Read bahnar I Pot 6 Bible Online

I Pot 6 - bahnar bible

I Pot 6

¹Lăm sơnăm puăn-hrĕng tơhngam-jĭt đơ̆ng rŏng kơ lu bơngai Isơrael lĕch đơ̆ng dêh char Êyiptơ; sơnăm mă puăn lăm chăl Sôlômôn pơgơ̆r lu bơngai Isơrael, kơplah khei Siu wă khan khei mă 'bar, sư pơtơm pơdơ̆ng tơiung pơm Hnam akŭm Kră Yang.

²Hnam akŭm mă Sôlômôn pơm ăn kơ Kră Yang 'noh, tor sư pêng-jĭt hlok, wơ̆l sư mơjĭt păng kơjung sư mơjĭt-pơđăm hlok.

³Kơdeng gah anăp hnam tor sư mơjĭt hlok hơtŏ hăm wơ̆l Hnam akŭm, wơ̆l sư să pơđăm hlok.

⁴Sôlômôn sư kư̆m pơm 'măng-'mŏk Hnam akŭm pơkăp đei dơhlông găn.

⁵Tơ rok tơnăr Hnam akŭm, sư pơm anih tăp dăr păng anih rơgoh, sư kư̆m pơm lơ anih tăp dăr.

⁶Tăl ala să 'bar hlok minh puăt, tăl tŏk-bŏk să pêng hlok păng tăl mă pêng să pêng hlok minh puăt. Pơtao Sôlômôn man lu tơnăr mơ̆t tơ lăm wă kơ dan lu tơpung anih tăl na wă kơ huay kơ hơtŭt kơ tơnăr Hnam akŭm.

⁷Năr wă pơdơ̆ng hnam đe yua tơmo đơ̆ng lăm sơlŭng đe teh 'măn lê̆ adrol bơih, kơplah lu sư pơdơ̆ng tơiung ưh pă đei kơtơ̆ng re mut teh, păng re lu tơmam đe pơm păng bơsei.

⁸'Măng mơ̆t tơ anih ala gah cheng Hnam akŭm gah gơal, đe yua kung dăr kơdŭt hơbâu jur tŏk tơ anih tăl tŏk-bŏk, na gơh tŏk tơ tăl mă pêng.

⁹Sư pơm Hnam akŭm păng pơkeh man noh. Sôlômôn sư roh tơpơng klơ̆p hăm tơ̆r 'long hơngo bri.

¹⁰Sư kư̆m pơm lu anih rok tơnăr Hnam akŭm rim anih kơjung 'bar hlok minh puăt lu anih noh klep kơ Hnam akŭm hăm tơpung 'long hơngo.

¹¹Đei nơ̆r Kră Yang khan kơ pơtao Sôlômôn:

¹²“Gah Hnam akŭm mă ih oei pơm dang ei 'nâu, tơdah ih chu pơm kiơ̆ nơ̆r Inh tơtă păng chĕp răk dôm tơdrong juăt Inh bơtho khan, wei răk nơ̆r Inh tơtă păng pơm kiơ̆, lei inh gô pơsĭt lu nơ̆r inh đei pơkă kơ 'bă ih Đawit lăm chăl arih ih.

¹³Inh gô oei hơdai lu bơngai Isơrael. Inh ưh kơ achăng lê̆ ôh bơngai Isơrael kon pơlei pơla inh.”

¹⁴Thoi noh pơtao Sôlômôn pơm Hnam akŭm păng pơm pơkeh.

¹⁵Pơ̆ng tơnăr hăm tơ̆r 'long hơngo gah lăm đơ̆ng hơnă truh tơ kơpal, lơ̆k hơnă hăm tơ̆r 'long hơngo hla iĕ.

¹⁶Pơtao iŏk 'long hơngo, sư pĕng pơgăn anih mơjĭt hlok lăm Hnam akŭm, đơ̆ng hơnă truh tơ bơbŭng, noh Anih Rơgoh đe krao Anih Rơgoh Hloh.

¹⁷'Bơ̆t anăp Anih 'Lơ̆ng Rơgoh, tor să kơjung 'bar-jĭt hlok,

¹⁸Tơnăr lăm Hnam akŭm pơm pơ̆ng hăm tơ̆r 'long hơngo ngăl, sư chhơ̆ chrek rup get đak păng pơkao 'nao tơlang, anih ayơ kư̆m pơ̆ng 'long dơnơ̆ng ngăl ưh kơ đei 'bôh tơmo ôh.

¹⁹Pơtao kư̆m pơm hơmet Anih 'Lơ̆ng Rơgoh hloh wă tah hom tơdrong pơgơ̆p Kră Yang lăm noh.

²⁰Lăm anih Rơgoh hloh noh tor sư mơjĭt hlok, wơ̆l sư mơjĭt hlok păng kơjung sư kư̆m lei-lăi mơjĭt hlok; sư lom anih Rơgoh hloh hăm maih rơgoh sư kư̆m lom chơnang soi hăm tơ̆r, 'long hơngo.

²¹Pơtao Sôlômôn lom tơ lăm Hnam akŭm hăm maih rơgoh. Sư iŏk glang maih dăng 'bơ̆t anăp Anih Rơgoh hloh, anih mă lom hăm maih.

²²Sôlômôn kư̆m lom jơ̆p Hnam akŭm hăm maih; sư kư̆m lom đĭ chơnang soi hăm maih 'măn lăm Anih Rơgoh Hloh 'noh.

²³Sư kư̆m pơm lăm Anih Rơgoh Hloh noh 'bar tŏ rup chêrubim sư pơm hăm 'long ôliwơ kơjung sư pơđăm hlok.

²⁴Minh pah pơnăr chêrubim să 'bar hlok minh puăt, minh pah dơ̆ng kư̆m 'bar hlok minh puăt, na đơ̆ng pah âu truh tơ jih pah to pơnăr đei pơđăm hlok.

²⁵Rup chêrubim mă 'bar kư̆m lei-lăi pơnăr sư kư̆m pơđăm hlok mơ̆n; 'bar tŏ chêrubim 'noh sư pơm tŏ ăi lei-lăi băl đĕch.

²⁶Chêrubim kơjung sư pơđăm hlok. Chêrubim mă 'bar kư̆m lei-lăi.

²⁷Sôlômôn dan lê̆ 'bar tŏ rup chêrubim oei bơyar pơnăr noh lăm Anih Rơgoh Hloh lăm Hnam akŭm. Minh pah pơnăr pah âu hơtŭt kơ tơnăr pah âu, minh pah pơnăr pah to hơtŭt kơ tơnăr pah to, 'bar pah pơnăr tơ'bưh băl tŏk-bŏk lăm Anih Rơgoh Hloh.

²⁸'Bar tŏ chêrubim noh sư lom hăm maih.

²⁹Tơ tơnăr tăp dăr kơ Hnam akŭm lăm Anih Rơgoh păng Anih Rơgoh Hloh sư chhơ̆ lu rup chêrubim, 'long gol, păng pơkao 'nao tơlang.

³⁰Hơnă Hnam akŭm sư kư̆m tuh lơ̆k hăm maih, mă Anih Rơgoh dah Anih Rơgoh hloh.

³¹Trong wă mơ̆t lăm Anih Rơgoh Hloh, sư pơm 'bar pah tơnang 'măng hăm tơ̆r 'long ôliwơ, 'long pơdơ̆ng đei pơđăm pah.

³²'Bơ̆t 'bar pah tơnang 'măng pơm hăm 'long ôliwơ noh, sư chhơ̆ rup chêrubim, 'long gol păng pơkao 'nao tơlang, sư hling hăm maih tơ rup chêrubim păng 'bơ̆t rup 'long gol rup pơkao 'nao tơlang.

³³Trong mơ̆t tơ Anih Rơgoh, sư kư̆m pơm jrăng 'măng puăn pah hăm 'long ôliwơ,

³⁴Sư kư̆m pơm 'bar hlak tơnang 'măng hăm 'long hơngo hla iĕ. 'Măng 'nâu đei 'bar hlak tơnang 'măng pơkăp băl gơh pơih păng 'măng mă minh kư̆m đei 'bar hlak tơnang 'măng pơkăp kơjăp băl gơh pơih.

³⁵Pơtao Sôlômôn sư chhơ̆ lu rup chêrubim, 'long gol păng pơkao 'nao tơlang, sư kư̆m bah hăm maih, lu trong rek đêl chhơ̆.

³⁶Pơtao kư̆m man cham lăm Hnam akŭm đei pêng trong tơmo gĭt rang teh blah pơiel, păng roh minh trong tơpơng găn hăm 'long hơngo.

³⁷Lăm sơnăm mă puăn, 'blep kơ khei Siu. Hnam akŭm Kră Yang man pơdơ̆ng jrăng.

³⁸Truh tơ sơnăm mă mơjĭt-mônh, 'blep kơ khei Bul wă khan khei tơhngam, đĭ-đăng dôm tơdrong jang man Hnam akŭm Kră Yang noh keh đang ngăl bơih kiơ̆ 'blep thoi đei hơgăt lê̆ adrol să iĕ, hơbŏ hnam noh. Pơtao Sôlômôn pơm Hnam akŭm 7 Kră Yang keh đĭ-đăng tơpơh sơnăm 'mơ̆i.