Read bahnar I Pot 18 Bible Online

I Pot 18 - bahnar bible

I Pot 18

¹Đunh năr đơ̆ng noh, truh lăm sơnăm mă pêng, đei nơ̆r Kră Yang khan kơ Êli: “Ih athei năm tơ'bơ̆p Ahap; Inh gô ăn đak 'mi jruh tơ teh dơ̆ng.

²Thoi noh na Êli năm tơ'bơ̆p Ahap. Kơplah noh lăm dêh char Samari đei tơdrong pơngot rơwĕt tih dêh.

³Ahap krao Ôbadia bơngai wei-lăng hnam pơtao Ôbadia hli yom kơ Kră Yang dêh.

⁴Kơplah Jêsebel pơlôch lu bơngai khan lê̆ adrol mă Kră Yang yua, Ôbadia ba minh-hrĕng 'nu lu bơngai khan lê̆ adrol ôn lu sư tơ 'bar anih lăm hơgơp tơmo lăm minh anih pơđăm-jĭt 'nu, ăn kơ lu sư tơmam sa păng đak nhă.

⁵Ahap khan kơ Ôbadia: “Ih athei chă năm tơ jơ̆p-jang dêh char păng tơ rim kơ tu thong đak, rŏ lăng bơ̆n chă oei 'bôh đei 'nhĕt wă kơ hiĕm aseh oei arih, wă kơ lu sem dơrong huay kơ lôch hiong.”

⁶Thoi noh, na bre sư asong băl chă năm jơ̆p tơring char. Ahap sư năm trong 'nâu, Ôbadia sư năm trong to.

⁷Kơplah Ôbadia oei năm rok trong Êli tơ'bơ̆p sư. Ôbadia kơnăl kơ sư na drap tơ teh păng jet: “Hăm trŏ kơ ih Êli yŏng inh ưh?”

⁸Sư tơl: “Trŏ kơ inh bơih. Năm roi bĕ kơ yŏng ih khan: ‘Êli oei tơ âu.’ ”

⁹Ôbadia tơl: “Inh đei pơm tơdrong yoch kiơ, na ih pơjao inh mă đam ih lăm tơpang ti Ahap, wă kơ sư pơlôch inh?

¹⁰Inh pơma tơpăt 'bơ̆t anăp Kră Yang 'Bok Kei-Dei ih mă oei arih, ưh kơ đei minh pôm dêh char ayơ, minh adrĕch adrung ayơ mă yŏng inh ưh kơ đei athei lu sư chă ih; păng tơdah đe khan: Êli ưh kơ đei tơ âu, sư athei dêh char dah adrĕch adrung 'noh athei pơkă gah tơdrong khan lu sư ưh kơ 'bôh ih.

¹¹Mă-lei dang ei ih khan kơ inh: “Ih athei năm roi kơ yŏng ih: Êli oei tơ âu.”

¹²Inh ưh kơ băt mưh inh weh đơ̆ng ih, kơnh Yang Bơhngol Kră Yang gô pôk hiŏng tơweh ih tơ nai, Mưh inh năm roi kơ Ahap, athei năm tơ âu na ưh kơ 'bôh ih tơ anih 'nâu lei sư gô pơlôch inh, mă khan inh đam ih, hli yom kơ Kră Yang đơ̆ng inh oei 'lơ̆p ră.

¹³Kơplah Jêsebel pơlôch lu bơngai khan lê̆ adrol mă Kră Yang yua, inh năm ba minh-hrĕng 'nu bơngai khan lê̆ adrol mă Kră Yang yua chă ôn tơ 'bar anih hơgơp tơmo, tơ minh anih pơđăm-jĭt 'nu inh ăn kơ lu sư tơmam sa păng đak nhă.

¹⁴Na dang ei ih khan: “Ih athei roi bĕ kơ yŏng ih, Êli tơ âu. Sư gô pơlôch inh.”

¹⁵Êli tơl: “Inh dơ̆ng 'bơ̆t anăp Kră Yang tih hloh oei arih, inh gô tơ'bơ̆p Ahap năr 'nâu.”

¹⁶Thoi noh Ôbadia năm tơ'bơ̆p păng roi kơ Ahap, na Ahap năm tơ'bơ̆p Êli.

¹⁷Lăp Ahap 'bôh Êli na sư khan kơ Êli. “Ih hă pơrŭng lu bơngai Isơrael?”

¹⁸Êli tơl: “Inh ưh kơ pơrŭng ôh lu bơngai Isơrael, ih păng hnam 'bă ih pơrŭng lu bơngai Isơrael, yua kơ lu iĕm hŭt lê̆ tơdrong Kră Yang tơtă na lui kiơ̆ yang Baal.

¹⁹Thoi noh ih athei bĕ đe năm krao akŭm đĭ-đăng lu bơngai Isơrael, tơ'bơ̆p inh tơ kông Karmel păng puăn-hrĕng pơđăm-jĭt 'nu lu bơngai khan lê̆ adrol gah yang Baal, păng puăn-hrĕng 'nu lu bơngai khan lê̆ adrol yang Asêra păng lu bơngai sŏng sa tơ gơ'bang Jêsebel.

²⁰Thoi noh Ahap athei đe năm krao akŭm đĭ-đăng lu bơngai Isơrael păng lu bơngai khan lê̆ adrol năm akŭm tơ Kông Karmel.

²¹Đơ̆ng noh Êli năm dơ̆ng 'bơ̆t anăp lu kon pơlei pơla păng khan: Lu iĕm năm ting bơring kiơ̆ 'bar pah trong 'nâu dĭng dang yơ? Tơdah Kră Yang 'Bok Kei-Dei lei iĕm athei kiơ̆ Kră Yang, tơdah Baal jơ̆ Kră Yang 'Bok Kei-Dei lei iĕm athei kiơ̆ Sư. Mă-lei lu kon pơlei pơla ưh kơ đei tơl sư minh nơ̆r.

²²Na Êli khan kơ lu kon pơlei pơla: “Inh, lăp minh 'nu inh đĕch bơngai khan lê̆ adrol mă Kră Yang yua mă oei oei, lu bơngai khan lê̆ adrol gah yang Baal đei puăn-hrĕng pơđăm-jĭt 'nu.

²³Chă ăn kơ nhôn 'bar tŏ rơmo tơno; ăn kơ lu sư rơih iŏk minh pôm kơdih, kăt hlơ-hlah na dan sư kơpal 'long ŭnh mă-lei 'nĕ kơ soh ŭnh, inh kư̆m dai kăt hlơ-hlah minh pôm rơmo tơno dan kơpal 'long ŭnh kư̆m ưh kơ soh ŭnh mơ̆n.

²⁴Iĕm athei krao apinh anăn yang iĕm, gah inh krao apinh Anăn Kră Yang. Yang ayơ mă tơl tơwih ăn ŭnh soh 'long ŭnh, 'noh bơih Kră Yang 'Bok Kei-Dei. Na đĭ-đăng kon pơlei pơla tơl khan: Nơ̆r ih pơma 'noh trŏ bơih.

²⁵Êli khan kơ lu bơngai khan lê̆ adrol gah yang Baal. Iĕm rơih iŏk minh pôm rơmo tơno kơ lu iĕm bĕ, păng kăt hlơ-hlah adrol yua kơ iĕm bơngai lơ; na krao apinh anăn yang lu iĕm; mă-lei iĕm 'nĕ kơ soh ŭnh tơ 'long ŭnh noh.

²⁶Thoi noh lu sư iŏk rơmo dui ba tơ noh, kăt hlơ-hlah pơm hơmet, Đơ̆ng noh lu sư krao apinh hăm anăn yang Baal: Ơ Baal! Apinh tơl tơwih nơ̆r nhôn. Mă-lei ưh kơ đei nơ̆r tơl tơwih; lu sư suang pơplŏng tăp dăr kơ chơnang soi lu sư pơm 'noh, đơ̆ng pơgê hrôih truh tơ 'năr dơ̆ng.

²⁷Truh năr dơ̆ng bơih Êli che bơle kơ lu sư khan: “Iĕm krao mă rơ̆n wăi, sư yang tơpă wăi. Băt Sư oei tơchĕng, băt sư oei krŭl tơ nai păng băt sư oei chă ngôi tơ ataih, dah mă oei tep, iĕm râu sư wăi.

²⁸Kơtơ̆ng lei lu sư krao ôr rai rơ̆n, iŏk đao tơju raih akâu lu sư kơdih pham lĕch djrông djrang mang.

²⁹Lăp 'năr kơsơ̆ glơh bơih lu sư krao ôr 'bơ̆r re păng truh jơ pơyơ̆r tơmam soi phe 'ba ăn kơ yang Baal 'bơ̆t jơ kơsơ̆ ei bơih, mă-lei ưh kơ kơtơ̆ng nơ̆r kiơ, kư̆m ưh kơ đei bu tơl păng ưh kơ đei bu mă hiơ̆k ăn.

³⁰Na Êli khan kơ lu kon pơlei pơla, “apinh iĕm năm jê̆ tơ âu:” Na lu kon pơlei pơla năm dơ̆ng jê̆ sư. Êli hơmet ming chơnang soi Kră Yang mă răm bơih.

³¹Êli iŏk mơjĭt-'bar tŏ tơmo kiơ̆ kơsô̆ mơjĭt-'bar adrĕch kon drŏ-nglo Jakôp, bơngai mă nơ̆r Kră Yang khan: “Anăn ih gô krao Isơrael.

³²Sư yua mơjĭt-'bar tŏ tơmo 'noh pơm minh pôm chơnang soi yua hăm Anăn Kră Yang; sư sir hơbong tăp dăr kơ chơnang soi, să sư bơ̆n gơh tah 'bar hnŏng mong găr adrĕch.

³³Sư dan 'long ŭnh păng kăt kơnăt 'nhĕm rơmo tơno 'noh dan tơ kơpal 'long ŭnh. Đơ̆ng noh sư khan: “Tuh đak 'bĕnh kơ puăn tŏ ge păng tuh đak noh tơ kơpal 'nhĕm kơnăt păng 'long ŭnh.”

³⁴“Sư athei đe tuh đak 'măng mă 'bar dơ̆ng đe tuh đak 'măng mă 'bar. Sư khan dơ̆ng:” Iĕm athei tuh dơ̆ng 'măng mă pêng, na đe tuh 'măng mă pêng.

³⁵Dĭng đak ro tăp dăr kơ chơnang soi păng 'bĕnh kơ hơbong.

³⁶Gah kơsơ̆, truh jơ pơyơ̆r tơmam soi, Êli bơngai khan lê̆ adrol năm dơ̆ng jê̆ chơnang soi 'noh păng krao khan: “Ơ Kră Yang, 'Bok Kei-Dei Abraham, Isăk păng Isơrael, năr 'nâu apinh ih ăn kơ đe băt Ih boih Kră Yang 'Bok Kei-Dei lăm khŭl bơngai Isơrael. Inh đĭch đam Ih, chu nơ̆r Ih pơm kiơ̆ tôm tơdrong Ih bơtho akhan.

³⁷Ơ Kră Yang! Apinh Ih mơ̆ng păng tơl tơwih nơ̆r inh, wă kơ lu kon pơlei pơla 'nâu băt kơnăl Ih bơih Kră Yang 'Bok Kei-Dei păng gô pơm kơ jơhngơ̆m lu sư wih tơ Ih.

³⁸Kơplah noh ŭnh đơ̆ng Kră Yang jruh soh sa tơmam soi 'buh, 'long ŭnh, tơmo, 'mui teh păng đak lăm hơbong 'noh hrơ̆ đĭ.

³⁹Lăp kon pơlei pơla 'bôh thoi noh bơih lu sư drap brom tơ teh kơkuh păng khan: Kră Yang bơih 'Bok Kei-Dei! Kră Yang bơih 'Bok Kei-Dei!”

⁴⁰Êli khan kơ lu sư: “Rôp bĕ đĭ lu bơngai khan lê̆ adrol gah yang Baal, 'nĕ kơ ăn minh 'nu bơngai ayơ klaih.” Lu sư rôp hloi lu bơngai 'noh. Êli chông ba lu sư jur tơ thong đak Kisôn păng pơlôch đĭ lu sư tơ noh.

⁴¹Êli khan kơ Ahap: “Tŏk năm, sŏng sa păng et yua kơ inh kơtơ̆ng jơwa 'mi tih.”

⁴²Na Ahap tŏk năm sŏng sa păng et, Êli tŏk tơ kơpal kông Karmel, kŭp tơ teh, muh măt sư kŭp sơlam 'bar pah kŭl-tăng sư.

⁴³Sư khan kơ đam sư: “Ih năm lăng tơ gah đak dơsĭ.” Đam sư tŏk lăng, păng khan: “Inh ưh kơ đei 'bôh kiơ.” Êli khan dơ̆ng: “Ih athei năm dơ̆ng tơ noh tơpơh wơ̆t.”

⁴⁴Wơ̆t mă tơpơh, đam sư khan: “Tơ đak dơsĭ inh 'bôh hơmơ̆l tŏ tơpang ti bơngai tŏk đơ̆ng đak dơsĭ.” Êli khan. “Năm roi bĕ kơ Ahap: Apinh pơtao hơmet gre aseh jah jur năm, kơnh hli kơ 'mi pơm kơ ih ưh kơ gơh kơ năm.

⁴⁵Lăp pă 'biơ̆ kơ noh đei hơmơ̆l găm suek, đei kial bah păng đei 'mi tih hloi. Ahap hao gre aseh hăt hot năm tơ Pơlei Jêsreel.

⁴⁶Ti Kră Yang chro pel akâu Êli. Sư iŏk tơlei tơ̆n, tơ̆n tơ kơiĕng păng sư kơdâu adrol kơ Ahap, truh tơ 'măng wă mơ̆t Pơlei Jêsreel.