Read bahnar I Pot 12 Bible Online

I Pot 12 - bahnar bible

I Pot 12

¹Rôbôam năm tơ pơlei Sichem, yua kơ đĭ-đăng bơngai Isơrael năm akŭm tơ noh bơih wă pôk sư pơm pơtao.

²Jêrôbôam kon drŏ-nglo Nêbat, kơtơ̆ng tơdrong noh kơplah sư oei tơ dêh Êyiptơ anih sư kơdâu ôn kơ pơtao Sôlômôn, sư wih brŏk đơ̆ng dêh Êyiptơ.

³Đe athei bơngai năm krao sư đơ̆ng noh, na Jêrôbôam păng đĭ-đăng bơngai Isơrael năm tơ Rôbôam păng khan kơ sư:

⁴“'Bă ih tơ'băk ăn kơ nhôn 'long ăt trăp dêh, mă-lei dang ei apinh ih ăn kơ nhôn hơiơch 'biơ̆ dôm tơdrong jang gleh trăp păng 'long ăt trăp mă 'bă ih tơ'băk ăn kơ nhôn, na nhôn gô bơ̆jang kơ ih.”

⁵Na Rôbôam tơl: “Iĕm brŏk bĕ, kơtĕch pêng năr iĕm năm tơ âu dơ̆ng.” Na lu kon pơlei wih brŏk.

⁶Thoi noh Pơtao Rôbôam pơđâu hăm lu đe kră mă đêl bơ̆jang kơ Sôlômôn 'bă sư, kơplah 'bă sư oei arih: Sư jet: Lu iĕm pơđâu liơ, wă kơ inh tơl tơwih ăn kơ kon pơlei pơla 'nâu?

⁷Lu sư tơl: “Tơdah năr 'nâu ih pơm thoi đĭch đam kon pơlei pơla, awih awăn kơ lu sư, tơl tơwih pơma dơnuh pơ'lơ̆ng hăm lu sư, lei lu sư gô pơm đĭch đam ih ling-lang.”

⁸Mă-lei Rôbôam sơngah ưh kơ kiơ̆ ôh nơ̆r lu kră 'noh roi kơ sư; đơ̆ng noh sư jet lu bơngai iung tơdăm hơdai sư, oei awih awăn kơ sư.

⁹Pơtao jet: “Lu iĕm roi lăng kơ inh wă tơl tơwih kơ kon pơlei pơla thoi yơ? Lu sư đei khan kơ inh 'long ăt 'bă ih tơ'băk ăn kơ nhôn trăp dêh, apinh ih ăn kơ nhôn hơiơch 'biơ̆?”

¹⁰Lu bơngai tơdăm iung hơdai sư 'noh tơl sư: Khan kơ lu kon pơlei mă khan kơ ih. 'Bă ih tơ'băk ăn kơ nhôn 'long ăt trăp dêh, apinh ih ăn kơ nhôn hơiơch; ih tơl lu sư: ‘Hơnglâu dĕng inh tih hloh kơ kơiĕng 'bă inh.’

¹¹Sơ̆ 'bă inh tơ'băk ăn kơ iĕm 'long ăt trăp, na inh gô tơ'băk ăn kơ iĕm 'long ăt trăp hloh kơ 'noh dơ̆ng; 'bă inh phak iĕm hăm sơnguĕt akar, inh gô phak iĕm hăm hơguăt.”

¹²Na kơtĕch pêng năr bơih, Jêrôbôam hăm đĭ-đăng kon pơlei pơla năm tơ Rôbôam, kiơ̆ thoi nơ̆r pơtao đei khan: “Pêng năr đơ̆ng rŏng kơnh iĕm năm tơ âu.”

¹³Pơtao tơl tơwih kơ kon pơlei pơla hăm nơ̆r tơdrăp, sư ưh kơ tơl tơwih kơ kon pơlei pơla kiơ̆ thoi lu đe kră athei ôh.

¹⁴Sư tơl tơwih kơ lu kon pơlei pơla kiơ̆ thoi nơ̆r lu tơdăm păng khan: “'Bă inh tơ'băk ăn kơ iĕm 'long ăt trăp bơih, inh gô tơ'băk ăn kơ iĕm 'long ăt trăp hloh kơ 'noh dơ̆ng. 'Bă inh bơtho phak pơjĭ iĕm hăm sơnguĕt akar, inh gô phak bơtho iĕm hăm hơguăt sôch.”

¹⁵Thoi noh, pơtao ưh kơ mơ̆ng ôh nơ̆r kon pơlei pơla pơma, yua kơ tơdrong 'noh truh đơ̆ng Kră Yang ăn, wă pơsĭt nơ̆r Sư mă Kră Yang yua boih Ahija bơngai Silô khan kơ Jêrôbôam, kon drŏ-nglo Nêbat.

¹⁶Lăp lu bơngai Isơrael 'bôh pơtao ưh pă mơ̆ng lu sư bơih, lu kon pơlei pơla khan kơ pơtao “Lu nhôn hăm đei kiơ lăm Đawit? Nhôn hăm đei yua tơmam kiơ lăm kon drŏ-nglo Jese. Ơ lu bơngai Isơrael! Iĕm athei brŏk tơ bơsŭn iĕm kơdih. Ơ Đawit! Ih athei lăng bĕ kơ hnam ih kơdih.” Na lu bơngai Isơrael wih brŏk tơ bơsŭn lu sư kơdih.

¹⁷Mă-lei lu bơngai oei tơ lu pơlei lăm Juđa. Rôbôam oei pơgơ̆r lu sư.

¹⁸Pơtao Rôbôam wơh Adôram bơngai pơgơ̆r pơgŏ tơdrong jang khei, lei na lu bơngai Isơrael klơ̆m pơlôch sư păng tơmo. Pơtao Rôbôam hăt hot tŏk tơ gre aseh sư kơdâu ôn tơ pơlei Jêrusalem.

¹⁹Thoi noh lu bơngai Isơrael pơm tơwih blah adrĕch hnam Đawit truh tơ dang ei.

²⁰Lăp lu kon pơlei Isơrael kơtơ̆ng ang Jêrôbôam brŏk bơih, lu sư wơh bơngai năm krao sư akŭm hơdai păng pôk sư pơm pơtao pơgơ̆r lu bơngai Isơrael. Ưh kơ đei bơngai bu kiơ̆ adrĕch Đawit lăp adrĕch Juđa đĕch kiơ̆.

²¹Lăp Rôbôam truh tơ pơlei Jêrusalem bơih, sư krao akŭm đĭ-đăng adrĕch Juđa păng adrĕch adrung Bênjamin đei minh-hrĕng tơhngam-jĭt rơbâu 'nu linh tơblah, wă tơblah hăm bơngai Isơrael, wă iŏk tơwih teh đak 'noh ăn kơ Rôbôam, kon drŏ-nglo Sôlômôn.

²²Mă-lei nơ̆r Kră Yang 'Bok kei-Dei khan kơ Semaia bơngai Kră Yang 'Bok Kei-Dei wơh:

²³Ih athei khan kơ Rôbôam, kon drŏ-nglo Sôlômôn, pơtao Juđa, đĭ-đăng adrĕch Juđa, Bênjamin păng lu kon pơlei mă oei oei tơ noh:

²⁴'Nâu Kră Yang khan: 'Nĕ kơ năm tŏk blah lu bơngai Isơrael 'nhŏng oh iĕm. Rim 'nu athei brŏk bĕ tơ hnam sư kơdih, yua kơ tơdrong 'nâu lĕch đơ̆ng Inh.” Lu sư chu nơ̆r Kră Yang khan, brŏk tơ hnam sư kơdih kiơ̆ thoi nơ̆r Kră Yang bơtho tơ'bôh.

²⁵Jêrôbôam pơjing hnam tơ Pơlei Sechem kơjăp tơ kơpal groi Êphraim, sư oei hloi tơ noh, sư lĕch đơ̆ng noh năm pơm Pơlei Pênuel.

²⁶Jêrôbôam tơchĕng lăm đon sư: “Dêh char pơtao âu gô brŏk hơlơ̆k tơ adrĕch Đawit.

²⁷Tơdah lu kon pơlei 'nâu tŏk năm wă pơyơ̆r tơmam soi lăm Hnam Akŭm Kră Yang tơ pơlei Jêrusalem, lei jơhngơ̆m đon lu sư gô kiơ̆ pơtao lu sư Rôbôam pơtao đe Juđa,” lu sư gô pơlôch lê̆ inh, na lu sư gô brŏk tơ Rôbôam pơtao đe Juđa.

²⁸Thoi noh pơtao pơđâu athei đe pơm 'bar tŏ rup rơmo păng maih, pơtao khan kơ kon pơlei pơla: “Lu iĕm tŏk năm chă kiơ tơ pơlei Jêrusalem ataih dêh! Ơ lu bơngai Isơrael 'nâu bơih yang lu iĕm, mă chông tơlĕch lu iĕm đơ̆ng char Êyiptơ.”

²⁹Sư dan minh pôm rup yang lăm pơlei Bethel, minh pôm rup nai sư dan lăm pơlei Đan.

³⁰Tơdrong noh jing tơdrong yoch, lu kon pơlei pơla năm tơ pơlei Đan kơkuh kơ minh pôm rup yang rơmo tơ noh.

³¹Jêrôbôam kư̆m đei pơm lơ hnam yang tơ kơpal anih kơjung păng sư rơih bơngai đơ̆ng lăm kon pơlei mă ưh kơ khŭl Lêwi, athei lu sư pơm 'bok soi.

³²Jêrôbôam kư̆m đei tơchĕng wă pơjing minh tơdrong pơm giĕng lăm khei tơhngam năr mơjĭt-pơđăm, thoi đe juăt kơ pơm giĕng lăm dêh Juđa, na sư pơyơ̆r lu tơmam soi tơ kơpal chơnang. Sư pơm tơdrong noh tơ pơlei Bethel, pơyơ̆r tơmam soi sơmah kơ 'bar tŏ rup yang kon rơmo mă sư đei pơm bơih păng maih. Pơtao kư̆m dan tơ pơlei Bethel lu 'bok soi, oei lăm hnam mă sư pơm bơih tơ anih kơjung 'noh.

³³Sư năm tơ chơnang soi đêl sư pơm boih tơ pơlei Bethel. Lăm năr mơjĭt-pơđăm khei tơhngam, khei mă sư rơih kơdih, sư pơjing minh năr phĕt ăn kơ lu bơngai Isơrael, na sư năm tŏk tơ chơnang soi wă soh tơmam 'bâu phu.