Read bahnar I Pot 2 Bible Online

I Pot 2 - bahnar bible

I Pot 2

¹Năr Đawit lôch wă jê̆ truh boih, na sư tơtă kơ Sôlômôn kon drŏ-nglo sư:

²“Inh wă jê̆ năm boih tơ trong mă đĭ-đăng kon bơngai ala teh âu gô năm, ih athei pran kơtang bĕ păng pơdah ih jing minh 'nu bơngai yŏng nuih.

³Păng athei wei răk dôm nơ̆r Kră Yang 'Bok Kei-Dei đei pơkă, wă kơ ih pơm kiơ̆, yak năm rok trong Sư, wei răk dôm tơdrong juăt Sư păng dôm nơ̆r Sư tơtă, păng dôm nơ̆r Sư bơtho, thoi đei chih boih lăm tơdrong juăt Môis, wă kơ dôm tơdrong ih jang kiơ, pơm kiơ, dah năm tơ yơ gô hiôk jơnap

⁴păng wă kơ Kră Yang gô pơsĭt nơ̆r Sư pơkă hăm inh khan: ‘Tơdah lu kon sâu ih kơchăng arih sa, tơdah lu sư wă yak năm 'bơ̆t anăp Inh, pơm kiơ̆ tơdrong juăt Inh hăm đĭ jơhngơ̆m klơm klak, lei ih ưh kơ'bah ôh bơngai hơ-oei kơpal tang-dŏ pơtao Isơrael pơtrơp ih.’

⁵Ih băt mơ̆n tơdrong kiơ Jôap kon drŏ-nglo Sêruia pơm boih kơ 'bă păng pơm boih kơ 'bar 'nu yŏng linh Isơrael, Apner kon drŏ-nglo Nêr păng Amasa kon drŏ-nglo Jêther, sư pơlôch bre noh kơplah rơngei hiôk-hian nhen thoi kơplah oei tơblah wang hrang tơ'bet, pham oei klep 'bơ̆t tơlei tơ̆n sư păng tơ chơkhŏ sư oei 'bot.

⁶Thoi noh, pơm bĕ kiơ̆ kơ ih gơh hơgei, mă-lei 'nĕ kơ lê̆ kơ̆l sŏk ko sư jur tơ dêh atâu hiôk-hian.

⁷Ih athei oei hiôk hơiă hăm lu kon drŏ-nglo Barsilai bơngai Gileat, ih athei pơm 'lơ̆ng kơ lu sư, ăn kơ lu sư sŏng sa hơdai hăm ih minh pôm gơ'bang, yua kơ sơ̆ lu sư kư̆m pơm 'lơ̆ng kơ inh, sơng iŏk inh kơplah inh kơdâu jăk đơ̆ng Apsalôm 'nhŏng ih.

⁸Kŭm đei, anăn sư Simei kon drŏ-nglo Gêra, bơngai Bênjamin đơ̆ng pơlei Bahurim, sư yua lu nơ̆r kơnê̆ blei hiap 'bă lăm năr mă 'bă truh tơ Mahanaim, mă-lei 'bơ̆t sư jur tơ'bơ̆p inh tơ đak Krong Jôrđăn, na inh yua hăm anăn Kră Yang pơkă pơkăm hăm sư: Inh ưh kơ pơlôch ih hăm đao gưm.

⁹Yua kơ thoi noh na dang ei ih 'nĕ kơ jô̆ sư noh ưh kơ đei yoch, yua kơ ih jơ̆ minh 'nu bơngai gơh hơgei, ih băt wă pơm kơ sư thoi yơ, ih athei pơm kơ kơ̆l sŏk ko sư 'bơm pham ngăl na jur tơ dêh atâu.”

¹⁰Klaih kơ noh Đawit lôch, tep hiôk năm oei hơdai hăm lu 'bok yă sư, đe 'bŭ sư tơ pơlei Đawit.

¹¹Chăl Đawit pơgơ̆r lu bơngai Isơrael đei puăn-jĭt sơnăm; sư pơgơ̆r tơ pơlei Hêbrôn tơpơh sơnăm, tơ pơlei Jêrusalem pêng-jĭt sơnăm.

¹²Sôlômôn hơ-oei kơpal tang-dŏ pơtao Đawit 'bă sư păng dêh char pơtao sư kơjăp 'lơ̆ng tơpă.

¹³Adonija kon drŏ-nglo yă Hagit năm tơ'bơ̆p yă Batsêba mĕ Sôlômôn. Yă Batsêba jet sư: “Ih năm tơ âu jơhngơ̆m hăm hiôk-hian ưh?” Sư tơl: “Jơhngơ̆m inh hiôk-hian.”

¹⁴Sư khan: “Inh đei minh tơdrong wă pơma dơnuh hăm ih.” Yă Batsêba tơl: “Ih pơma bĕ.”

¹⁵Sư pơma: “Ih băt boih dêh char pơtao 'nâu trŏ kơ inh pơgơ̆r ră păng đĭ-đăng bơngai Isơrael chang wă kơ 'bôh inh pơgơ̆r ngăl, mă-lei dang ei dêh char âu jing oh inh pơgơ̆r, yua kơ đơ̆ng Kră Yang ăn kơ sư.

¹⁶Dang ei inh đei minh tơdrong wă apinh ih, ih 'nĕ kơ sơngah.” Yă Batsêba tơl: “Ih pơma bĕ.”

¹⁷Adonija khan: “Apinh ih năm apinh pơtao Sôlômôn, sư ưh kơ sơngah ôh tơdah ih apinh sư, ăn kơ inh iŏk Abisak bơngai Sunamit noh pơm akăn.”

¹⁸Yă Batsêba tơl: Ŏ ah, inh gô roi kơ pơtao tơdrong ih wă noh.

¹⁹Yă Batsêba năm tơ'bơ̆p pơtao Sôlômôn wă roi ăn kơ sư tơdrong Adonija wă noh, na pơtao Sôlômôn iung năm sơng păng kŭp kơ̆l kơkuh kơ mĕ sư, đơ̆ng noh sư hơ-oei tơ tang-dŏ pơtao sư păng athei đe iŏk ăn kơ mĕ sư tang-dŏ wă kơ hơ-oei, na mĕ sư hơ-oei gah 'ma kơ sư.

²⁰Yă Batsêba roi ăn kơ pơtao: “Inh đei minh tơdrong iĕ ioch wă apinh ih kon dăm, ih 'nĕ kơ sơngah.” Pơtao tơl: “Ơ mĕ, ih wă apinh kiơ? Inh ưh kơ sơngah ôh dôm tơdrong ih wă apinh.”

²¹Na mĕ sư khan: “Apinh ih ăn kơ Adonija 'nhŏng ih iŏk Abisak bơngai Sunimit pơm akăn.”

²²Mă-lei pơtao Sôlômôn tơl mĕ sư: “Liơ ih apinh Abisak bơngai drŏ-kăn Sunamit ăn kơ Adonija pơm akăn? Liơ mĕ ưh kơ apinh iŏk đĭ dêh char 'nâu ăn kơ sư hloi, yua kơ sư 'nhŏng inh, liơ mĕ ưh kơ apinh ăn kơ sư 'bok soi Abiathar păng Jôap kon drŏ-nglo Sêruia hai.”

²³Pơtao Sôlômôn yua hăm anăn Kră Yang pơkăm khan: “Apinh Kră Yang 'Bok Kei-Dei pơm kơ inh phak inh mă trăp thoi Sư wă, tơdah Adonija ưh kơ lôch ôh yua kơ tơdrong sư apinh 'nâu.

²⁴Na dang ei kiơ̆ thoi Kră Yang arih Tơ'ngla pơjing inh păng ăn kơ inh hơ-oei 'bơ̆t tang-dŏ pơtao Đawit 'bă inh, păng pơjing ăn kơ inh minh pôm hnam kiơ̆ thoi nơ̆r sư đei pơkă boih, gô pơlôch Adonija năr 'nâu.”

²⁵Thoi noh pơtao Sôlômôn wơh Bênaia kon drŏ-nglo Jêhôiada năm koh pơlôch Adonija hloi.

²⁶Pơtao Sôlômôn khan kơ 'bok soi Abiathar: “Ih athei brŏk tơ pơlei Anathôt, anih ih jang sa, ih trŏ kơ lôch ră, mă-lei năr âu inh ưh kơ pơlôch ih ôh, yua kơ ih tung Hom Pơgơ̆p Kră Yang 'bơ̆t anăp Đawit 'bă inh păng kư̆m wang pŭ tơdrong gleh pơmat hơdai hăm 'bă inh.”

²⁷Na Sôlômôn puh lê̆ Abiathar, ưh pă ăn sư pơm 'bok soi kơ Kră Yang dơ̆ng, noh wă pơsĭt nơ̆r Kră Yang đei pơma khan lê̆ gah adrĕch Hêli tơ pơlei Silô.

²⁸Tơdrong 'nâu kơtơ̆ng truh tơ Jôap, yua kơ sư kiơ̆ khŭl Adonija, mă khan sư ưh kơ kiơ̆ khŭl Apsalôm ră, na sư kơdâu năm tơ bơsŭn anih hnam akŭm Kră Yang păng sư năm rôp hơke mum chơnang soi.

²⁹Đe năm roi kơ pơtao Sôlômôn khan: “Jôap kơdâu đơ̆ng âu boih năm tơ bơsŭn anih akŭm Kră Yang to dang ei sư oei rôp hơke 'bơ̆t mum chơnang soi.” Sôlômôn athei Bênaia kon drŏ-nglo Jêhôiada khan: “Ih năm koh pơlôch sư bĕ.”

³⁰Bênaia năm tơ bơsŭn anih akŭm Kră Yang, sư khan kơ Jôap: “Pơtao khan: Lĕch bĕ đơ̆ng âu.” Jôap tơl: “Inh ưh kơ lĕch, inh gô lôch 'bơ̆t dâu.” Bênaia năm roi ăn kơ pơtao: “Inh khan boih kơ Jôap, sư khan sư ưh kơ lĕch.”

³¹Pơtao Sôlômôn khan: “Pơm bĕ thoi sư nơ̆r khan. Pơlôch sư păng 'bŭ sư, lei na inh păng hnam 'bă inh huay pă pŭ boih pham mă Jôap tuh tơdrong kơ đei.

³²Kră Yang gô pơm tơwih kơ Jôap đêl sư pơlôch tuh pham tuh plơ̆ tơ kơ̆l sư dơ̆ng, mă-lei Đawit 'bă inh, ưh kơ băt sư pơlôch 'bar 'nu bơngai 'lơ̆ng tơpăt hloh kơ sư, hăm đao gưm noh bre Apner kon drŏ-nglo Nêr, yŏng linh bơngai Isơrael păng Amasa kon drŏ-nglo Jêther, yŏng linh bơngai Juđa.

³³Thoi noh pham bre noh gô tuh tơ kơpal kơ̆l Jôap păng tơ kơpal kơ̆l adrĕch adrung sư ling-lang; mă-lei Đawit păng adrĕch adrung sư, hnam dơnŏ, tang-dŏ pơtao sư Kră Yang gô ăn đei tơdrong hiôk-hian ling-lang.”

³⁴Na Bênaia, kon drŏ-nglo Jêhôiada, tŏk năm pơlôch Jôap păng đe 'bŭ sư tơ teh sư lăm char glă.

³⁵Pơtao Sôlômôn pôk Bênaia kon drŏ-nglo Jêhôiada pơm yŏng linh tơplih Jôap, pôk Sadok pơm 'bok soi tơplih Abiathar.

³⁶Đơ̆ng noh pơtao Sôlômôn wơh đe năm krao Simei păng khan kơ sư: “Ih athei pơm hnam ih lăm pơlei Jêrusalem oei tơ noh 'nĕ chă lĕch năm tơ nai.

³⁷Yua kơ năr ayơ ih lĕch đơ̆ng noh tŏk hlôi kơ thong đak Sêdrôn ih gô lôch: Pham ih gô tuh plơ̆ tơ kơpal kơ̆l ih.”

³⁸Simei tơl: “Nơ̆r ih pơkă 'noh 'lơ̆ng dêh, ih pơtao yŏng inh pơkă khan tơdrong kiơ, inh đĭch đam ih gô pơm kiơ̆ thoi noh.” Thoi noh Simei oei hloi tơ pơlei Jêrusalem đunh năr.

³⁹Lăp truh pêng sơnăm đei 'bar 'nu đĭch Simei kơdâu jăk tơ hnam Akis kon drŏ-nglo Maaka pơtao pơlei Gat. Đe năm roi tơbăt kơ Simei khan: “To, 'bar 'nu đĭch ih oei tơ pơlei Gat.”

⁴⁰Simei iung hao aseh năm tơ pơlei Gat, truh tơ hnam Akis chă đĭch đam sư. Na chă 'bôh bơih sư chông ba 'bar 'nu đĭch đam sư 'noh brŏk.

⁴¹Đe năm roi ăn kơ pơtao Sôlômôn, Simei lĕch đơ̆ng pơlei Jêrusalem sư năm tơ pơlei Gat păng sư brŏk bơih.

⁴²Pơtao Sôlômôn athei đe krao Simei păng khan: “Inh hăm đei athei ih pơkă hăm anăn Kră Yang păng inh pơkă păng khan kơ ih: ‘Ih athei băt tơdah năr ayơ ih lĕch đơ̆ng pơlei Jêrusalem na năm tơ anih nai, ih gô lôch.’ Ih kư̆m đei pơkăm hăm inh: ‘Tơdrong ih pơkă 'noh 'lơ̆ng dêh, inh gô chu ih.’

⁴³Thoi noh yua kơ kiơ ih ưh kơ wei răk nơ̆r ih pơkă hăm anăn Kră Yang păng nơ̆r inh đei pơkă bơih kơ ih?”

⁴⁴Pơtao Sôlômôn khan dơ̆ng kơ Simei: “Ih băt bơih păng oei 'blŏk mơ̆n lăm jơhngơ̆m dôm tơdrong ih pơm kơnê̆ kơ Đawit, 'bă inh. Dang ei Kră Yang gô tơwih plơ̆ dôm tơdrong kơnê̆ ih pơm noh tơ kơpal kơ̆l ih.

⁴⁵Mă-lei pơtao Sôlômôn gô đei tơdrong pŭn hiôk păng tang-dŏ pơtao Đawit oei kơjăp ling-lang 'bơ̆t anăp Kră Yang.”

⁴⁶Thoi noh 'bok pơtao athei Bênaia kon drŏ-nglo Jêhôiada năm pơlôch Simei; na Bênaia lĕch năm koh pơlôch hloi Simei. Dêh char pơtao oei kơjăp lăm tơpang ti Sôlômôn.