Read bahnar I Pot 17 Bible Online

I Pot 17 - bahnar bible

I Pot 17

¹Êli bơngai Pơlei Tisbe, oei tơ Pơlei Tisbe lăm char Gileat, sư khan kơ Ahap: “Inh dơ̆ng 'bơ̆t anăp Kră Yang 'Bok Kei-Dei đe Isơrael mă arih khan: Lăm sơnăm tơ anăp 'nâu, gô đei tơdrong phang-ang, tŭk păng đak 'mi ưh kơ đei jur tơ teh, dĭng truh tơ Inh đei khan dơ̆ng.”

²Đơ̆ng noh đei nơ̆r Kră Yang khan kơ Êli:

³“Ih athei weh đơ̆ng âu năm tơ gah hơlĕch, ôn akâu ih tơ Thong đak Kêrit, gah hơlĕch kơ đak krong Jôrđăn.

⁴Ih gô nhă đak thong Kêrit 'noh păng Inh gô wơh sem ak 'me rong ih tơ noh.”

⁵Thoi noh na Êli chu nơ̆r Kră Yang athei sư năm oei tơ thong đak Kêrit gah hơlĕch kơ đak krong Jôrđăn.

⁶Rim pơgê kơsơ̆ ak jơngong ba ăn kơ sư 'bĕng mi păng 'nhĕm kông păng sư nhă đak thong Kêrit.

⁷Mă-lei đơ̆ng rŏng kơ noh 'biơ̆ đak thong 'noh hrơ̆, yua kơ ưh kơ đei đak 'mi tơ lăm char noh.

⁸Na đei nơ̆r Kră Yang khan kơ Êli:

⁹“Ih athei iung weh đơ̆ng anih 'nâu năm bĕ tơ Pơlei Sarepha lăm dêh char Siđôn ih oei hloi tơ noh. Na Inh đei pơkă bơih kơ minh 'nu drŏ-kăn adro 'me rong ih tơ noh”.

¹⁰Thoi noh, sư iung năm tơ Pơlei Sarepha; lăp sư truh 'bơ̆t 'măng jang pơlei, sư 'bôh minh 'nu drŏ-kăn adro oei dônh 'long ŭnh, Êli krao drŏ-kăn adro 'noh păng khan: “Inh apinh ih sŏ đak lăm ge hơya tŏ sĕt ăn kơ inh nhă.”

¹¹Lăp drŏ-kăn adro 'noh wă năm sŏ đak, Êli krao hơlơ̆k sư dơ̆ng păng khan: “Ih athei chĕp ba ăn kơ inh 'bĕng mi hai!”

¹²Drŏ-kăn adro ei tơl: “Đei Kră Yang 'Bok Kei-Dei ih oei arih băt, inh ưh pă đei minh pôm 'bĕng. Inh oei pă minh chup tơpŭng lăm ge păng đak rơmă kư̆m dai oei tŏ sĕt lăm getchai. 'Nâu inh chă dônh minh 'bar tŏ 'long ŭnh, wă brŏk pơm ăn kơ nhi kon drŏ-nglo inh 'bĕng; wă sa pơtôch, na nhi gô lôch đĕch bơih.”

¹³Mă-lei Êli khan kơ sư: “Ih 'nĕ kơ hli, ih athei brŏk pơm hloi thoi ih khan 'noh, mă adrol ih athei yua tơpŭng 'noh pơm ăn kơ inh minh pôm 'bĕng iĕ, đơ̆ng noh ba ăn kơ inh tơ âu; đơ̆ng rŏng kơ 'noh ih pơm ăn kơ ih păng kon drŏ-nglo ih.

¹⁴Yua kơ đei nơ̆r Kră Yang 'Bok Kei-Dei đe Isơrael khan: ‘Tơpŭng ưh kơ đĭ ôh đơ̆ng lăm ge păng đak rơmă kư̆m ưh kơ đĭ mơ̆n đơ̆ng lăm get, dĭng truh tơ năr Kră Yang ăn đak 'mi jur tơ teh.’ ”

¹⁵Sư brŏk pơm kiơ̆ thoi nơ̆r Êli khan, lăm hnam dơnŏ sư păng Êli sa 'bĕng 'noh tôm mah rim năr.

¹⁶Tơpŭng ưh kơ đĭ đơ̆ng lăm ge, đak rơmă ôliwơ kư̆m ưh kơ đĭ đơ̆ng lăm get, trŏ thoi nơ̆r Kră Yang đei yua Êli bơtho akhan.

¹⁷Đơ̆ng rŏng kơ 'noh kon drŏ-nglo yă tơ'ngla hnam jĭ dêh rai dêh kơtĕch jơhngơ̆m.

¹⁸Na yă tơ'ngla hnam 'noh khan kơ Êli. “Ơ bơngai mă Kră Yang 'Bok Kei-Dei yua, inh hăm ih đei tơdrong kiơ? Hăm trŏ ih năm tơ hnam inh 'nâu wă tơ'blŏk kơ inh đei tơdrong yoch păng pơlôch kon drŏ-nglo inh”.

¹⁹Êli tơl sư: “Ăn kon ih tơ âu,” Êli glơng iŏk đơ̆ng ti mĕ sư tŏk tơ anih sư 'bĭch tơ kơpal, tơ'bĭch sư kơpal giơng.

²⁰Na sư krao khan kơ Kră Yang: “Ơ Kră Yang 'Bok Kei-Dei inh! Yua kơ kiơ Ih ăn tơdrong truh kơ yă adro 'nâu, hnam sư 'nâu jơ̆ anih inh oei pơdơh, mă wă lê̆ kơ kon sư lôch hă?”

²¹Đơ̆ng noh sư brom kơpal bơngai 'lơ̆p 'noh pêng wơ̆t păng krao khan kơ Kră Yang: “Ơ Kră Yang 'Bok Kei-Dei inh! Apinh Ih ăn bơhngol bơngai 'lơ̆p 'nâu wih mơ̆t lăm akâu sư dơ̆ng.”

²²Kră Yang mơ̆ng păng tơl tơwih nơ̆r Êli krao khan; bơhngol bơngai 'lơ̆p 'noh mơ̆t dơ̆ng tơ lăm akâu sư na sư iung arih dơ̆ng.

²³Êli glơng bơngai 'lơ̆p 'noh đơ̆ng anih kơpal jur tơ ala, jao bơngai 'lơ̆p 'noh kơ mĕ sư păng khan, “ih lăng âu kon ih arih bơih.”

²⁴Yă adro noh khan kơ Êli: “Dang ei inh băt kơ ih 'nâu minh 'nu bơngai đơ̆ng Kră Yang 'Bok Kei-Dei yua, dôm nơ̆r Kră Yang pơm lăm 'bơ̆r ih sĭt tơpă.”