ng kơjăp kơpal kơ̆l kông.

³⁵Kră Yang pơjuăt ti inh gơh tơblah tơpang ti inh kĕ gŭt hră kong.

³⁶Kră Yang thoi khêl dŏng pơklaih inh; Kră Yang tơjur akâu Sư tơ ala wă hơtŏk inh tơ kơpal.

³⁷Kră Yang pơih trong să ăn kơ inh nơnăm. Na inh ưh kơ đei kơtơih pơ̆k.

³⁸Inh druh pơrăm khŭl ayăt, đơ̆ng rŏng kơ pơlôch lê̆ lu sư 'mơ̆i na inh gơh brŏk.

³⁹Inh pơlôch đĭ lu sư teh pơrăm lê̆ lu sư. Lu sư ưh kơ kĕ kơ iung dơ̆ng lu sư pơ̆k 'bơ̆t ala jơ̆ng inh.

⁴⁰Kră Yang ăn kơ inh đei jơhngơ̆m pran wă tơblah. Kră Yang pơm ăn kơ bơngai ayăt pơtăm kŭl-tăng drap ala jơ̆ng inh.

⁴¹Kră Yang pơm ăn kơ bơngai ayăt tơwih rŏng kơdâu ôn, Inh pơlôch lu bơngai ayăt kơ inh.

⁴²Lu sư krao ôr wă kơ dŏng, mă-lei ưh kơ đei bu dŏng tơgŭm, Lu sư krao chă Kră Yang mă-lei Kră Yang ưh kơ đei tơl nơ̆r.

⁴³Inh teh pơhĕch lu sư thoi 'mui teh, Inh pơjuă păng juă bơhlơ̆r lu sư hĕch thoi teh rơpŭk rok trong.

⁴⁴Kon pơlei blah plơ̆ inh, Kră Yang dŏng pơklaih inh đơ̆ng tơdrong noh. Ih dan inh pơm kơ̆l kơ lu teh đak, kon pơlei mă inh ưh kơ băt noh, chu yom kơ inh.

⁴⁵Lu bơngai dêh char 'nguaih drap 'bơ̆t anăp inh. Lăp kơtơ̆ng roi gah inh, lu sư chu kiơ̆ hloi.

⁴⁶Lu bơngai dêh char 'nguaih hiong đĭ jơhngơ̆m pran, Đơ̆ng lăm kơđông kơjăp hli tơtơ̆ kơdâu lĕch tơ 'nguaih.

⁴⁷Kră Yang mă arih ling-lang! Inh hơri ư-ang kơ ih jơ̆ tơmo tih anih mă inh kơ'nơp! Inh ư-ang kơ Kră Yang 'Bok Kei-Dei, Ih boih tơmo tih pĕng inh, Ih dŏng pơklaih inh đơ̆ng tơdrong hli krưp!

⁴⁸Kră Yang 'Bok Kei-Dei, Ih boih Tơ'ngla blah 'mong tang inh, Ih pơm ăn kơ kon pơlei chu yom kơ inh.

⁴⁹Ih dŏng pơklaih inh đơ̆ng lu bơngai ayăt, ăn kơ inh kĕ jei blah lu bơngai ayăt. Dŏng pơklaih inh đơ̆ng lu bơngai pơm kơnê̆.

⁵⁰Yua kơ thoi noh, ơ Kră Yang, inh apinh ư-ang kơ Ih lăm kon pơlei pơla, păng hơri ư-ang kơ anăn Ih.

⁵¹Kră Yang ăn tơdrong kĕ jei jơnei tih kơ pơtao mă Ih đei rơih iŏk. Kră Yang 'mêm kơ bơngai mă Kră Yang ăn kơ đe tuh đak pơgang 'bâu phu noh tơdrong 'mêm kơjăp, ưh kơ đei tơplih. Kră Yang 'mêm kơ Đawit păng adrĕch adrung sư, ling-lang ưh kơ đei layơ tôch.”