Read bahnar I Pot 20 Bible Online

I Pot 20 - bahnar bible

I Pot 20

¹Ben Hadat pơtao dêh char Siri, sư krao akŭm đĭ-đăng lu linh sư; đei pêng-jĭt 'bar 'nu pơtao kiơ̆ sư. Aseh păng gre aseh kư̆m lơ, lu sư tŏk năm wang Pơlei Samari păng blah.

²Sư wơh đam sư năm mơ̆t lăm pơlei tơ'bơ̆p Ahap pơtao đe Isơrael, na khan: “'Nâu nơ̆r Ben Hadat khan:

³‘Hu maih ih 'noh tơmam inh; đĭ-đăng lu kon akăn ih mă 'lơ̆ng hloh noh tơmam inh ngăl bơih.’ ”

⁴Pơtao Isơrael tơl: “Ơ yŏng pơtao inh, kiơ̆ thoi nơ̆r ih khan, inh păng dôm tơmam inh đei 'noh tơmam ih ngăl.”

⁵Lu bơngai mă pơtao wơh năm dơ̆ng păng khan: “Ben Hadat khan: ‘Inh wơh bơngai năm khan tơbăt kơ ih: Ih athei jao ăn kơ inh hu maih, lu akăn ih păng lu kon ih.

⁶Thoi noh, pơgê dơning lăm jơ 'nâu inh gô wơh đĭch đam inh năm truh tơ hnam ih, lu sư gô chă yuih lăng dôm tơmam kiơ mă lu sư kăl lăm hnam ih păng lăm hnam đĭch đam ih, lu sư iŏk chĕp ba pơđĭ.’ ”

⁷Pơtao đe Isơrael kơtơ̆ng thoi noh bơih na sư krao akŭm đĭ-đăng lu 'bok kră lăm dêh char păng khan: “Lu iĕm lăng deh thoi yơ bơngai 'nâu chă đon wă pơrăm lu bơ̆n, yua kơ sư đei wơh boih lu đĭch đam sư wă athei inh pơjao ăn kon akăn inh păng lu hu maih inh kơ sư, inh kư̆m ưh pă gơh sơngah bơih.”

⁸Lu đe kră păng đĭ-đăng kon pơlei pơla khan: “Pơtao, ih 'nĕ kơ mơ̆ng nơ̆r sư păng 'nĕ kơ chu sư.”

⁹Thoi noh na Ahap khan kơ lu bơngai mă pơtao 'Ben Hadat wơh: “Iĕm athei khan kơ yŏng inh: Dôm tơdrong ih apinh đơ̆ng inh mă adrol 'noh inh gô pơm; mă-lei wơ̆t 'nâu inh ưh kơ gơh pơm ôh?” Lu bơngai mă đơ̆ng Ben Hadat wơh 'noh brŏk roi dôm nơ̆r 'noh.

¹⁰Ben Hadat wơh bơngai nai dơ̆ng tơ'bơ̆p Ahap khan: “Apinh lu yang phak inh mă trăp tơdah 'mui teh tơ Samari tôm mah kơ rim tơpang ti lu linh lăm minh 'nu minh chup.”

¹¹Na Ahap tơl: “Brŏk khan kơ sư: ‘Bơngai hrŭk ao mam 'nĕ kơ pơang akâu kơdih thoi bơngai mă plôh lê̆ ao.’ ”

¹²Ben Hadat oei et tơdrô hơdai hăm lu pơtao lăm kơđông, lăp sư kơtơ̆ng dôm nơ̆r 'noh, na khan hloi kơ lu linh sư: “Iĕm athei hơmet năm blah.” Đơ̆ng noh lu linh năm hloi wă blah pơlei 'noh.

¹³Đei minh 'nu bơngai khan lê̆ adrol năm tơ'bơ̆p Ahap, pơtao đe Isơrael păng khan: “Kră Yang khan: ‘Ih hăm 'bôh ưh minh khŭl linh lơlap 'nâu? Năr 'nâu Inh gô pơjao lu sư lăm tơpang ti ih, wă kơ ih băt Inh bơih Kră Yang.’ ”

¹⁴Ahap jet dơ̆ng: “Bu gô pơm tơdrong 'nâu?” 'Bok khan lê̆ adrol tơl. “'Nâu Kră Yang khan: “Ih athei yua lu bơngai tơdăm bơ̆jang ala kơ lu 'bok pơgơ̆r tơring char gô pơm.’ ” Ahap apinh dơ̆ng. “Lei bu wă pơtơm năm tơblah?” 'Bok khan lê̆ adrol tơl: “Ih bơih.”

¹⁵Na Ahap krao akŭm đĭ-đăng lu bơngai tơdăm bơ̆jang ala kơ lu 'bok pơgơ̆r tơring, đei 'bar-hrĕng pêng-jĭt 'bar 'nu. Sư kư̆m krao akŭm đĭ-đăng lu bơngai Isơrael đei tơpơh-rơbâu 'nu dơ̆ng.

¹⁶Lu Sư lĕch năm 'bơ̆t tŏk-bŏk 'năr dơ̆ng kơplah Ben Hadat hơdai hăm pêng-jĭt 'bar 'nu pơtao buăl dơ̆ng sư et tơdrô suai lăm kơđông.

¹⁷Lu bơngai tơdăm bơ̆jang ala lu 'bok pơgơ̆r tơring char lĕch adrol: 'Ben Hadat wơh bơngai năm chop lăng lu sư; wih roi kơ Ben Hadat. “Đei bơngai lĕch đơ̆ng Pơlei Samari.”

¹⁸Sư khan: “Tơdah lu sư năm tơ âu apinh tơdrong hiôk-hian, lei iĕm athei rong arih; dah mă lu sư năm tơ âu wă tơblah iĕm kư̆m athei rôp arih mơ̆n.”

¹⁹Lu bơngai tơdăm bơ̆jang ala kơ lu 'bok pơgơ̆r tơring char lĕch hlôi kơ pơlei tih boih păng lu linh kiơ̆ đơ̆ng rŏng lu sư.

²⁰Lu sư pơlôch lu bơngai ayăt 'noh mơ̆ng kơ tơ'bơ̆p 'bơ̆t anăp. Đĭ-đăng lu linh Siri kơdâu tơklah tơklang na lu linh Isơrael druh 'moi. Ben Hadat klaih, kơdâu hao seh hơdai hăm minh 'bar 'nu lu linh hao seh.

²¹Pơtao đe Isơrael năm blah lu linh hao aseh, pơlôch lu bơngai Siri lơ dêh.

²²Kơplah noh 'bok khan lê̆ adrol năm dơ̆ng jê̆ pơtao đe Isơrael păng khan: “Ih athei năm pơjing ming lu linh ih mă pran kơtang đơ̆ng, ih athei lăng hơmet mă hơlen tơdrong kiơ wă pơm, yua kơ bơyan puih sơnăm anăp kơnh pơtao Siri gô năm blah ih dơ̆ng.

²³Lu đam Siri bơ̆jang kơ pơtao siri khan kơ pơtao sư: “Yang lu sư 'noh yang kông, thoi noh na lu sư pran hloh kơ bơ̆n. Mă-lei tơdah bơ̆n tơblah hăm lu sư tơ lăm thŭng dơnă, lei sĭt bơ̆n pran hloh kơ lu sư.

²⁴Apinh pơtao athei pơm thoi âu: Tơjur đĭ lu pơtao 'noh đơ̆ng anih lu sư pơgơ̆r linh, na pôk atŏk lu yŏng linh pơgơ̆r tơplih lu sư.

²⁵Păng ih athei chă tơmơ̆t linh mă tôm dôm linh ih mă hiong adrol 'noh, chă aseh păng gre aseh kư̆m tôm lei-lăi thoi so; đơ̆ng noh lu bơ̆n gô tơblah hăm lu sư tơ lăm thŭng dơnă. Sĭt lu bơ̆n gô pran hloh kơ lu sư.” Pơtao đe Siri mơ̆ng păng pơm kiơ̆ hloi thoi noh.

²⁶Lăm sơnăm đơ̆ng rŏng Ben Hadat krao akŭm lu linh Siri tŏk năm tơ Pơlei Aphek wă tơblah hăm lu bơngai Isơrael.

²⁷Bơngai Isơrael kư̆m krao akŭm đĭ-đăng, hơmet tơmam sa wă tơblah. Kon pơlei Isơrael pơm kơđông lu sư 'bơ̆t anăp tơklă kon pơlei Siri thoi 'bar khŭl bơbe tŏ-ĕt, gah lu linh bơngai Siri lơ dêh 'bĕnh-'bang kơ tơring char.

²⁸Đei minh 'nu bơngai Kră Yang 'Bok Kei-Dei yua năm jê̆ pơtao Isơrael păng khan: “Kră Yang khan: Yua kơ kon pơlei Siri khan kơ Kră Yang noh yang kông, ưh kơ trŏ kơ yang thŭng dơnă ôh. Thoi noh na inh gô pơjao lu linh lơlap 'nâu lăm tơpang ti ih păng iĕm gô băt Inh bơih Kră Yang.”

²⁹'Bar khŭl sư tơdơ̆ng tơklă băl lăm tơpơh năr. Năr mă tơpơh lu sư tơblah băl; lăm minh năr lu linh Isơrael pơlôch lu linh Siri yak jơ̆ng hloh minh-hrĕng rơbâu 'nu.

³⁰Dôm lu bơngai klaih đơ̆ng anih tơblah 'noh kơdâu ôn tơ lăm Pơlei Aphek, mă-lei dur pơlei pơchah kơtĭt lu sư lôch đei 'bar-jĭt tơpơh 'nu. Ben Hadat kư̆m kơdâu mơ̆t lăm pơlei, sư ôn tơ minh anih hlơp.

³¹Lu bơngai jang kơ pơtao khan kơ pơtao: “Lu nhôn kơtơ̆ng đe khan pơtao đe Isơrael đei tơdrong mơnat. Dang ei apinh ih ăn kơ nhôn tơ̆n 'bi tơ kơiĕng păng pơ̆n tơlei tơ kơ̆l đơ̆ng noh yơ̆r ti năm tơ'bơ̆p pơtao đe Isơrael. Rŏ lăng sư kư̆m ăn kơ ih arih mơ̆n.”

³²Thoi noh lu sư tơ̆n 'bi tơ kơiĕng păng pơ̆n tơlei tơ kơ̆l lu sư lĕch yơ̆r ti chu thuơ kơ pơtao Isơrael păng khan: “Ben Hadat đĭch đam ih khan: ‘Apinh ih ăn kơ inh arih.’ ” Ahap jet: “Sư oei arih hă? Sư 'noh 'nhŏng oh inh.”

³³Lu bơngai 'noh mơ̆ng nơ̆r pơtao Ahap pơma 'noh 'lơ̆ng tơpă na lu sư lui hloi, khan: “Ben Hadat 'noh 'nhŏng oh ih tơpă.” Ahap khan dơ̆ng: “Lu iĕm năm iŏk sư tơ âu.” Na 'Ben Hadat năm tơ'bơ̆p Ahap. Pơtao Ahap pơtơm 'Ben Hadat hao gre aseh sư.

³⁴Ben Hadat khan kơ Ahap: “Inh gô pơdrâu ăn kơ ih dôm lu pơlei mă 'bă inh tơgar iŏk đơ̆ng 'bă ih. Ih gô pơm hnam mơdro sa tih tơ lăm Pơlei Đamas, kư̆m thoi 'bă inh đei pơm bơih tơ lăm Pơlei Samari.” Ahap tơl: “Gah inh, gô drơ̆ng ăn kơ ih brŏk kiơ̆ thoi nơ̆r ih pơkă 'nâu.” Thoi noh Ahap pơkă pơkăm pơgơ̆p hăm 'Ben Hadat, đơ̆ng noh ăn kơ Ben Hadat brŏk.

³⁵Chu nơ̆r Kră Yang, đei minh 'nu lăm lu bơngai khan lê̆ adrol khan kơ buăl sư: “Apinh ih teh inh,” Mă-lei buăl sư ưh kơ teh sư.

³⁶Na sư khan: “Yua kơ ih ưh kơ chu nơ̆r Kră Yang, na lăp ih weh đơ̆ng inh kơnh dăm-brang gô châu pơlôch ih.” Lăp sư weh, đei minh pôm Dăm-brang châu sư lôch hloi.

³⁷Đơ̆ng noh bơngai khan lê̆ adrol tơ'bơ̆p bơngai nai dơ̆ng, na sư khan: “Apinh ih teh inh.” Bơngai 'noh teh hloi bơngai khan Lê̆ adrol truh đei rơka.

³⁸Đơ̆ng noh bơngai khan lê̆ adrol 'noh năm ngôi 'bơ̆t trong gô pơtao. Sư gom muh măt sư hăm che pơm bơngai nai.

³⁹Lăp pơtao năm brih trong 'noh sư ôr apinh pơtao: “Đĭch đam ih oei lăm anih tơblah; na đei minh 'nu năm ba kơ inh minh 'nu bơngai bơnă păng khan kơ inh: ‘Ih athei wei bơngai 'nâu; tơdah sư kơdâu klĕnh tơ nai, lei tơdrong arih ih gô tơplih kơ sư 'noh, dah mă ih duh minh talâng hu.’

⁴⁰Mă-lei kơplah đĭch đam ih oei hăt kơ tơdrong jang 'nâu tơdrong jang to, na bơngai bơnă 'noh kơdâu klĕnh.” Pơtao Isơrael khan kơ sư: “Tơdrong 'noh, kơdih ih gô pŭ iŏk tơdrong sek tơlang.”

⁴¹Đơ̆ng noh sư pơih lê̆ che đơ̆ng gom muh măt sư 'noh na pơtao Isơrael kơnăl sư 'noh bơngai khan lê̆ adrol.

⁴²Bơngai khan lê̆ adrol 'noh khan kơ pơtao Isơrael: “Kiơ̆ thoi nơ̆r Kră Yang khan: ‘Yua kơ ih achăng bơngai mă Inh jao ăn kơ ih wă kơ ih pơlôch sư. Na tơdrong arih ih gô tơplih tơdrong arih sư, păng tơdrong arih lu kon pơlei ih gô tơplih tơdrong arih lu kon pơlei pơla sư.’ ”

⁴³Pơtao Isơrael brŏk tơ hnam sư kơdih, lăm char Samari, jơhngơ̆m sư blĕk ơh hơ'ngon ưh pă băt dang yơ.