Read bahnar I Pot 5 Bible Online

I Pot 5 - bahnar bible

I Pot 5

¹Kơplah Hiram pơtao Tirơ sư kơtơ̆ng Sôlômôn đe tuh đak rơmă 'bâu phu pôk pơm pơtao pơtrơp đơ̆ng 'bă sư Đawit, na sư wơh hloi lu đĭch đam sư năm tơ Sôlômôn, yua kơ Hiram ling-lang pơm buăl juăt pơtao Đawit.

²Sôlômôn kư̆m tơwih nơ̆r kơ pơtao Hiram khan:

³“Ih băt bơih yua kơ tơblah wang jơ̆p-jang tăp dăr, na Đawit 'bă inh sư tam mă gơh pơm Hnam Akŭm kơ anăn Kră Yang 'Bok Kei-Dei sư, dĭng truh tơ Kră Yang ăn kơ sư blah pơjuă lu ayăt tơ ala jơ̆ng sư.

⁴Mă-lei dang ei Kră Yang 'Bok Kei-Dei inh, ăn boih kơ inh rơngei hiôk-hian tăp pang pă đei bu blah păng kư̆m pă đei tơdrong kiơ truh.

⁵Thoi noh na inh wă pơm Hnam Akŭm ăn kơ anăn Kră Yang 'Bok Kei-Dei inh kiơ̆ thoi Kră Yang khan kơ 'bă inh Đawit sơ̆: Inh gô ăn kơ kon drŏ-nglo ih pơm pơtao pơtrơp đơ̆ng ih, sư gô pơm Hnam Akŭm kơ anăn Inh.

⁶Thoi noh na ih athei lu đĭch đam ih kăl tơgŭm inh 'long hơngo đơ̆ng char Liban, na inh kư̆m gô athei lu đĭch đam inh hai dai wang jang tơgŭm đĭch đam ih, inh gô apah lu đĭch đam ih gô mơ̆ng kơ đơ̆ng ih hơgăt, yua kơ ih kư̆m băt mơ̆n lu nhôn ưh kơ juăt kơ kăl 'long thoi lu kon pơlei Siđôn ôh.”

⁷Lăp pơtao kơtơ̆ng nơ̆r Sôlômôn pơma thoi noh, na sư hiôk dêh sư khan: Kơkuh bơnê kơ Kră Yang năr 'nâu Sư ăn kơ Đawit đei minh 'nu kon drŏ-nglo gơh hơgei tôm tơdrong wă pơgơ̆r kon pơlei pơla tih dêh thoi âu.

⁸Na Hiram sư wơh bơngai năm roi kơ Sôlômôn: “Inh kơtơ̆ng bơih nơ̆r ih wơh lu đĭch đam ih pơtruh kơ inh kiơ̆ thoi ih wă chă kăl 'long hơngo, hơngo hla iĕ.

⁹Lu đĭch đam inh gô dui hor 'long noh đơ̆ng char Liban ba tơ đak dơsĭ, na chô̆ pơm thoi thŏng-nan chơ ăn kơ ih truh tơ anih mă ih tơhlâu ăn kơ inh. Inh gô yuih lê̆ tơ noh ih gô iŏk đơ̆ng noh. Ih athei bơngơ̆t kiơ̆ thoi inh wă ăn kơ đĭ ŭnh hnam nhôn tơmam sa.”

¹⁰Thoi noh Hiram kăl ăn kơ Sôlômôn 'long hơngo păng 'long hơngo hla iĕ kiơ̆ thoi sư apinh wă.

¹¹Gah Sôlômôn sư ăn kơ hnam Hiram 'bar-jĭt kơthŭng 'ba mi (kôr) wă pơm tơmam sŏng sa kơ đĭ ŭnh hnam pơtao Hiram păng kư̆m ăn 'bar-jĭt kơthŭng đak rơmă ôliwơ, rim sơnăm Sôlômôn ăn kơ pơtao Hiram thoi noh.

¹²Kră Yang tuh ăn kơ pơtao Sôlômôn tơdrong gơh hơgei hlôh wao kiơ̆ thoi Kră Yang đei pơkă hăm sư; Hiram măr sư Sôlômôn pơgơ̆p băl kơjăp 'lơ̆ng dêh.

¹³Pơtao Sôlômôn krao đĭ lu bơngai Isơrael, năm jang pơdŭ 'long đei pêng-jĭt rơbâu 'nu bơngai năm.

¹⁴Pơtao wơh lu sư tơplih băl năm tơ char Liban, rim khei mơjĭt-rơbâu 'nu bơngai. Lu sư oei tơ char Liban minh khei, păng 'bar khei oei tơ hnam, Ađôniram wei-lăng lu bơngai jang 'noh.

¹⁵Pơtao Sôlômôn đei tơpơh-jĭt rơbâu 'nu bơngai tung tôi, păng tơhngam-rơbâu 'nu bơngai teh tơmo kơpal kông.

¹⁶Kŭm oei đei pêng-rơbâu pêng-hrĕng 'nu, mă pơtao Sôlômôn pơjao wei-lăng pơgơ̆r tơdrong jang man pơdơ̆ng păng tơwơh băl jang.

¹⁷Kiơ̆ pơtao Sôlômôn athei lu sư teh blah tơmo tih tơmo gĭt wă pơm jrăng hơnă Hnam Akŭm.

¹⁸Lu bơngai thơ̆ jang kơ pơtao Sôlômôn păng pơtao Hiram, hăm lu bơngai Gêbal, lu sư teh tơmo păng kăl 'long wă pơm tơiung Hnam Akŭm.