Read bahnar II Sam 4 Bible Online

II Sam 4 - bahnar bible

II Sam 4

¹Băt kơ Apner lôch boih tơ Hêbrôn, Isbôset kon drŏ-nglo pơtao Sôl jơhngơ̆m sư tơtơ̆ păng đĭ-đăng bơngai Isơrael rŭng răng hli tơrơ.

²Pơtao Isbôset kon tơdăm Sôl đei 'bar 'nu yŏng linh, minh 'nu anăn Baanah, minh 'nu anăn Rêkap: Pơđĭ kơ bre sư kon tơdăm Rimmôn đơ̆ng pơlei Bêrôt adrĕch Bênjamin; yua kơ pơlei Bêrôt kư̆m jô̆ pơlei lăm tơring Bênjamin,

³Kon pơlei Bêrôt kơdâu ôn đĭ tơ pơlei Gitaim, lu sư oei truh tơ dang ei.

⁴Jônathan, kon tơdăm Sôl đei minh 'nu kon drŏ-nglo hơwen 'bar pah jơ̆ng. Lăp gơ̆p roi tơbăt Jônathan hăm Sôl lôch tơ Jêsreel, kơplah noh sư đĭ pơđăm sơnăm boih, bơngai rong tơmŏm sư pôk anhăk sư kơdâu ôn; kơplah sư kơdâu hăt hot sư huŏng đơ̆ng ti na jing jo. Anăn sư Mêphibôset.

⁵'Bar 'nu kon drŏ-nglo Rimmôn đơ̆ng pơlei Bêrôt, noh Rêkap hăm Baanah kơplah tŏk-bŏk 'năr tŏ. Năm truh tơ hnam Isbôset, sư oei tep pơdơh 'năr dơ̆ng.

⁶Măr sư mơ̆t hloi lăm hnam, chă pơchĕ khan wă năm iŏk 'ba. Na 'bet hloi 'bơ̆t klak Isbôset. Đơ̆ng noh Rêkap hăm Baanah 'nhŏng sư kơdâu ôn.

⁷Bre sư 'bet pơlôch boih pơtao Isbôset kơplah oei tep kơpal giơng lăm anih tep, chơ̆ng iŏk kơ̆l sư, chĕp ba na năm tơpăt trong dơnă Araba prăt măng.

⁸Măr sư chĕp ba kơ̆l Isbôset brŏk tơ Hêbrôn, ăn kơ pơtao Đawit, na khan: “'Nâu kơ̆l Isbôset, kon tơdăm Sôl, bơngai mă ayăt kơ ih, bơngai mă oei chă wă pơrăm ih; năr 'nâu Kră Yang iung kơting ăn kơ ih pơm tơwih boih kơ Sôl păng adrĕch adrung sư.”

⁹Đawit tơl bre Rêkap hăm Baanah kon tơdăm Rimmôn pơlei Bêrôt: “Inh pao anăn Kră Yang mă arih ling-lang, Tơ'ngla dŏng inh đơ̆ng dôm tơdrong gleh truh,

¹⁰Kơplah bơngai năm roi ăn kơ inh khan, Sôl lôch boih, sư tơchĕng khan sư năm roi ăn tơdrong hiôk chơt. Inh athei đe rôp păng pơlôch sư tơ pơlei Siklak, noh inh apah kơ tơdrong sư roi.

¹¹Pơma kơ kiơ kơ lu bơngai pơm kơnê̆ pơlôch bơngai 'lơ̆ng oei 'bĭch tep kơpal giơng lăm hnam sư kơdih! Inh wă apinh pham bơngai noh đơ̆ng ti măr iĕm păng inh gô pơlôch măr iĕm dang ei đơ̆ng teh âu.”

¹²Đawit athei hloi lu linh sư pơlôch 'bar 'nu bơngai noh, chơ̆ng jơ̆ng ti sư, na hơtol akâu sư jê̆ cheng đak dơnâu tơ Hêbrôn, mă-lei kơ̆l Isbôset lu linh 'bŭ lăm bơsat Apner, tơ Hêbrôn.