Read bahnar II Sam 9 Bible Online

II Sam 9 - bahnar bible

II Sam 9

¹Đawit jet lăm hnam Sôl hăm oei đei bu oei arih ưh? Inh wă tơ'bôh jơhngơ̆m pơm 'lơ̆ng kơ sư yua kơ đơ̆ng Jônathan.

²Đei minh 'nu đĭch đam đơ̆ng lăm hnam Sôl, anăn sư Siba; đe krao sư năm tơ Đawit, pơtao Đawit jet: Ih hăm trŏ kơ Siba ưh? Sư tơl: Trŏ inh âu boih, đĭch đam ih,

³Pơtao jet dơ̆ng: Lăm hnam Sôl ưh pă đei bu dơ̆ng ah? Inh wă iŏk tơdrong 'lơ̆ng đơ̆ng Kră Yang 'Bok Kei-Dei, na sơng iŏk sư. Siba tơl pơtao: Oei pă minh 'nu kon drŏ-nglo Jônathan sư hơwen 'bar pah jơ̆ng.

⁴Pơtao jet: “Sư tơ yơ?” Siba tơl: “Sư oei lăm hnam Makir, kon drŏ-nglo Ammiel, tơ pơlei Lôdêbar.”

⁵Pơtao Đawit wơh hloi sư năm tơ hnam Makir, kon drŏ-nglo Ammiel, tơ pơlei Lôdêbar, wă kơ sư năm iŏk bơngai noh.

⁶Lăp Mêphibôset, kon drŏ-nglo Jônathan, sâu tơm 'bok Sôl, truh tơ Đawit boih, na sư pơtăm kŭl-tăng kŭp drap tơ teh păng kơkuh. Đawit krao: Ơ Mêphibôset! Sư tơl: Kiơ đĭch đam ih âu.

⁷Đawit khan kơ sư: Mon 'nĕ kơ hli, inh wă tơgŭm ih yua kơ đơ̆ng Jônathan 'bă ih, inh gô pơdrâu kơ ih dôm mă bri seh teh choh đơ̆ng 'bok Sôl ih, păng ih gô oei sŏng sa hơdai inh minh pôm gơ'bang ling-lang hlŏng hloi.

⁸Mêphibôset drap tơ teh kơkuh, na sư pơma khan: “Bơngai đĭch đam ih 'nâu kiơ, mă ih oei tơchĕng 'blŏk 'blăi inh âu thoi minh pôm kŏ lôch?”

⁹Pơtao krao hloi Siba, đĭch đam Sôl, sư khan: Đĭ-đăng mŭk tơmam gah Sôl păng hnam dơnŏ sư. Inh ăn boih kơ sâu tơnơm yŏng tơ'ngla ih.

¹⁰Thoi noh ih hăm lu kon drŏ-nglo păng đĭch đam ih athei choh pơtăm teh mir noh ăn kơ sư, đei plei phe 'ba na yua iŏk 'me hnam dơnŏ yŏng tơ'ngla ih, mă-lei gah Mêphibôset sư gô oei sŏng sa hơdai inh pôm gơ'bang hlŏng hloi boih. Siba đei mơjĭt-pơđăm 'nu kon drŏ-nglo păng 'bar-jĭt 'nu đĭch đam.

¹¹Siba drơ̆ng khan: Đĭch đam ih gô pơm kiơ̆ tôm tơdrong đơ̆ng yŏng pơtao inh pơkă khan. Thoi noh Mêphibôset sŏng sa hơdai minh pôm gơ'bang hăm pơtao Đawit thoi minh 'nu kon drŏ-nglo pơtao.

¹²Mêphibôset đei minh 'nu kon drŏ-nglo 'lơ̆p, anăn sư Mika; păng đĭ-đăng lu bơngai oei lăm hnam Siba jing đĭch đam Mephibôset ngăl.

¹³Thoi noh Mêphibôset oei tơ pơlei Jêrusalem, yua kơ sư sŏng sa hơdai pơtao minh gơ'bang ling-lang, mă sư hơwen hơwo 'bar pah jơ̆ng ră.