Read bahnar I Pot 16 Bible Online

I Pot 16 - bahnar bible

I Pot 16

¹Đei nơ̆r Kră Yang tơbăt kơ Jêhu, kon drŏ-nglo Hanani nơ̆r noh tơblah hăm Baasa:

²Inh tơiung atŏk ih đơ̆ng 'mui teh ăn kơ ih pơm pơtao lu kon pơlei pơla Isơrael Inh. Mă-lei ih năm kiơ̆ trong Jêrôbôam păng pơm kơ lu bơngai Isơrael kon pơlei pơla Inh pơm yoch, pơm tơblĕk Inh hăm tơdrong yoch lu sư.

³Yua kơ thoi noh na Inh gô pơlôch pơgoh lê̆ Baasa, păng đĭ hnam dơnŏ adrĕch sư, Inh gô pơm kơ hnam sư răm đĭ, thoi hnam Jêrôbôam kon drŏ-nglo Nêbat.

⁴Bơngai bu gah hnam Baasa lôch lăm pơlei, kŏ gô sa păng tơdah lôch tơ bri sem păr gô choh sa.

⁵Dôm tơdrong jang nai Baasa păng tơdrong mă sư đei pơm bơih đe đei chih lê̆ bơih lăm sơ̆p hla bơar hơ'mon lu pơtao đe Isơrael.

⁶Baasa lôch năm oei hơdai hăm lu 'bok kơdră sư, păng đe 'bŭ sư tơ Pơlei Tirsa. Êlah kon drŏ-nglo sư pơgơ̆r pơtrơp sư.

⁷Đei dơ̆ng nơ̆r Kră Yang khan kơ Jêhu 'bok khan lê̆ adrol, kon Hanani, nơ̆r noh blah Baasa păng adrĕch sư, yua kơ tơdrong yoch kơnê̆ mă sư đei pơm 'bơ̆t anăp Kră Yang, păng tơblĕk Kră Yang hăm tơdrong sư pơm, sư pơm rok thoi adrĕch hnam Jêrôbôam păng yua kơ sư pơlôch pơrăm adrĕch hnam noh.

⁸Lăm sơnăm mă 'bar-jĭt tơdrâu, chăl Asa pơm pơtao đe Juđa, Êlah kon drŏ-nglo Baasa tŏk pơm pơtao đe Isơrael. Sư oei tơ Pơlei Tirsa, pơgơ̆r lăp 'bar sơnăm đĕch.

⁹Simri bơngai pơm yŏng wei-lăng minh puăt gre aseh sư, chă đon pơm kơnê̆ kơ sư. Êla oei lăm Pơlei Tirsa, kơplah et tơdrô suai tơ lăm hnam Arsa bơngai wei-lăng hnam pơtao tơ pơlei Tirsa,

¹⁰Simri mơ̆t lăm hnam teh păng 'bet pơlôch hloi Êla lăm sơnăm mă 'bar-jĭt tơpơh chăl Asa pơm pơtao đe Juđa, đơ̆ng noh Sư tŏk pơm pơtao pơtrơp hloi.

¹¹Lăp Simri tŏk pơm pơtao, sư pơlôch pơđĭ bơngai lăm hnam Baasa ưh kơ lê̆ minh 'nu drŏ-nglo ayơ, mă khan lăm adrĕch adrung dah buăl juăt.

¹²Thoi noh Simri pơlôch pơđĭ boih adrĕch hnam Baasa, kiơ̆ thoi nơ̆r Kră Yang đei khan bơih kơ Jêhu 'bok khan lê̆ adrol nơ̆r noh blah Baasa,

¹³yua kơ tơdrong yoch Baasa păng Êlah kon drŏ-nglo sư đei pơm, păng tơdrong sư pơm ăn kơ lu bơngai Isơrael dai wang pơm yoch rok sư, tơblĕk Kră Yang 'Bok Kei-Dei Isơrael hăm tơdrong lu sư pơm kơkuh kơ rup yang.

¹⁴Dôm tơdrong jang nai Êlah pơm, đe đei chih lê̆ bơih tơ lăm sơ̆p hla bơar hơ'mon lu pơtao đe Isơrael.

¹⁵Lăm sơnăm mă 'bar-jĭt tơpơh chăl Asa pơm pơtao đe Juđa, Simri pơgơ̆r 'nao lăp tơpơh năr tơ lăm Pơlei Tirsa. Kơplah noh lu linh Isơrael oei wang tăp dăr Pơlei Gibêthôn, pơlei lu bơngai Philistin.

¹⁶Lăp lu linh lăm kơđông kơtơ̆ng đe khan Simri blơ̆ păng pơlôch pơtao. Đĭ-đăng kon pơlei pơla Isơrael pôk Ômri bơngai mă pơm yŏng linh, ăn kơ sư pơm pơtao Isơrael.

¹⁷Na Ômri păng đĭ-đăng kon pơlei Isơrael tŏk đơ̆ng Pơlei Gibêthôn năm wang tơ Pơlei Tirsa.

¹⁸Lăp Simri 'bôh đe wang tăp dăr kơ pơlei bơih na sư mơ̆t tơ lăm kơđông hnam pơtao mă kơjăp dêh, na sư soh hnam pơtao păng akâu sư lôch hloi lăm noh.

¹⁹'Noh yua kơ đơ̆ng tơdrong yoch sư pơm, pơm tơdrong kơnê̆ 'bơ̆t anăp Kră Yang, rok kiơ̆ trong Jêrôbôam, kơdih akâu sư pơm yoch păng pơm ăn kơ Isơrael jing yoch kiơ̆.

²⁰Dôm tơdrong jang nai mă Simri pơm păng tơdrong Simri chă đon pơdăr blơ̆ pơtao đe đei chih lê̆ bơih tơ lăm sơ̆p hla bơar hơ'mon lu pơtao đe Isơrael.

²¹Lu bơngai Isơrael tơklah jing 'bar khŭl; minh khŭl kiơ̆ Tipni, kon drŏ-nglo Ginat, wă pôk sư pơm pơtao; minh khŭl kiơ̆ Ômri.

²²Mă-lei khŭl Ômri pran hloh kơ khŭl kiơ̆ Tipni, kon drŏ-nglo Ginat. Thoi noh Tipni lôch na Ômri pơm pơtao.

²³Lăm sơnăm mă pêng-jĭt mônh lăm chăl Asa pơm pơtao đe Juđa, Ômri tŏk pơm pơtao đe Isơrael, sư pơgơ̆r mơjĭt-'bar sơnăm. Sư pơgơ̆r oei lăm Pơlei Tirsa tơdrâu sơnăm.

²⁴Sư răt groi Samari đơ̆ng 'bok Sêmer 'bar hlak talâng hu; tơ kơpal groi 'noh sư pơjing minh pôm pơlei kơjăp sư anăn pơlei 'noh Samari, anăn kiơ̆ tơ'ngla groi noh.

²⁵Ômri pơm kơnê̆ 'bơ̆t anăp Kră Yang. Sư pơm tơdrong kơnê̆ hloh kơ đĭ-đăng lu bơngai adrol kơ sư.

²⁶Sư kiơ̆ trong Jêrôbôam, kon drŏ-nglo Nêbat đei pơm, tơdrong sư pơm 'noh pơm ăn kơ lu bơngai Isơrael pơm yoch kiơ̆, tơblĕk Kră Yang 'Bok Kei-Dei đe Isơrael hăm tơdrong kơkuh kơ rup yang.

²⁷Tơdrong jang nai mă Ômri pơm, păng tơdrong sư gơh pơgơ̆r, đe đei chih bơih lăm sơ̆p hla bơar hơ'mon lu pơtao đe Isơrael.

²⁸Ômri lôch năm oei hơdai hăm lu 'bok kơdră sư, đe 'bŭ sư lăm Pơlei Samari. Ahap kon drŏ-nglo sư, pơm pơtao pơgơ̆r pơtrơp sư.

²⁹Lăm sơnăm mă pêng-jĭt tơhngam, chăl Asa pơm pơtao đe Juđa, Ahap kon drŏ-nglo Ômri pơm pơtao đe Isơrael tơ Pơlei Samari 'bar-jĭt 'bar sơnăm.

³⁰Ahap kon drŏ-nglo Ômri pơm tơdrong kơnê̆ 'bơ̆t anăp Kră Yang hloh kơ đĭ-đăng lu pơtao adrol kơ sư.

³¹Sư lăng pơm yoch rok thoi Jêrôbôam kon drŏ-nglo Nêbat iĕ đĕch, sư iŏk Jêsebel kon drŏ-kăn Êtbaal pơtao đe Siđôn pơm akăn; sư bơ̆jang kơ yang Baal păng kơkuh kơ yang 'noh.

³²Sư pơm chơnang soi ăn kơ yang Baal lăm hnam yang Baal lăm Pơlei Samari.

³³Ahap kư̆m man minh pôm rup yang yă Asêra. Ahap pơm lơ tơdrong yoch kơnê̆, pơm tơblĕk Kră Yang 'Bok Kei-Dei đe Isơrael hloh kơ lu pơtao đe Isơrael adrol kơ sư.

³⁴Lăm chăl Ahap pơgơ̆r, Hiel đơ̆ng pơlei Bethel tơiung pơdơ̆ng Pơlei Jêrikô. Lăp sư wă man jrăng hơnă hnam Abiram kon drŏ-nglo kơdră sư lôch, kơplah sư pơm 'măng jang, Sêgup kon adruch sư lôch. Trŏ thoi nơ̆r Kră Yang, yua 'bơ̆r Jôsuê, kon drŏ-nglo Nun đei khan lê̆ adrol.