Read bahnar I Pot 3 Bible Online

I Pot 3 - bahnar bible

I Pot 3

¹Sôlômôn pơgơ̆p hơdai hăm Pharaôn dêh Êyiptơ, iŏk kon adruh Pharaôn pơm akăn, chông ba sư brŏk oei tơ pơlei Đawit, oei tơ noh dĭng truh sư keh pơm hnam pơtao sư, pơm hnam akŭm kơkuh kơ Kră Yang păng man dur tăp dăr pơlei Jêrusalem.

²Lu kon pơlei oei pơyơ̆r tơmam soi tơ anih groi kơjung 'mơ̆i, yua kơ kơplah noh pơtao tam mă pơm hnam akŭm kơkuh kơ anăn Kră Yang.

³Sôlômôn 'mêm yom kơ Kră Yang păng yak kiơ̆ dôm lu tơdrong juăt Đawit, 'bă sư, mă-lei sư pơyơ̆r tơmam soi păng soh 'long 'bâu phu tơ anih groi kơjung.

⁴Pơtao Sôlômôn năm truh tơ pơlei Gibeôn wă pơyơ̆r tơmam soi, yua kơ tơ anih soi kơpal groi kơjung mă kăl dêh. Tơ noh Sôlômôn pơyơ̆r minh-rơbâu tŏ tơmam soi 'buh tơ kơpal chơnang soi.

⁵Tơ pơlei Gibeôn Kră Yang tơ'bôh akâu sư kơ Sôlômôn lăm tơdrong apo kiơ̆ kơmăng Kră Yang 'Bok Kei-Dei khan: “Apinh bĕ tơdrong kiơ ih wă kơ Inh ăn kơ ih.”

⁶Sôlômôn tơl: “Ih đei tơ'bôh bơih tơdrong 'mêm mơnat tih kơ đĭch đam ih Đawit, 'bă inh, yua kơ sư đei đon lui păng jơhngơ̆m đon tơpăt 'bơ̆t anăp Ih: Ih oei tơ'bôh tơdrong 'mêm mơnat tih, na ăn kơ sư đei minh 'nu kon drŏ-nglo hơ-oei kơpal tang-dŏ pơtao sư truh năr 'nâu.

⁷Dang ei ơ Kră Yang 'Bok Kei-Dei inh, Ih ăn bơih kơ inh đĭch đam Ih pơm pơtao pơtrơp đơ̆ng Đawit, 'bă inh; mă-lei inh bơngai oei 'lơ̆p, ưh kơ băt wă pơgơ̆r teh đak thoi yơ.

⁸Inh đĭch đam Ih oei tŏk-bŏk kon pơlei pơla mă Ih rơih bơih, minh khŭl bơngai lơ kơdrâ̆m ưh kơ kĕ jô̆.

⁹Thoi noh apinh Ih ăn kơ inh mă đĭch đam Ih âu tơdrong gơh hơgei, wă kơ gơh sek tơlang tơdrong kon pơlei pơla ih, wă kơ inh băt kơnăl tơdrong 'lơ̆ng, tơdrong kơnê̆; yua kơ bu gơh kĕ sek tơlang kơ lu kon pơlei pơla lơ dêh 'nâu?”

¹⁰Kră Yang lăp đon dêh kơ Sôlômôn apinh noh.

¹¹Kră Yang 'Bok Kei-Dei khan kơ sư: “Yua kơ ih apinh tơdrong 'nâu, ưh kơ apinh kơ ih tơdrong arih sot, tơdrong mơdrŏng tih kư̆m ưh kơ apinh tơdrong kĕ jei blah pơrăm lu bơngai ayăt kơ ih, mă-lei ih apinh tơdrong hlôh wao gơh hơgei wă kơ gơh sek tơlang trŏ.

¹²'Nâu, Inh ăn tơdrong ih apinh, ăn kơ ih hlôh wao gơh hơgei, dĭng mah lu bơngai adrol kơ ih ưh kơ đei bu hơtŏ kơ ih păng lu bơngai đơ̆ng rŏng kơ ih kư̆m ưh kơ đei bu dang ih.

¹³Hloh kơ noh dơ̆ng Inh gô ăn hloi kơ ih dôm tơdrong mă ih ưh kơ đei apinh, tơdrong mơdrŏng, tơdrong đe pơyom ư-ang, lăm đĭ chăl arih ih ưh kơ đei pơtao bu kĕ tam ih.

¹⁴Tơdah ih yak năm kiơ̆ trong Inh păng wei răk tơdrong juăt păng nơ̆r Inh tơtă thoi Đawit, 'bă ih, lei Inh gô pơthim ăn kơ ih arih sot soi.”

¹⁵Na Sôlômôn 'blơ̆ hơdơ̆r đơ̆ng tep mơn băt noh tơdrong apo. Sư iung brŏk tơ pơlei Jêrusalem, dơ̆ng 'bơ̆t anăp Hom Tơdrong Pơgơ̆p Kră Yang, pơyơ̆r tơmam soi 'buh păng pơyơ̆r tơmam soi bơnê păng pơih et sa tih hơdai hăm lu đĭch đam păng lu yŏng bơ̆jang kơ sư.

¹⁶Kơplah noh đei 'bar 'nu drŏ-kăn đi năm dơ̆ng 'bơ̆t anăp pơtao.

¹⁷Minh 'nu drŏ-kăn khan: Ơ 'bok pơtao! Nhi duch 'nâu oei hơdai minh pôm hnam, inh tơpŭ kơ minh 'nu kon drŏ-nglo, sư kư̆m oei lăm noh mơ̆n.

¹⁸Đơ̆ng rŏng kơ inh tơpŭ 'noh pêng năr sư kư̆m tơpŭ mơ̆n, 'bar 'nu nhi đĕch oei lăm hnam, ưh kơ đei bu nai ôh oei hơdai hăm nhi lăm hnam.

¹⁹Kơplah oei tep kơmăng, sư kơtĭt 'bơm nge drŏ-nglo sư lôch hloi,

²⁰Truh tơ tŏk-bŏk măng kơplah inh mă đĭch đam ih oei tep hlơ̆k, sư iung hiŏng iŏk kon nge drŏ-nglo inh oei brom 'bơ̆t kơtơh inh, đơ̆ng noh sư năm ming lê̆ nge drŏ-nglo sư mă lôch bơih noh 'bơ̆t kơtơh inh.

²¹Truh kiơ̆ pơgê hrôih, inh hơđơ̆r wă tơmŏm kon inh ră, mă-lei inh 'bôh sư lôch bơih, lăp truh 'năr lĕch hơdah inh lăng hơlen sư 'noh ưh kơ trŏ kơ kon inh pơjing ôh.

²²Drŏ-kăn minh 'noh tơl khan: “Ưh kơ trŏ kơ kon inh ôh, kon nge drŏ-nglo mă oei arih 'noh kon inh, nge drŏ-nglo mă lôch noh kon ih.” Mă-lei drŏ-kăn mă minh khan dơ̆ng: “Ưh kơ trŏ ôh nge drŏ-nglo mă lôch boih noh kon ih, nge drŏ-nglo oei arih 'nâu kon inh,” Bre sư pơjah băl tơdrong noh 'bơ̆t anăp pơtao.

²³'Bok pơtao khan kơ bre sư: “Bơngai 'nâu khan: ‘Bơngai oei arih 'nâu kon inh, nge mă lôch bơih noh kon ih,’ bơngai noh khan: Ưh ôh, nge mă lôch bơih noh kon ih, bơngai mă oei arih noh kon inh!”

²⁴Pơtao khan dơ̆ng; “Lei iŏk ăn kơ inh đao tơ âu,” na đe iŏk ăn kơ sư đao.

²⁵Pơtao khan: “Blah asong kon nge mă oei arih 'nâu, minh pah ăn kơ bơngai 'nâu, minh pah ăn kơ bơngai 'noh,”

²⁶Mă-lei mĕ kon nge mă oei arih 'noh ưh kơeng, yua kơ sư 'mêm mơnat kơ kon sư dêh na sư khan kơ pơtao: “Ơ yŏng inh! Apinh ih ăn kơ bơngai 'noh kon nge mă oei arih 'nâu, ih 'nĕ kơ pơlôch sư.” Mă-lei mĕ bơngai nge lôch bơih 'noh khan: “Sư kư̆m ưh kơ trŏ kon inh, păng kư̆m ưh kơ trŏ kon ih blah song băl đĕch.”

²⁷Pơtao khan dơ̆ng: “Iŏk ăn kơ bơngai 'nâu kon nge mă oei arih 'noh, iĕm 'nĕ kơ pơlôch sư, bơngai 'nâu bơih mĕ sư.”

²⁸Đĭ-đăng bơngai Isơrael kơtơ̆ng tơdrong pơtao sek tơlang noh lu sư hli yom ư-ang kơ pơtao, yua kơ lu sư 'bôh pơtao đei tơdrong gơh hơgei đơ̆ng Kră Yang 'Bok Kei-Dei, wă kơ sek tơlang tơpăt.