Read bahnar I Pot 22 Bible Online

I Pot 22 - bahnar bible

I Pot 22

¹Lăm pêng sơnăm Aram păng Isơrael ưh kơ đei tơdrong tơblah.

²Mă-lei lăm sơnăm mă pêng, Jêhôsaphat pơtao đe Juđa, jur năm ngôi hơpong tơ pơtao đe Isơrael.

³Pơtao đe Isơrael khan kơ lu bơngai bơ̆jang kơ sư. “Lu iĕm hăm băt ưh pơlei Ramôt Gileat 'noh teh lu bơ̆n, mă-lei lu bơ̆n kư̆m oei hreh ưh kơ đei pơm kiơ, wă pơdrâu iŏk sư đơ̆ng tơpang ti pơtao Aram?”

⁴Pơtao khan kơ Jêhôsaphat: “Ih hăm wă blah iŏk Pơlei Ramôt Gileat hơdai hăm inh ưh?” Jêhôsaphat tơl pơtao đe Isơrael: Inh kư̆m thoi ih, kon pơlei pơla inh kư̆m thoi kon pơlei pơla ih, aseh inh kư̆m thoi aseh ih mơ̆n.”

⁵Jêhôsaphat khan kơ pơtao đe Isơrael dơ̆ng: “Mă adrol hloh bơ̆n athei krao apinh jet Kră Yang 'mơ̆i.”

⁶Thoi noh na pơtao đe Isơrael krao akŭm đei puăn-hrĕng 'nu lu 'bok khan lê̆ adrol, na jet lu sư: “Inh hăm gơh năm blah pơlei Ramôt Gileat ưh dah lê̆ đĕch?” Lu sư khan: “Gơh mơ̆n, năm blah bĕ, yua kơ Kră Yang gô jao pơlei 'noh lăm tơpang ti ih.”

⁷Mă-lei Jêhôsaphat jet: “Tơ âu hăm pă đei 'bok khan lê̆ adrol nai Kră Yang wă kơ bơ̆n apinh jet sư?”

⁸Pơtao Isơrael tơl Jêhôsaphat khan: “Đei oei pă minh 'nu anăn sư Mikai kon drŏ-nglo Imla; đơ̆ng sư 'noh bơ̆n gơh krao apinh jet Kră Yang; mă-lei inh areh kơ sư dêh, yua kơ sư ưh kơ khan lê̆ adrol tơdrong 'lơ̆ng gah inh, tă tơdrong kơnê̆ ngăl.” Jêhôsaphat tơl: “Pơtao ih 'nĕ kơ pơma thoi noh.”

⁹Pơtao đe Isơrael krao minh 'nu bơngai yŏng păng khan: “Krao Mikai kon drŏ-nglo Imla năm tơ âu mă tĕnh.”

¹⁰Kơplah noh pơtao đe Isơrael păng Jêhôsaphat pơtao đe Juđa hrŭk ao pơtao hơ-oei kơpal tang-dŏ pơtao tơ anih đe preh 'ba 'bơ̆t jê̆ 'măng jang Pơlei Samari. Đĭ-đăng 'bok khan lê̆ adrol oei pơma khan lê̆ adrol 'bơ̆t anăp bre sư.

¹¹Sêđekia, kon drŏ-nglo Kênaana hơjơ̆m pơm hơke păng bơsei khan: “'Nâu Kră Yang khan: ‘Hăm hơke 'nâu ih gô tơ̆m pơlôch pơrăm pơđĭ lu bơngai Aram!’ ”

¹²Đĭ-đăng lu bơngai khan lê̆ adrol pơma lei-lăi: “Tŏk blah bĕ pơlei Ramôt Gileat gô jei ih tơpă; “Kră Yang gô pơjao pơlei 'nâu lăm tơpang ti ih.”

¹³Bơngai mă đe wơh năm krao Mikai 'noh, sư khan: “Lu 'bok khan lê̆ adrol, lu sư pôm jơhngơ̆m hăm nơ̆r pơtao hơpơi rŏ kơ nơ̆r ih kư̆m khan lê̆ adrol trŏ thoi lu sư. Pơma bĕ mă 'lơ̆ng.”

¹⁴Mă-lei Mikai khan: “Sĭt tơpă Kră Yang mă arih, inh gơh pơma tơdrong kiơ mă Sư athei inh pơma.”

¹⁵Lăp Mikai tơ'bơ̆p pơtao, pơtao jet sư: “Ơ Mikai, bơ̆n hăm gơh năm blah Pơlei Ramôt Gileat ưh, dah mă lê̆ kơ năm blah đĕch?” Mikai tơl: “Năm blah bĕ, gô jei bơ̆n; Kră Yang gô pơjao pơlei 'noh lăm tơpang ti ih.”

¹⁶Mă-lei pơtao khan: “Dôm wơ̆t bơih inh athei ih pơma mă tơpăt 'bơ̆t anăp inh pơkă hăm anăn Kră Yang.”

¹⁷Mikai khan: “Inh 'bôh đĭ-đăng bơngai Isơrael tơklah tơklang jơ̆p kơ kông kŏ thoi triu ưh kơ đei bơngai wei; păng Kră Yang khan: ‘Lu sư ưh kơ đei tơ'ngla, rim 'nu kơ lu sư athei brŏk tơ hnam kơdih hăm tơdrong hiôk-hian.’ ”

¹⁸Pơtao đe Isơrael khan kơ Jêhôsaphat: “Inh đei roi kơ ih bơih sư 'nâu ưh kơ đei khan lê̆ adrol 'lơ̆ng kiơ gah inh, sư ling-lang khan lê̆ adrol kơnê̆ ngăl”

¹⁹Mikai tơl: “Thoi noh, mơ̆ng bĕ nơ̆r Kră Yang khan: Inh 'bôh Kră Yang hơ-oei kơpal tang-dŏ pơtao păng đĭ-đăng linh jang 'lơ̆ng dơ̆ng awih awăn gah 'ma gah 'ngiĕo kơ Sư.

²⁰Kră Yang jet: ‘Bu gô năm pơhlŭ Ahap, wă kơ sư tŏk tơ Pơlei Ramôt Gileat, na pơ̆k lôch tơ noh?’ Đei mơ'nah tơl khan thoi âu, đei mơ'nah khan thoi noh.

²¹Đei minh 'nu yang truh dơ̆ng 'bơ̆t anăp Kră Yang khan: ‘Lê̆ inh năm pơhlŭ sư.’

²²Kră Yang jet: ‘Ih pơhlŭ sư thoi yơ?’ Yang 'noh tơl: ‘Inh gô năm pơm yang pơma hơlĕnh lăm 'bơ̆r lu bơngai khan lê̆ adrol mă jang kơ sư.’ Kră Yang khan: “Trŏ bơih, ih gơh năm, pơhlŭ sư lei ih năm bĕ păng pơhlŭ sư thoi nơ̆r ih pơma 'noh.’

²³Thoi noh na Kră Yang đei ăn minh 'nu yang pơma hơlĕnh lăm 'bơ̆r lu bơngai khan lê̆ adrol mă jang kơ ih. Kră Yang wă pơm kơnê̆ truh tơ ih.”

²⁴Kơplah noh Sêđekia, kon drŏ-nglo Kênaana, năm jê̆ Mikai, tap tơ'bŏk sư, na khan: “Yang bơhngol Kră Yang lĕch đơ̆ng inh trong ayơ, mă năm khan kơ ih?”

²⁵Mikai tơl: “Ih gô băt tơdrong noh, lăm năr ih kơdâu ôn tơ anih hrĕp kơnh.”

²⁶Pơtao đe Isơrael athei. “Rôp Mikai pơjao sư tơ Ammôn, kră pơgơ̆r pơlei păng jao kơ Jôas kon pơtao,

²⁷khan: “Pơtao khan thoi âu: Rôp chĭt bơngai 'nâu lăm hnam bơnă, iŏk 'bĕng păng đak tŏ sĕt, rong pơmat sư dĭng truh năr inh brŏk hiôk-hian.”

²⁸Mikai tơl: “Tơdah ih brŏk hiôk-hian lei Kră Yang ưh kơ yua nơ̆r inh pơma ôh.” Sư khan dơ̆ng: “Ơ rim 'nu kon pơlei pơla, iĕm athei 'blŏk nơ̆r inh pơma.”

²⁹Thoi noh pơtao đe Isơrael păng Jêhôsaphat pơtao đe Juđa tŏk tơ pơlei Ramôt Gileat.

³⁰Pơtao Isơrael khan kơ Jêhôsaphat: “Inh năm tơ anih tơblah hrŭk hơbĕn ao hmă đĕch, mă-lei, ih kư̆ kơ hrŭk hơbĕn ao pơtao.” Thoi noh pơtao đe Isơrael hrŭk hơbĕn ao hmă pơm wă kơ đe ưh kơ băt na năm tơblah.

³¹Kơplah noh pơtao đe Aram đei krao păng pơkă ăn kơ pêng-jĭt 'bar 'nu yŏng linh đei lu gre aseh: “Iĕm 'nĕ kơ blah bu hŏ, lu hơ'lơ̆p dah mă lu bơngai 'lŏ, iĕm athei blah rĕng kơ minh 'nu pơtao đe Isơrael đĕch.”

³²Lăp lu yŏng linh gre aseh 'bôh Jêhôsaphat, lu sư khan: “To pơtao Isơrael tơ âu boih.” Na lu sư năm blah hloi pơtao mă-lei Jêhôsaphat ôr,

³³lu yŏng linh wei gre aseh băt noh ưh kơ trŏ kơ pơtao đe Isơrael, na lu sư kơdŭn wih tơ rŏng ưh pă druh pơtao dơ̆ng.

³⁴Mă-lei đei minh 'nu linh lăm lu sư gŭt hră dan 'brơ̆m, na hră sư phanh tă tơ 'bơm hloi pơtao đe Isơrael, 'bơm 'bơ̆t pơtrơp ao mam klĕch tơ kơtơh sư hloi. Pơtao khan kơ bơngai mă chĕp gre aseh sư: “Dui gre aseh wih tơ rŏng ba inh weh đơ̆ng anih tơblah 'nâu, yua kơ inh 'bơm 'brơ̆m bơih.”

³⁵Lăm năr 'noh đei tơdrong tơblah rai tih; na đei bơngai bơring pơdơ̆ng pơtao lăm gre aseh sư, blah lu kon pơlei Aram. Truh kơsơ̆ sư lôch, pham lĕch 'bĕnh đơ̆ng rơka sư 'bĕnh kơ hơnă gre aseh.

³⁶Lăp 'năr wă mơ̆t bơih đei nơ̆r pơma rơ̆n đơ̆ng lăm lu linh khan: “Rim 'nu athei brŏk tơ pơlei sư kơdih păng rim 'nu athei weh tơ char sư kơdih!”

³⁷Pơtao lôch, na đe chơ ba atâu sư tơ plei Samari 'bŭ sư lăm Pơlei Samari.

³⁸Đe ôp gre aseh pơtao tơ dơnâu đak Samari, anih mă lu drŏ-kăn đi juăt kơ hum păng kŏ liah pham sư tơ noh, trŏ thoi nơ̆r Kră Yang đei khan bơih.

³⁹Dôm tơdrong jang Ahap, đĭ-đăng tơdrong jang pơtao đei pơm, hnam pơtao sư pơm păng bơla rôih păng đĭ-đăng lu pơlei sư man pơjing, đe đei chih lê̆ bơih lăm hla bơar hơ'mon lu pơtao đe Isơrael.

⁴⁰Thoi noh Ahap lôch năm oei hơdai lu 'bok kơdră sư; Ahasia kon drŏ-nglo sư pơgơ̆r pơtrơp sư.

⁴¹Jêhôsaphat, kon drŏ-nglo Asa pơm pơtao đe Juđa lăm sơnăm mă puăn lăm chăl Ahap pơm pơtao đe Isơrael.

⁴²Jêhôsaphat pơm pơtao đe Juđa sư 'nao pêng-jĭt pơđăm sơnăm đĕch; sư pơgơ̆r 'bar-jĭt pơđăm sơnăm tơ Pơlei Jêrusalem. Mĕ pơtao anăn Asuba, kon drŏ-kăn 'bok Sihli.

⁴³Sư năm kiơ̆ trong gơlong Asa, 'bă sư ưh kơ weh trong nai, sư pơm 'lơ̆ng tơpăt 'bơ̆t anăp Kră Yang.

⁴⁴Mă-lei pơtao ưh kơ đei yuih lê̆ lu anih kơkuh tơ anih kơjung, na lu kon pơlei oei năm pơm yang păng oei soh 'long pơgang 'bâu phu tơ lu hnam yang tơ anih kơjung noh.

⁴⁵Jêhôsaphat oei pơgơ̆p hiôk hơiă dih băl hăm pơtao đe Isơrael.

⁴⁶Dôm tơdrong jang nai Jêhôsaphat pơm, tơdrong pran sư kĕ jei, tơdrong sư tơblah, đe đei chih 'măn lê̆ bơih lăm sơ̆p hla bơar hơ'mon gah lu pơtao Juđa?

⁴⁷Na sư pơlôch pơđĭ lu bơngai drŏ-nglo đi pơm kư̆ kă đơ̆ng lăm char sư, mă oei đei đơ̆ng chăl Asa, 'bă sư pơgơ̆r.

⁴⁸Kơplah noh lăm char Eđôm ưh kơ đei pơtao, đei minh 'nu yŏng chă jang tang tơplih pơgơ̆r lu sư.

⁴⁹Jêhôsaphat pơm duk đơ̆ng char Taris wă năm tơ dêh char Ôphir, sư chă maih mă-lei lu sư ưh kơ yĕng kơ năm, yua kơ duk sư pơchah tơ pơlei Êsiôn Gêber.

⁵⁰Kơplah noh Ahasia kon drŏ-nglo Ahap khan kơ Jêhôsaphat: “Apinh ih song đĭch đam inh tŏk duk năm hơdai hăm đĭch đam ih,” mă-lei Jêhôsaphat ưh kơ ăn.

⁵¹Jêhôsaphat lôch năm oei hơdai hăm lu 'bok kơdră sư, đe 'bŭ sư hơdai hăm lu 'bok kơdră sư tơ pơlei Đawit 'bok sư, Jêhôram kon drŏ-nglo sư pơgơ̆r pơtrơp đơ̆ng sư.

⁵²Lăm sơnăm mă mơjĭt-tơpơh lăm chăl Jêhôsaphat pơm pơtao đe Juđa. Ahasia, kon drŏ-nglo Ahap pơm pơtao Isơrael tơ dêh Samari. Sư pơgơ̆r lăp 'bar sơnăm đĕch.

⁵³Sư pơm lơ tơdrong yoch kơnê̆ 'bơ̆t anăp Kră Yang, kiơ̆ trong 'bă sư păng mĕ sư păng kiơ̆ trong Jêrôbôam kon drŏ-nglo Nêbat, bơngai mă pơhlŭ lu bơngai Isơrael pơm yoch.

⁵⁴Sư kơkuh păng bơ̆jang kơ yang Baal, pơm lơ tơdrong kơnê̆ tơblĕk Kră Yang, 'Bok Kei-Dei Isơrael hil, pơm kiơ̆ thoi trong 'bă sư pơm bơih. 05-Mar-2008@ 23:17, Backup Description=19-Feb-2008@04:51, UYNH - 11-Nov-2014@18:29, Backup Description=