Read bahnar II Sam 7 Bible Online

II Sam 7 - bahnar bible

II Sam 7

¹Kơplah pơtao oei lăm hnam pơtao sư, păng Kră Yang ăn kơ sư pơdơh hiôk huay pă đei ayăt jum dăr kơ sư,

²na pơtao khan kơ Nathan bơngai khan lê̆ adrol: “Lăng deh inh oei lăm hnam pơm păng 'long hơngo, gah Hom pơgơ̆p Kră Yang 'Bok Kei-Dei oei lăm bơsŭn pơm hăm che.”

³Nathan tơl pơtao khan: “Pơm bĕ kiơ̆ kơ jơhngơ̆m ih tơchĕng, yua kơ Kră Yang oei hơdai ih.”

⁴Mă-lei lăm măng noh hloi, đei nơ̆r Kră Yang khan kơ Nathan:

⁵“Athei năm khan kơ Đawit, đĭch đam Inh Kră Yang khan thoi âu” Ih wă pơm kơ Inh hnam oei hă?

⁶Đơ̆ng năr Inh anhăk kon pơlei Isơrael lĕch đơ̆ng dêh Êyiptơ truh tơ dang ei, Inh ưh kơ đei oei tơ lăm hnam ayơ, mă-lei kơplah chă năm tơ âu tơ noh Inh oei lăm bơsŭn đĕch.

⁷Mă tơ anih ayơ Inh năm hăm kon pơlei Isơrael, Inh hăm đei layơ chă pơma chrih kơ lu bơngai mă Inh đei rơih wă wei-lăng kon pơlei Isơrael Inh: Liơ lu iĕm ưh kơ pơm kơ Inh minh pôm hnam hăm 'long hơngo?

⁸Thoi noh dang ei, ih athei roi kơ Đawit, đĭch đam Inh Kră Yang Tih Hloh đei khan thoi âu: “Inh boih đei krao ih đơ̆ng tơmăn 'nhĕt anih ih oei wei triu, pôk ih jing bơngai pơgơ̆r kon pơlei Inh.

⁹Inh đei oei hơdai hăm ih, lăm rim anih ih năm pơrăm lê̆ lu ayăt kơ ih đơ̆ng anăp ih; Inh gô ăn kơ anăn ih đe ư-ang tih kư̆m thoi anăn bơngai yŏng mơng lăm teh đak.

¹⁰Inh gô ăn kơ kon pơlei Isơrael Inh minh anih oei, Inh gô ăn kơ sư chăt rơh lăm anih noh, ăn kơ lu sư oei kơjăp tơ anih noh, huay pă đei hli kơ kiơ dơ̆ng, păng lu bơngai kơnê̆ ưh pă gơh pơjuă pơđep thoi sơ̆ dơ̆ng.

¹¹Kơplah Inh pôk pơjing bơngai sek tơlang pơgơ̆r bơngai Isơrael Inh, Inh gô ăn kơ ih huay pă hli oei hiôk-hian ưh pă đei ayăt chă pơrăm ih dơ̆ng păng Kră Yang pơkă khan Sư gô tơiung pơdơ̆ng kơ ih minh pôm hnam.

¹²Lăp jơ 'năr ih đĭ boih, păng ih lôch năm oei hơdai hăm lu 'bok yă ih, na Inh gô pôk minh 'nu đơ̆ng lăm adrĕch adrung ih sư noh đơ̆ng kon ih pơjing wă pơtrơp kơ tang-dŏ pơtao ih, păng Inh gô ăn kơ dêh char pơtao sư kơjăp.

¹³Sư noh kơnh gô pơm hnam kơ anăn Inh oei păng Inh gô ăn kơ tang-dŏ dêh char pơtao sư kơjăp ling-lang.

¹⁴Inh gô pơm 'bă sư, sư gô jing kon Inh. Tơdah sư pơm yoch, tơpă Inh gô teh bơtho sư hăm sơnguĕt, thoi mĕ 'bă teh bơtho kon;

¹⁵Mă-lei tơdrong 'mêm Inh ưh kơ weh đơ̆ng sư thoi Inh weh đơ̆ng Sôl, bơngai mă Inh achăng lê̆ wă pôk hơtŏk ih pơm pơtao.

¹⁶Adrĕch hnam ih ưh kơ đei khăi bơngai pơtrơp ih; Inh gô ăn tang-dŏ ih kơjăp khŏm khŏm. Păng dêh char pơtao ih oei kơjăp ling-lang khŏm khŏm.”

¹⁷Nathan bơngai khan lê̆ adrol năm roi ăn kơ Đawit dôm nơ̆r Kră Yang pơma lăm tơdrong tơ'bôh kơ sư.

¹⁸Đơ̆ng noh Pơtao Đawit năm hloi lăm bơsŭn 'bơ̆t anăp Kră Yang păng khan: “Kơkuh kơ ih Kră Yang inh, inh âu bu, hnam dơnŏ inh kiơ mă Ih đei ba inh truh tơ tơdrong jang 'nâu?

¹⁹Kơkuh kơ Ih ơ Kră Yang inh, mă khan tơdrong noh Ih lăng tơdrong iĕ đĕch, păng Ih đei bơtho inh mă đĭch đam Ih kơ dêh char pơtao inh đơ̆ng âu tơ anăp păng ơ Kră Yang inh Ih oei wă ăn kơ inh 'bôh jơhnơr tơ anăp âu kơnh?

²⁰Đawit wă oei pơma kiơ dơ̆ng hăm Ih? Ơ Kră Yang Kră Yang inh, Ih băt kơ inh đĭch đam Ih.

²¹Yua kơ đơ̆ng nơ̆r Ih pơkă, păng kiơ̆ thoi jơhngơ̆m Ih lăp mă Ih đei pơm boih dôm tơdrong tih 'nâu, păng tơbăt ăn kơ đĭch đam Ih.

²²Ơ Kră Yang, Kră Yang inh, Ih boih Kră Yang Tih Hloh ưh kơ đei bu hơtŏ kơ Ih, păng ưh kơ đei Kră Yang 'Bok Kei-Dei nai hloh kơ Ih, thoi kơ đon nhôn đei kơtơ̆ng boih.

²³Tơ jơ̆p lăm teh đak hăm đei adrĕch ayơ nhen thoi adrĕch Isơrael Ih, lăp minh pôm adrĕch đĕch lăm teh âu mă Kră Yang 'Bok Kei-Dei dŏng pơklaih wă pơm kon pơlei pơla Ih. Anăn Ih đei pơyom tih, iŏk đơ̆ng Ih pơm tơdrong tih-tin trŏ kơ hli krưp tơpă, kơ kon pơlei Ih lăm teh đak Ih. Kră Yang đei puh lê̆ dôm lu adrĕch nai, păng rup yang lu sư đơ̆ng lăm teh đak 'bơ̆t anăp kon pơlei pơla Ih mă Ih đei dŏng pơklaih đơ̆ng dêh char Êyiptơ.

²⁴Ih đei pơjing kơjăp bơngai Isơrael pơm kon pơlei pơla Ih kơdih ling-lang hlŏng hloi. Ơ Kră Yang, Ih boih Kră Yang 'Bok Kei-Dei lu sư.

²⁵Kơkuh kơ Ih ơ Kră Yang 'Bok Kei-Dei! Inh apinh Ih ling-lang pơm mă kơjăp nơ̆r Ih pơkă gah đĭch đam Ih păng gah hnam sư, apinh Ih pơm thoi Ih đei pơkă boih.

²⁶Hơpơi kơ anăn Ih đei ư-ang ling-lang khŏm khŏm, ‘Kră Yang Tih jơ̆ 'Bok Kei-Dei pơgơ̆r lu bơngai Isơrael,’ hơpơi kơ Ih pơjing kơjăp ăn kơ hnam adrĕch đĭch đam Ih Đawit!

²⁷Kơkuh kơ Ih, ơ Kră Yang Tih Hloh jơ̆ Kră Yang 'Bok Kei-Dei bơngai Isơrael, kơdih Ih 'mơ̆i đei tơ'bôh tơbăt nơ̆r 'nâu hăm đĭch đam Ih khan, Ih gô pơjing pơdơ̆ng hnam đĭch đam Ih kơjăp, na mă đĭch đam Ih âu jing pơ̆n pơyơ̆r kơ Ih dôm nơ̆r apinh 'nâu.

²⁸Kơkuh kơ Ih ơ Kră Yang! Ih Kră Yang inh, dôm nơ̆r Ih khan sĭt gô đei pơkă hăm đĭch đam Ih gô ăn kơ sư pŭn hiôk 'nâu.

²⁹Dang ei inh apinh Kră Yang tuh ăn pŭn hiôk kơ adrĕch hnam bơngai đĭch đam Ih, wă kơ sư oei đei 'bơ̆t anăp Ih ling-lang, yua kơ Ih ơ Kră Yang jơ̆ Kră Yang inh đei pơkă thoi noh. Apinh hơpơi kơ Ih ăn kơ adrĕch hnam đĭch đam Ih đei pŭn hiôk ling-lang.”