Read bahnar I Pot 1 Bible Online

I Pot 1 - bahnar bible

I Pot 1

¹Pơtao Đawit đĭ kră sơnăm đĭ kơjung boih, mă khan đe pơhrŭk ăn hơbĕn ao kơ sư lơ hơdôm blah ră mă-lei sư oei ưh kơ tơnŏ.

²Na lu đĭch đam sư khan kơ sư: “Lê̆ nhôn chă ăn kơ ih mă yŏng pơtao nhôn, minh 'nu adruh 'nao iung, wă kơ sư awih awăn păng wei-lăng ih. Sư gô 'bĭch 'bơ̆t cheng ih, wă kơ ih, yŏng pơtao nhôn tơnŏ.

³Thoi noh lu sư chă minh 'nu adruh 'lơ̆ng guăng đơ̆ng lăm dêh char Isơrael, lu sư chă 'bôh minh 'nu adruh anăn sư Abisak, bơngai Sunami păng chông ba sư năm tơ pơtao.

⁴Adruh noh 'lơ̆ng hơbŏ dêh, sư wei-lăng păng awih awăn kơ pơtao, mă-lei pơtao ưh kơ jê̆ sư ôh.

⁵Adonija kon yă Hagit, pôk atŏk sư kơdih khan: “Inh gô pơm pơtao” Sư chă hơmet kơ sư gre aseh lơlap păng chă bơngai hao gre aseh đei pơđăm-jĭt 'nu kơdâu adrol kơ sư.

⁶'Bă sư ưh kơ đei wă pơm kơ sư sơ'ngon ôh, hăm nơ̆r jet: “Liơ e pơm thoi noh?” Adonija jơ̆ minh 'nu bơngai 'lơ̆ng hơbŏ dêh, mĕ sư tơpŭ kơ sư đơ̆ng rŏng kơ Apsalôm.

⁷Sư pơđâu băl hăm Jôap kon drŏ-nglo Sêruia păng hăm 'bok soi Abiathar. Lu sư kiơ̆ Adonija păng tơgŭm sư.

⁸Mă-lei 'bok soi Sadôk, Bênaia kon drŏ-nglo Jêhôiada, Nathan bơngai khan lê̆ adrol, Simei, Rei păng lu linh Đawit mă nuih kơtang ưh kơ kiơ̆ ôh Adonija.

⁹Adonija pơyơ̆r triu, rơmo păng kon rơmo bek, pơm tơmam soi 'bơ̆t tơmo Sohôlet, jê̆ Ên Rôgel. Sư krao wơ̆n đĭ-đăng 'nhŏng oh sư, lu kon drŏ-nglo pơtao, păng đĭ-đăng lu bơngai pơm yŏng pơgơ̆r mă bơ̆jang kơ pơtao.

¹⁰Mă-lei sư ưh kơ krao wơ̆n ôh Nathan 'bok khan lê̆ adrol, dah Bênaia, dah lu linh nuih kơtang păng kư̆m ưh kơ krao wơ̆n mơ̆n Sôlômôn oh sư.

¹¹Na Nathan khan kơ Batsêba mĕ Sôlômôn. “Ih ưh kơ băt ôh hă Adonija kon drŏ-nglo yă Hagit pơm pơtao, mă Đawit pơtao bơ̆n kư̆m ưh kơ băt mơ̆n tơdrong noh hă?

¹²Thoi noh, na dang ei năm tơ âu bĕ, inh tơbăt kơ ih trong wă kơ ih pơklaih tơdrong arih ih kơdih păng pơklaih tơdrong arih kon drŏ-nglo ih Sôlômôn.

¹³Ih năm hloi bĕ tơ pơtao Đawit păng khan kơ sư: Ơ pơtao, yŏng inh! Ih hăm pơkă pơkăm hăm đam drŏ-kăn ih khan: Sôlômôn kon drŏ-nglo inh, ih gô pơtrơp pơm pơtao tơplih inh, sư oei kơpal tang-dŏ pơtao dah kiơ? Liơ dang ei tă tơ Adonija pơm pơtao?

¹⁴Kơplah ih oei tơ noh pơma dơnuh hăm pơtao, inh gô mơ̆t kiơ̆ ih păng wă pơsĭt dôm nơ̆r ih.”

¹⁵Na, yă Batsêba năm tơ lăm anih pơtao. Pơtao đĭ kră dêh boih. Đei Abisak drŏ-kăn bơngai Sunamit awih awăn kơ pơtao,

¹⁶yă Batsêba năm drap kơkuh kơ pơtao Na pơtao jet: “Ih wă tơdrong kiơ?”

¹⁷Yă Batsêba tơl: “Ơ pơtao, ih đei pơkă pơkăm boih hăm inh đam ih, hăm anăn Kră Yang 'Bok Kei-Dei ih: ‘Sôlômôn kon drŏ-nglo inh gô pơm pơtao tơplih inh, sư gô hơ-oei kơpal tang-dŏ pơtao inh.’

¹⁸Mă-lei, ơ pơtao yŏng inh, dang ei Adonija pơm pơtao mă ih ưh kơ băt ôh tơdrong noh

¹⁹Sư pơyơ̆r boih tơmam soi hăm rơmo tơno, rơmo dăm bek păng triu lơ dêh păng sư kư̆m đei krao wơ̆n đĭ-đăng kon drŏ-nglo pơtao, 'bok soi Abiathar păng Jôap yŏng linh, mă-lei đam ih Sôlômôn noh sư ưh kơ wơ̆n ôh.

²⁰Ơ pơtao yŏng inh, dang ei măt bơngai Isơrael oei lăng tơ ih ngăl wă răp gô ih roi ăn kơ lu sư băt bơngai bu wă hơ-oei kơpal tang-dŏ pơtao tơplih ih.

²¹Dah ưh lăm minh năr ei kơnh ih yŏng pơtao inh lôch oei hơdai 'bok yă, lei đe gô jô̆ kơ nhi Sôlômôn pơm yoch”

²²Kơplah yă Batsêba oei pơma dơnuh hăm pơtao, Nathan bơngai khan lê̆ adrol mơ̆t.

²³Đe roi kơ pơtao: “Đei Nathan bơngai khan lê̆ adrol truh.” Nathan năm truh 'bơ̆t anăp pơtao kŭp kơ̆l drap kơkuh.

²⁴Nathan khan: “Ơ pơtao ih hăm đei khan kơ Adônja gô hơ-oei kơpal tang-dŏ pơtao pơgơ̆r pơtrơp ih?

²⁵Năr 'nâu sư jur năm pơyơ̆r tơmam soi rôp rơmo tơno, kon rơmo dăm bek păng triu lơ dêh, na sư kư̆m đei krao wơ̆n đĭ-đăng kon drŏ-nglo pơtao, Jôap yŏng linh, 'bok soi Abiathar; lu sư oei et sa 'bơ̆t anăp Adonija păng jreo ôr 'bơ̆r re khan: ‘Adonija pơtao arih sot!’

²⁶Mă-lei sư ưh kơ krao wơ̆n inh đam ih, dah 'bok soi Sadok, Bênaia kon drŏ-nglo Jêhôiada, păng Sôlômôn đam ih ôh.

²⁷Ơ pơtao, tơdrong 'nâu hăm trŏ kơ đơ̆ng ih ăn? Păng ih kư̆m ưh kơ ăn kơ lu đĭch đam ih băt bơngai wă pơm pơtao pơtrơp ih, hơ-oei kơpal tang-dŏ ih?”

²⁸Pơtao Đawit khan: “Krao Batsêba năm tơ âu;” na đe krao yă Batsêba mơ̆t, dơ̆ng 'bơ̆t anăp pơtao;

²⁹Pơtao pơkă pơkăm khan: “Hơpơi Kră Yang mă oei arih, Tơ'ngla pơklaih inh đơ̆ng dôm tơdrong pơmat-tat truh.

³⁰Thoi inh đei pơkă pơkăm boih hăm ih hăm anăn Kră Yang 'Bok Kei-Dei Isơrael tơpă: Sôlômôn kon drŏ-nglo ih gô pơm pơtao pơgơ̆r pơtrơp inh, sư gô hơ-oei kơpal tang-dŏ tơplih inh, năr 'nâu boih inh gô pơm pơkeh tơdrong noh.”

³¹Yă Batsêba kŭp kơ̆l drap tơ teh kơkuh kơ pơtao Đawit păng khan: “Hơpơi yŏng inh pơtao Đawit arih sot!”

³²Pơtao Đawit khan: “Krao 'bok soi Sadok, krao Nathan bơngai khan lê̆ adrol păng krao Bênaia kon drŏ-nglo Jêhôiada năm tơ âu;” thoi noh na lu sư năm tơ anăp pơtao.

³³Pơtao khan kơ lu sư: “Chông ba lu đĭch đam inh mă yŏng tơ'ngla iĕm, hơdai hăm iĕm na iĕm hiŏng atŏk Sôlômôn kon drŏ-nglo inh kơpal aseh dăm inh, ba sư truh tơ pơlei Gihôn;

³⁴Tơ noh bre 'bok soi Sadok hăm Nathan bơngai khan lê̆ adrol tuh đak rơmă 'bâu phu pôk sư pơm pơtao Isơrael, lu iĕm hlôm tơgiĕp na jreo re khan: Pơtao Sôlômôn arih sot!

³⁵Iĕm năm kiơ̆ đơ̆ng rŏng sư tŏk truh tơ anih pơtao, sư gô hơ-oei kơpal tang-dŏ pơtao pơgơ̆r pơtrơp inh. Inh pơjao ăn kơ sư pơm pơtao lu bơngai Isơrael păng lu bơngai Juđa.”

³⁶Bênaia kon drŏ-nglo Jêhôiada tơl pơtao, “A-men! Apinh Kră Yang 'Bok Kei-Dei ih yŏng inh, kư̆m khan thoi noh mơ̆n.

³⁷Kră Yang oei hơdai hăm ih mă yŏng inh thoi yơ, apinh Kră Yang kư̆m oei hơdai Sôlômôn thoi noh mơ̆n, păng pơm ăn tang-dŏ pơtao sư tih hloh kơ tang-dŏ pơtao Đawit yŏng inh dơ̆ng.”

³⁸Thoi noh 'bok soi Sadok, Nathan bơngai khan lê̆ adrol, Bênaia kon drŏ-nglo Jêhôiada păng lu bơngai Kêrêthit, lu bơngai Phêlêthit jur năm hiŏng atŏk Sôlômôn tơ kơpal kơdŭ aseh dăm pơtao Đawit, klaih kơ noh năm ba sư tơ pơlei Gihôn.

³⁹Tơ noh 'bok soi Sadok iŏk hơke mong đak pơgang 'bâu phu đơ̆ng lăm bơsŭn anih akŭm tuh kơpal kơ̆l Sôlômôn. Đe hlôm tơgiĕp păng đĭ-đăng kon pơlei pơla ôr jreo pơma khan: “Sôlômôn pơtao arih sot!”

⁴⁰Đĭ-đăng kon pơlei pơla kiơ̆ đơ̆ng rŏng, hlôm 'lal chhôk hơnôk dêh tơpă, teh mah pơpơ̆ kyĭng kyơ̆ng đơ̆ng jơwa nơ̆r lu sư ôr jreo.

⁴¹Adonija păng đĭ-đăng lu bơngai mă sư wơ̆n sŏng sa đang boih, lu sư kơtơ̆ng nơ̆r ôr jreo. Jôap kơtơ̆ng đe hlôm keng, na jet: “Đei nơ̆r jơwa ôr jreo lăm pơlei 'nei đei tơdrong kiơ kih?”

⁴²Kơplah sư oei pơma, blư kơ Jônathan kon 'bok soi Abiathar truh, na Adonija khan: “Mơ̆t tơ âu bĕ, ih boih minh 'nu bơngai đe pơyom sĭt, rŏ lăng ih ba tơdrong 'nao 'lơ̆ng.”

⁴³Mă-lei Jônathan tơl: “Ưh ôh, pơtao Đawit yŏng bơ̆n pôk ăn kơ Sôlômôn pơm pơtao boih.

⁴⁴Pơtao Đawit đei wơh 'bok soi Sadok, Nathan bơngai khan lê̆ adrol, Bênaia kon drŏ-nglo Jêhôiada, lu bơngai Kêrêthit păng lu bơngai Phelêthit kiơ̆ Sôlômôn, đơ̆ng noh lu sư hiŏng atŏk Sôlômôn tơ kơpal aseh dăm pơtao.

⁴⁵'Bok soi Sadok, Nathan bơngai khan lê̆ adrol tuh đak rơmă 'bâu phu tơ kơ̆l pôk sư pơm pơtao tơ pơlei Gihôn; đơ̆ng noh lu sư tŏk năm hăm tơdrong chhôk hal, păng đei jơwa nơ̆r pơma ơ-ơ̆r ơ-ăr jơ̆p tơ lăm pơlei tih mă iĕm đei kơtơ̆ng boih noh.

⁴⁶Sôlômôn hơ-oei kơpal tang-dŏ pơtao.

⁴⁷Lu đĭch đam pơtao năm sơkat pŭn hiôk ăn kơ pơtao Đawit yŏng bơ̆n, lu sư khan: ‘Apinh Kră Yang 'Bok Kei-Dei ih ăn kơ anăn Sôlômôn ư-ang tih hloh kơ anăn ih, ăn kơ tang-dŏ pơtao sư tih hloh kơ tang-dŏ pơtao.’ Đawit kŭp kơ̆l kơkuh 'bơ̆t giơng sư 'bĭch;

⁴⁸păng khan: ‘Kơkuh bơnê ư-ang kơ Kră Yang 'Bok Kei-Dei bơngai Isơrael, năr 'nâu Ih đei ăn kơ măt inh đei 'bôh boih kon drŏ-nglo inh hơ-oei kơpal tang-dŏ pơtao inh.’ ”

⁴⁹Kơplah noh đĭ-đăng lu bơngai mă năm et sa hơdai hăm Adonija hli tơrơ, rim 'nu lu sư lĕch brŏk kơdih kơdih.

⁵⁰Adonija hli kơ Sôlômôn, iung kơdâu năm rôp kơjăp lu hơke mum chơnang soi.

⁵¹Đei bơngai năm tơbăt ăn kơ Sôlômôn: “Adonija hli kơ ih, to sư oei rôp kơjăp hơke chơnang soi păng khan: Rŏ kơ pơtao Sôlômôn pơkă pơkăm hăm inh mă đĭch đam sư khan sư ưh kơ đei pơlôch inh ôh hăm đao gưm.”

⁵²Sôlômôn tơl: “Tơdah sư arih sa pơm 'lơ̆ng tơpăt lei mă minh dăng sŏk đơ̆ng kơ̆l sư ưh kơ đei huŏng ôh tơ teh, mă-lei tơdah đe 'bôh sư pơm yoch sư gô lôch.”

⁵³Na pơtao Sôlômôn wơh bơngai năm krao iŏk sư jur đơ̆ng chơnang soi. Adonija năm drap kơkuh kơ pơtao Sôlômôn; dơ̆ng noh pơtao Sôlômôn khan kơ sư: “Brŏk tơ hnam ih bĕ.”