Read bahnar I Pot 13 Bible Online

I Pot 13 - bahnar bible

I Pot 13

¹Đơ̆ng Nơ̆r Kră Yang wơh na minh 'nu bơngai mă jang kơ Kră Yang 'Bok Kei-Dei lĕch đơ̆ng char Juđa năm tơ pơlei Bethel, kơplah Jêrôbôam oei dơ̆ng 'bơ̆t chơnang soi wă soh pơgang 'bâu phu.

²Bơngai 'noh ôr khan kơ chơnang soi kiơ̆ thoi nơ̆r Kră Yang khan: “Ơ chơnang soi, chơnang soi! 'Nâu nơ̆r Kră Yang khan: 'Nâu đe gô tơpŭ kơ minh 'nu kon drŏ-nglo ăn kơ adrĕch hnam Đawit anăn sư Jôsia. Sư gô pơyơ̆r tơmam soi kơpal ih, lu 'bok soi đơ̆ng anih kơjung, lu 'bok soi noh bơngai mă soh tơmam 'bâu phu kơpal ih tơ rim anih kơjung păng đe gô soh kơting bơngai kơpal ih.”

³Lăm năr noh, 'bok khan lê̆ adrol tơ'bôh minh tơdrong hlĭch, khan: “'Nâu tơdrong tơ'bôh hlĭch mă Kră Yang đei khan bơih: Chơnang soi gô pơchah tơnuh gô tơsĭ huŏng đĭ tơ teh.”

⁴Kơplah pơtao Jêrôbôam kơtơ̆ng bơngai đơ̆ng Kră Yang 'Bok Kei-Dei pơma ôr blah hăm chơnang soi tơ pơlei Bethel, na pơtao Jêrôbôam chro đơ̆ng chơnang soi yơ̆r ti păng khan: “Rôp sư bĕ!” Ti đêl sư chro tơhlâu tơ bơngai mă Kră Yang 'Bok Kei-Dei yua 'noh Kră Yang pơm kơ ti sư arăng kro hloi, ưh pă gơh kơchôt dơ̆ng.

⁵Chơnang soi pơchah hloi păng tơnuh tơsĭ tơ teh, 'blep thoi tơdrong đei tơ'bôh hlĭch đơ̆ng bơngai mă Kră Yang 'Bok Kei-Dei yua ei chu nơ̆r Kră Yang bơtho khan.

⁶Pơtao khan kơ bơngai đơ̆ng Kră Yang 'Bok Kei-Dei yua: “Apinh ih krao khan bĕ apinh Kră Yang 'Bok Kei-Dei ih, apinh ih krao khan tơgŭm inh, wă kơ ti inh gơh klaih thoi so.” Bơngai mă Kră Yang 'Bok Kei-Dei yua ei krao khan apinh Kră Yang na ti pơtao klaih gơh kơchôt thoi so hloi.

⁷Na pơtao khan kơ bơngai mă Kră Yang 'Bok Kei-Dei yua: “Apinh ih brŏk tơ hnam sŏng sa hơdai hăm inh, inh gô ăn kơ ih tơmam.”

⁸Mă-lei bơngai mă Kră Yang 'Bok Kei-Dei yua ei tơl pơtao khan: “Mă ih ăn kơ inh minh puăt dêh char ih, inh kư̆m ưh kơ năm hơdai ih păng inh kư̆m ưh kơ sŏng sa dah nhă đak tơ âu.

⁹Yua kơ Kră Yang khan kơ inh: ‘Ih 'nĕ kơ sŏng sa dah nhă đak păng ih kư̆m 'nĕ kơ brŏk rok trong đêl ih năm.’ ”

¹⁰Thoi noh, sư wih brŏk trong nai, sư ưh pă năm rok trong đêl, sư năm tơ pơlei Bethel.

¹¹Đei minh 'nu bơngai khan lê̆ adrol kră bơih oei lăm Pơlei Bethel, lu kon drŏ-nglo sư ră roi ăn kơ sư dôm tơdrong đêl bơngai đơ̆ng 'Bok Kei-Dei đei pơm tơ Pơlei Bethel lăm năr 'noh, păng dôm nơ̆r sư đei pơma hăm pơtao. Lu sư roi ăn kơ 'bă lu sư đĭ dôm nơ̆r noh.

¹²'Bă lu sư jet. “Lei bơngai 'noh sư brŏk năm trong ayơ?” Na lu kon drŏ-nglo sư tơhlâu ăn kơ 'bă sư trong bơngai mă Kră Yang 'Bok Kei-Dei yua ei đơ̆ng char Juđa noh brŏk.

¹³Sư khan kơ lu kon drŏ-nglo sư: “Tơlĕch ăn kơ inh aseh iĕ” lu kon drŏ-nglo sư tơlĕch ăn kơ sư aseh sư hao hloi.

¹⁴Sư druh kiơ̆ bơngai mă Kră Yang 'Bok Kei-Dei yua ei, tơ'bơ̆p sư oei ngôi ala tơm 'long kôih, Sư jet: “Hăm trŏ kơ ih bơngai đơ̆ng char Juđa mă Kră Yang 'Bok Kei-Dei yua?” Bơngai ei tơl: “Trŏ kơ inh bơih.”

¹⁵Bơngai khan lê̆ adrol kră 'noh khan kơ sư: “Bĕ kiơ̆ inh brŏk tơ hnam sŏng sa.”

¹⁶Mă-lei bơngai 'noh tơl sư: “Inh ưh kơ gơh brŏk hơdai ih. Kŭm ưh kơ gơh sŏng sa dah nhă đak hơdai hăm ih tơ anih 'nâu mơ̆n.

¹⁷Đei nơ̆r Kră Yang khan bơih kơ inh. Ih 'nĕ kơ sŏng sa dah nhă đak tơ anih 'noh, kư̆m 'nĕ kơ brŏk rok trong đêl ih năm.”

¹⁸Bơngai khan lê̆ adrol kră 'noh tơl sư khan: “Inh kư̆m dai bơngai khan lê̆ adrol lei-lăi thoi ih. Đei minh 'nu linh jang 'lơ̆ng Kră Yang khan kơ inh: ‘Ih athei chông ba sư brŏk tơ hnam ih sŏng sa, nhă đak.’ ” Mă-lei bơngai khan lê̆ adrol kră hơlĕnh kơ sư.

¹⁹Thoi ei bơngai mă Kră Yang 'Bok Kei-Dei yua ei chu kiơ̆, sŏng sa nhă đak tơ hnam sư.

²⁰Kơplah bre sư oei ngôi 'bơ̆t gơ'bang sŏng sa, đei nơ̆r Kră Yang khan kơ bơngai khan lê̆ adrol kră mă chông ba sư brŏk 'noh.

²¹Bơngai kră ôr khan kơ bơngai mă Kră Yang 'Bok Kei-Dei yua mă sư đơ̆ng dêh Juđa 'noh khan: “Kră Yang khan: Yua kơ ih ưh kơ chu nơ̆r Kră Yang, păng ưh kơ wei răk nơ̆r Kră Yang 'Bok Kei-Dei tơtă pơkă kơ ih.

²²Ih brŏk păng sŏng sa nhă đak tơ anih mă Kră Yang 'Bok Kei-Dei ưh kơ ăn ih sŏng sa nhă đak. Lei na mưh ih lôch, akâu ih ưh kơ gơh 'bŭ hơdai tơ bơsat lu 'bok kơdră ih ôh.

²³Đơ̆ng rŏng kơ bơngai mă Kră Yang 'Bok Kei-Dei yua ei sŏng sa păng nhă đak đang boih, na bơngai khan lê̆ adrol kră mă chông sư brŏk ăn kơ sư aseh hao brŏk.

²⁴Sư brŏk oei rok trong tơ'bơ̆p dăm-brang châu pơlôch sư hloi, lê̆ akâu sư 'bơ̆t trong, aseh păng dăm-brang dơ̆ng gah cheng.

²⁵Đei bơngai năm trong 'noh 'bôh akâu bơngai lôch păng dăm-brang dơ̆ng 'bơ̆t cheng, na năm roi ăn tôm tơdrong kơ lu bơngai oei lăm pơlei 'bok mă khan lê̆ adrol kră 'noh oei.

²⁶Lăp bơngai khan lê̆ adrol kră bơngai mă chông ba sư brŏk kơtơ̆ng thoi noh, na khan: Sư 'noh bơngai Kră Yang 'Bok Kei-Dei, ưh kơ chu nơ̆r Kră Yang. Thoi noh na Kră Yang ăn dăm-brang châu pơlôch sư, kiơ̆ thoi Kră Yang đei khan boih kơ sư.

²⁷Sư khan hloi kơ lu kon drŏ-nglo sư: Tơlĕch ăn kơ 'bă aseh, na lu kon sư tơlĕch ăn aseh kơ 'bă sư.

²⁸Sư năm tơ noh 'bôh akâu bơngai lôch 'noh 'bơ̆t trong, hăm aseh păng dăm-brang dơ̆ng 'bơ̆t cheng, dăm-brang ưh kơ sa akâu bơngai lôch păng kư̆m ưh kơchâu aseh 'noh.

²⁹'Bok khan lê̆ adrol kră 'noh atŏk akâu bơngai mă Kră Yang 'Bok Kei-Dei yua noh tơ kơpal kơdŭ aseh, chơ ba sư brŏk tơ pơlei sư, nhơ̆m hmoi pơdong păng 'bŭ hơmet.

³⁰Sư 'bŭ atâu 'noh lăm bơsat sư kơdih, nhơ̆m hmoi kơ bơngai mă Kră Yang 'Bok Kei-Dei yua. Ơ! Mơnat oh inh.

³¹Đang kơ 'bŭ bơngai 'noh, na sư khan kơ lu kon drŏ-nglo sư: Layơ 'bă lôch lu iĕm athei 'bŭ 'bă lăm bơsat mă bơ̆n 'bŭ akâu bơngai mă Kră Yang 'Bok Kei-Dei yua, 'măn kơting inh 'bơ̆t cheng kơting bơngai 'noh.

³²Yua kơ dôm nơ̆r sư pơma chu nơ̆r Kră Yang pơma blah chơnang soi lăm Pơlei Bethel păng lu hnam pơm yang tơ kơjung lăm dêh Samari, gô 'blep trŏ tơpă.

³³Đơ̆ng rŏng kơ tơdrong noh hlôi bơih, Jêrôbôam ưh kơ weh ôh đơ̆ng tơdrong yoch kơnê̆ sư pơm 'noh, sư rai chă pôk lơ bơngai đơ̆ng lăm pơlei pơla pơm 'bok soi tơ hnam kơkuh kơ rup yang tơ lu anih kơjung bơngai bu 'maih pơm 'bok soi, sư ăn kơ bơngai 'noh pơm 'bok soi tơ rim anih kơjung.

³⁴Tơdrong 'nâu jing tơdrong yoch kơnê̆ tih kơ adrĕch hnam Jêrôbôam pơm ăn kơ dêh char sư pơchah pơchek păng đe pơlôch đĭ-đăng đơ̆ng kơpal teh đak âu.