Read bahnar I Pot 4 Bible Online

I Pot 4 - bahnar bible

I Pot 4

¹Pơtao Sôlômôn pơgơ̆r đĭ-đăng dêh Isơrael.

²'Nâu lu bơngai pơm tih jang hăm pơtao: Asaria kon drŏ-nglo Sadôk pơm 'bok soi.

³Êlihôrep păng Ahija kon drŏ-nglo Sisa pơm yŏng lu bơngai chih hla bơar; Jêhôsaphat kon drŏ-nglo Ahilut, bơngai chih răk dôm tơdrong truh.

⁴Bênaia kon drŏ-nglo Jêhôiada pơm yŏng linh: Sađôk păng Abiathar pơm 'bok soi,

⁵Asaria kon drŏ-nglo Nathan pơm 'bok pơgơ̆r lu yŏng linh Sahut kon drŏ-nglo Nathan pơm 'bok kơiĕng păng buăl pơtao.

⁶Ahisar pơm yŏng wei-lăng hnam 'bok pơtao păng Ađôniram kon drŏ-nglo Apđa pơm yŏng pơgơ̆r lu bơngai bơnă jang gah tơmam.

⁷Sôlômôn đei mơjĭt-'bar 'nu bơngai pơm yŏng wei-lăng đĭ-đăng lu bơngai Isơrael, lu jang gah tơmam sa kơ pơtao minh khei minh 'nu lăm minh Sơnăm.

⁸'Nâu anăn lu sư: Ben Hur wei-lăng tơring groi Êphraim.

⁹Ben Đêker wei-lăng pơlei Makas, pơlei Saalbim, pơlei Bêt Sêmes păng pơlei Êlôn Bet Hanan.

¹⁰Bên Hêset wei-lăng tơring Arubôt; sư wei-lăng hloi pơlei Sôkô păng đĭ dêh Hêpher.

¹¹Bên Abinađap wei-lăng đĭ-đăng lăm dêh char Naphot Dor; akăn sư Taphat, kon drŏ-kăn Sôlômôn.

¹²Baana kon drŏ-nglo Ahilut wei-lăng lăm pơlei Taanach, pơlei Mêgiđô păng đĭ kơ pơlei Bêtsan jê̆ pơlei Sarêthan gah ala kơ pơlei Jêsreel păng iŏk đơ̆ng pơlei Bêt Sêan truh kơ pơlei Abel Mêhôla, truh tơ pah to pơlei Jôkmêam.

¹³Ben Gêber wei-lăng pơlei Ramôt Gileat, sư wei-lăng đĭ pơlei Jair kon drŏ-nglo Manase lăm char Gileat, sư kư̆m wei-lăng hloi pơlei Argôp lăm dêh char Basan, tơdrâu-jĭt tŏ pơlei tih đei dur man tăp dăr, 'măng dur chơkăl sư pơm păng kong.

¹⁴Ahinađap kon drŏ-nglo Iđô wei-lăng tơring Mahanaim.

¹⁵Ahimaas wei-lăng tơring Naptali, oei kơ Basemat kon adruh pơtao Sôlômôn.

¹⁶Baana kon drŏ-nglo Husai wei-lăng tơring Aser păng Bêalôt;

¹⁷Jêhôsaphat kon drŏ-nglo Parua wei-lăng tơring Isakar.

¹⁸Simei, kon drŏ-nglo Êla wei-lăng tơring char Bênjamin.

¹⁹Gêber kon drŏ-nglo Uri wei-lăng dêh char Gileat, 'nâu sơ̆ đêl dêh char Sihôn, khŭl bơngai Amôrit păng Ôk pơtao dêh char Basan. Minh 'nu sư đĕch pơgơ̆r đĭ lăm dêh char 'nâu.

²⁰Kon pơlei bơngai Juđa păng kon pơlei bơngai Isơrael lơlap lơlang thoi chuơh đak dơsĭ, lu sư sŏng sa păng chơt hiôk tơpă.

²¹Pơtao Sôlômôn pơgơ̆r kon pơlei pơla lăm dêh char sư, iŏk đơ̆ng đak Krong Ơphrat truh tơ dêh char Philistin păng truh tơ hơdral Êyiptơ. Rim kơ teh đak chu bơ̆jang păng ra ăn kơ pơtao Sôlômôn truh đĭ chăl arih sư.

²²Tơmam sŏng sa lăm hnam pơtao Sôlômôn kăl yua lăm rim năr; pêng-jĭt kĭ tơpŭng phe tơ'bâu 'lơ̆ng păng tơdrâu-jĭt kĭ tơpŭng phe tơ'bâu hmă,

²³mơjĭt tŏ rơmo bek, mơjĭt tŏ rơmo đơ̆ng anih tơmăn 'nhĕt, minh-hrĕng tŏ triu păng ưh kơ jô̆ dôm sem bri, thoi jĭl juei, kơtŏng, iĕr bri, bip bri.

²⁴Sôlômôn pơgơ̆r jơ̆p kơ dêh char gah bơmơ̆t kơ đak Krong Ơphrat, sư pơgơ̆r hloi lu pơtao dêh char noh, đơ̆ng pơlei Tipsa truh tơ pơlei Gasa păng sư oei hiôk hơiă hăm kon pơlei pơla jum dăr kơ sư.a

²⁵Lăm chăl pơtao Sôlômôn pơgơ̆r, bơngai Juđa păng bơngai Isơrael oei hiôk-hian, đơ̆ng pơlei Đan truh tơ pơlei Bêrsêba, rim 'nu kơ lu sư arih jang sa chơt hiôk ala tơnơm hơmu păng tơm hơra sư.

²⁶Sôlômôn đei puăn-jĭt rơbâu tŏ hơdrong aseh dui gre păng đei mơjĭt-'bar rơbâu lu linh chĕp gre aseh.

²⁷Lu yŏng pơgơ̆r tơring lu sư kiơ̆ kơ khei asong băl chă hơmet lê̆ tôm mah lăm rim khei tơmam sŏng sa ăn kơ pơtao Sôlômôn păng rim 'nu bơngai mă sŏng sa hơdai hăm pơtao, ưh kơ đei tơmam kiơ kơ'bah ôh.

²⁸Lu sư chă hơmet 'ba tơ'bâu păng hơnong 'ba ăn kơ aseh hor gre păng aseh bơngai hao noh sa, kiơ̆ hloi đêl hơgăt bơih

²⁹'Bok Kei-Dei ăn kơ Sôlômôn hlôh băt tih dêh hăm đon hlôh wao dêh pă kĕ jô̆ nhen thoi chuơh cheng đak dơsĭ.

³⁰Sôlômôn gơh hơgei hloh kơ tơdrong hơgei lu bơngai dêh char gah hơlĕch păng hloh kơ tơdrong gơh hơgei lu bơngai Êyiptơ.

³¹Sư hơgei dêh hloh kơ đĭ-đăng lu bơngai hơgei, kư̆m hơgei hloh kơ Êthan, bơngai Esra, hloh kơ Hêman, hloh kơ Kalkôl păng hloh kơ Đarđa lu kon drŏ-nglo Mahôl. Păng tơdrong ư-ang kơ sư kơtơ̆ng tơ jơ̆p-jang kơ dêh char tăp dăr.

³²Sư pơma pêng-rơbâu nơ̆r pơđơ̆k păng pơm minh-rơbâu pơđăm tơdrong hơri.

³³Sư pơma roi tôm lu tơnơm 'long đơ̆ng 'long hơngo tơ Liban truh tơ lu hla 'nhĕt bơmur chăt 'bơ̆t tơnăr, sư kư̆m đei pơma 'bơm trŏ gah sem brem lu sem păr 'bih kơep lep-ler păng lu ka lăm đak.

³⁴Đơ̆ng rim kơ adrĕch adrung kon bơngai năm mơ̆ng tơdrong gơh hơgei pơtao Sôlômôn păng đĭ-đăng lu pơtao lăm teh đak kư̆m đei kơtơ̆ng boih tơdrong gơh hơgei sư.